‘ಸರ್, ನಿಮ್ಮ ಶೈಕ್ಷಣಿಕ ಅರ್ಹತೆ ಏನು ಎಂಬುದನ್ನು ದಯವಿಟ್ಟು ತಿಳಿಸುವಿರಾ?’ ಎಂದು ಟ್ವೀಟರ್(Tweeter) ಬಳಕೆದಾರರೊಬ್ಬರು ಖ್ಯಾತ ಉದ್ಯಮಿ(Businessman) ಆನಂದ್ ಮಹೀಂದ್ರಾ(Anand Mahindra) ಅವರನ್ನು ಪ್ರಶ್ನಿಸಿದ್ದು, ಉದ್ಯಮಿ ಆನಂದ್ ಮಹೀಂದ್ರಾ ಅವರು ಆ ಪ್ರಶ್ನೆಗೆ ನೀಡಿದ ಉತ್ತರ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.
ಟ್ವೀಟರ್ನಲ್ಲಿ ಅಭಿಷೇಕ್ ದುಬೇ ಎಂಬುವವರು “ಹಿಮಾಚಲ ಪ್ರದೇಶದಲ್ಲಿ ಚಾರಣ ಮಾಡುತ್ತಿದ್ದಾಗ, ದಟ್ಟ ಕಾನನದಲ್ಲಿ ಹುಡುಗಿಯೊಬ್ಬಳು ಓದುತ್ತಾ ಕುಳಿತಿರುವುದನ್ನು ನೋಡಿದೆ. ಓದಿನಲ್ಲಿ ಮಗ್ನಳಾಗಿರುವ ಆಕೆಯ ತನ್ಮಯತೆಯನ್ನು ಹೇಳಲು ಸಾಧ್ಯವಾಗುತ್ತಿಲ್ಲ. ಅಧ್ಭುತ” ಎಂದು ಪೋಟೋದೊಂದಿಗೆ ಬರೆದುಕೊಂಡಿದ್ದರು. ಅಭಿಷೇಕ ದುಬೇ ಅವರ ಈ ಪೋಟೋಗೆ ಪ್ರತಿಕ್ರಿಯಿಸಿದ ಉದ್ಯಮಿ ಆನಂದ್ ಮಹೀಂದ್ರಾ, “ ತುಂಬಾ ಸುಂದರವಾದ ಛಾಯಾಚಿತ್ರ. ಈ ಹುಡುಗಿ ನನಗೆ ಸ್ಪೂರ್ತಿ” ಎಂದಿದ್ದರು. ಈ ಛಾಯಾಚಿತ್ರ ಎಲ್ಲೆಡೆ ವೈರಲ್ ಆಗಿತ್ತು.
ನಂತರ ಆನಂದ್ ಮಹೀಂದ್ರಾ ಅವರ ಅಭಿಪ್ರಾಯಕ್ಕೆ, ವೈಭವ್ ಎಸ್ಡಿ ಎಂಬ ಟ್ವೀಟರ್ ಬಳಕೆದಾರ “ಸರ್ ನಿಮ್ಮ ಶೈಕ್ಷಣಿಕ ಅರ್ಹತೆ ಏನು ಎಂಬುದನ್ನು ದಯವಿಟ್ಟು ತಿಳಿಸುವಿರಾ..?” ಎಂದು ಪ್ರಶ್ನಿಸಿದ್ದರು. ಅದಕ್ಕೆ ಉತ್ತರ ನೀಡಿದ ಆನಂದ್ ಮಹೀಂದ್ರಾ “ನೇರವಾಗಿ ಹೇಳಬೇಕೆಂದರೆ, ನನ್ನ ಈ ವಯಸ್ಸಿನಲ್ಲಿ, ನನ್ನ ಅನುಭವವೇ ನನ್ನ ಏಕೈಕ ಅರ್ಹತೆಯಾಗಿದೆ” ಎಂದು ಉತ್ತರ ನೀಡಿದ್ದಾರೆ. ಈ ಉತ್ತರ ಇದೀಗ ಎಲ್ಲೆಡೆ ವೈರಲ್ ಆಗುತ್ತಿದ್ದು, ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ.