ನವದೆಹಲಿ, ಮೇ. 03: ದೇಶದಲ್ಲಿ ಕೊರೋನಾ ಅಬ್ಬರ ಮುಂದುವರೆದಿದ್ದು, ಹಲವು ರಾಜ್ಯಗಳಲ್ಲಿ ಪ್ರತಿದಿನ 40 ಸಾವಿರಕ್ಕೂ ಅಧಿಕ ಕೊರೋನಾ ಪಾಸಿಟಿವ್ ಕೇಸ್ಗಳು ದಾಖಲಾಗುತ್ತಿವೆ. ಇದರ ಜೊತೆಗೆ ಆಕ್ಸಿಜನ್ ಕೊರತೆಯೂ ದೇಶದಲ್ಲಿದೆ. ಹೀಗಾಗಿ, ಈಗಾಗಲೇ ನಾನಾ ದೇಶಗಳು ಭಾರತಕ್ಕೆ ಆಕ್ಸಿಜನ್ ಸರಬರಾಜು ಮಾಡಿವೆ. ದೇಶದ ನಾನಾ ಭಾಗಗಳಿಗೆ ತ್ವರಿತವಾಗಿ ಆಕ್ಸಿಜನ್ ಪೂರೈಕೆ ಮಾಡಲು ಭಾರತೀಯ ವಾಯುಪಡೆ ಕೂಡ ಕೈ ಜೋಡಿಸಿದ್ದು, ಸೇನಾ ವಿಮಾನದ ಮೂಲಕ ಆಕ್ಸಿಜನ್ ಟ್ಯಾಂಕರ್ಗಳ ಸಾಗಾಟ ಮಾಡಲಾಗುತ್ತಿದೆ.
ಇದೀಗ ಜರ್ಮನಿಯಿಂದ 4 ಆಕ್ಸಿಜನ್ ಕಂಟೇನರ್ಗಳನ್ನು ಭಾರತೀಯ ವಾಯುಪಡೆ ಭಾರತಕ್ಕೆ ಏರ್ಲಿಫ್ಟ್ ಮಾಡಿದೆ. ಭಾರತೀಯ ವಾಯುಸೇನೆಯ ಸಿ-17 ವಿಮಾನದ ಮೂಲಕ ಭಾನುವಾರ 4 ಕ್ರಿಯೋಜೆನಿಕ್ ಆಕ್ಸಿಜನ್ ಕಂಟೇನರ್ಗಳನ್ನು ದೆಹಲಿಯ ಹಿಂಡನ್ ವಾಯುನೆಲೆಗೆ ಶಿಫ್ಟ್ ಮಾಡಲಾಗಿದೆ. ಜೊತೆಗೆ ಇಂಗ್ಲೆಂಡ್ನಿಂದ 450 ಆಕ್ಸಿಜನ್ ಸಿಲಿಂಡರ್ಗಳನ್ನು ತಮಿಳುನಾಡಿನ ಚೆನ್ನೈ ವಾಯುನೆಲೆಗೆ ಏರ್ಲಿಫ್ಟ್ ಮಾಡಲಾಗಿದೆ. ಹಾಗೇ, ಸಿ-17 ವಿಮಾನಗಳಲ್ಲಿ ಚಂಡೀಗಢದಿಂದ ಭುವನೇಶ್ವರಕ್ಕೆ 2 ಕ್ರಿಯೋಜೆನಿಕ್ ಆಕ್ಸಿಜನ್ ಕಂಟೇನರ್ಗಳನ್ನು ಏರ್ಲಿಫ್ಟ್ ಮಾಡಲಾಗಿದೆ. ಹಾಗೆಯೇ ಜೋಧ್ಪುರದಿಂದ ಜಾಮ್ನಾಗರಕ್ಕೆ 2 ಆಕ್ಸಿಜನ್ ಕಂಟೇನರ್ಗಳು, ಹಿಂಡನ್ನಿಂದ ರಾಂಚಿಗೆ 2 ಆಕ್ಸಿಜನ್ ಕಂಟೇನರ್ಗಳು, ಇಂದೋರ್ನಿಂದ ಜಾಮ್ನಾಗರಕ್ಕೆ 2 ಮತ್ತು ಹಿಂಡನ್ನಿಂದ ಭುವನೇಶ್ವರಕ್ಕೆ 2 ಆಕ್ಸಿಜನ್ ಕಂಟೇನರ್ಗಳನ್ನು ಏರ್ಲಿಫ್ಟ್ ಮಾಡಲಾಗಿದೆ ಎಂದು ಭಾರತೀಯ ವಾಯುಪಡೆ ಮಾಹಿತಿ ನೀಡಿದೆ.