ಕೊಟ್ಟಾಯಂ: ಕೊರೊನಾ ಅಂದ್ರೆ ಯಾರಿಗೆ ಭಯ ಇಲ್ಲ ಹೇಳಿ. ಇಡೀ ಜಗತ್ತೇ ಮಾರಕ ವೈರಸ್​ಗೆ ನಡುಗುತ್ತಿದೆ. ಆದರೆ, ಕೇರಳದ ವ್ಯಕ್ತಿಯೊಬ್ಬನಿಗೆ ಕೊರೊನಾದ ಭಯವಿಲ್ಲ.

ಕಳೆದ 10 ವರ್ಷದಿಂದ ಕೊರೊನಾ ಜೊತೆ ಖುಷಿಯಾಗಿ ಇವರು ಜೀವನ ಸಾಗಿಸುತ್ತಿದ್ದಾರೆ ಎಂದರೆ ನೀವು ನಂಬಲೇಬೇಕು. ಅರೆ ಅದು ಹೇಗೆ ಅಂತೀರಾ? ಕೊರೊನಾ ಎಂಬುದು ಇವರ ಪಾಲಿಗೆ ವೈರಸ್​ ಅಲ್ಲ. ಬದಲಾಗಿ ಅವರ ಮುದ್ದಿನ ಮಡದಿ.

ಕೇರಳದ ಕೊಟ್ಟಾಯಂ ನಿವಾಸಿ ಶೈನ್​ ಥಾಮಸ್​ ಎನ್ನುವವರು ಕಳೆದ 10 ವರ್ಷದ ಹಿಂದೆಯೇ ಕೊರೊನಾ ಎನ್ನುವ ಮಹಿಳೆಯನ್ನು ಮದುವೆಯಾಗಿದ್ದಾರೆ.

ಶೈನ್​ – ಕೊರೊನಾ ದಂಪತಿಗೆ ಈಗ ಇಬ್ಬರು ಗಂಡು ಮಕ್ಕಳಿದ್ದಾರೆ. ಕೊರೊನಾ ಇದೀಗ ಜಗತ್ತಿಗೆ ಪ್ರಸಿದ್ಧಿಯಾಗಿದೆ. ಆದರೆ ಹತ್ತು ವರ್ಷದಿಂದ ಜೊತೆಗೇ ಇದ್ದರೂ ಮಡದಿಯ ಹೆಸರು ಯಾರಿಗೂ ಅಚ್ಚರಿ ಎನಿಸಿರಲಿಲ್ಲ. ಈಗ ಇವರ ಹೆಸರಿನ ಬಗ್ಗೆ ತಮಾಷೆಯ ಮಾತುಗಳು ಕೇಳಿಬರುತ್ತಿವೆ.