‘ಬ್ರಹ್ಮಾನಂದಂ’(Brahmanandam) ಎನ್ನುವ ಹೆಸರನ್ನು ಕೇಳದವರೇ ಇಲ್ಲ. ಇವರು ತೆಲಗು ಚಿತ್ರರಂಗದ(Tollywood) ಪ್ರಸಿದ್ಧ ಹಾಸ್ಯ ನಟ, ಸಾವಿರಕ್ಕಿಂತ ಹೆಚ್ಚು ಚಿತ್ರಗಳಲ್ಲಿ ನಟಿಸಿರುವ ಇವರು “ಅತಿ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ ಸಮಕಾಲೀನ ನಟ” ಎಂದು ಗಿನ್ನಿಸ್ ರೆಕಾರ್ಡ್(Guiness Record) ಕೂಡ ಮಾಡಿದ್ದಾರೆ.
ಚಿತ್ರರಂಗಕ್ಕೆ ಬರುವ ಮುನ್ನ ಕಾಲೇಜಿನಲ್ಲಿ ಉಪನ್ಯಾಸಕರಾಗಿದ್ಧ ಬ್ರಹ್ಮಾನಂದಂ, ತೆಲುಗು ಚಿತ್ರರಂಗಕ್ಕೆ ನೀಡಿದ ಕೊಡುಗೆಯನ್ನು ಪರಿಗಣಿಸಿ ಭಾರತ ಸರ್ಕಾರ(Indian Government) ‘ಪದ್ಮಶ್ರೀ’(Padmashree) ಪ್ರಶಸ್ತಿ ನೀಡಿ ಗೌರವಿಸಿದೆ. ಇವರು ಕನ್ನಡದಲ್ಲಿ ಪುನೀತ್‌ ರಾಜಕುಮಾರ್(Puneeth Rajkumar) ಅಭಿನಯದ ‘ನಿನ್ನಿಂದಲೇ’ ಚಿತ್ರದಲ್ಲಿ ಅಭಿನಯಿಸುವ ಮೂಲಕ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದ್ದಾರೆ.
ಹೌದು, ತಮ್ಮ ವಿಭಿನ್ನ ಡೈಲಾಗ್, ಮ್ಯಾನರಿಸಂನಿಂದಲೇ ಪ್ರೇಕ್ಷಕರನ್ನು ನಕ್ಕು ನಗಿಸುವ ಬ್ರಹ್ಮಾನಂದಂ ಅವರಿಗೆ ಆಂಧ್ರ, ತೆಲಂಗಾಣದಲ್ಲಿ ಮಾತ್ರವಲ್ಲ, ತಮಿಳುನಾಡು, ಕರ್ನಾಟಕದಲ್ಲಿ ಕೂಡಾ ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳಿದ್ದಾರೆ. 1986 ರಲ್ಲಿ ‘ಆಹಾ ನಾ ಪೆಳ್ಳಂಟ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ಬ್ರಹ್ಮಾನಂದಂ, ಇದುವರೆಗೂ ಸುಮಾರು 1000ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ.
ಈ ಮೂಲಕ ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ ಸೇರಿದ್ದಾರೆ. ಫಿಲ್ಮ್ಫೇರ್, ದಕ್ಷಿಣ ಭಾರತ ಅಂತಾರಾಷ್ಟ್ರೀಯ ಸಿನಿಮಾ ಪ್ರಶಸ್ತಿ, 6 ಬಾರಿ ನಂದಿ ಪ್ರಶಸ್ತಿ ಸೇರಿದಂತೆ ಸಾಕಷ್ಟು ಪ್ರಶಸ್ತಿಗಳು ಬ್ರಹ್ಮಾನಂದಂ ಅವರ ಮುಡಿ ಸೇರಿವೆ. ಚಿತ್ರರಂಗಕ್ಕೆ ಬರುವ ಮುನ್ನ ಬ್ರಹ್ಮಾನಂದಂ ಪಶ್ಚಿಮ ಗೋದಾವರಿ ಜಿಲ್ಲೆಯ ಅತ್ತಿಲಿಯ ಕಾಲೇಜೊಂದರಲ್ಲಿ ತೆಲುಗು ಅಧ್ಯಾಪಕರಾಗಿ ಕೆಲಸ ಮಾಡುತ್ತಿದ್ದರು ಎಂಬುದು ಬಹಳ ಜನರಿಗೆ ತಿಳಿದಿಲ್ಲ.
ಅದೇ ರೀತಿ, ಇವರು ಕೇವಲ ನಟನೆಗೆ ಮಾತ್ರ ಸೀಮಿತವಾಗಿಲ್ಲ. ಚಿತ್ರಕಲೆಯಲ್ಲಿ ಕೂಡ ಬಹಳ ಆಸಕ್ತಿಯನ್ನು ಹೊಂದಿರುವ ಬ್ರಹ್ಮಾನಂದಂ, ಯಾವುದೇ ಚಿತ್ರಕಲಾವಿದನಿಗೆ ಕಡಿಮೆಯಿಲ್ಲ ಎನ್ನುವಂತೆ ಚಿತ್ರಗಳನ್ನ ಬಿಡಿಸುತ್ತಾರೆ. ಪೇಪರ್, ಪೆನ್ಸಿಲ್ ಹಿಡಿದರೆ ಸಾಕು ವಾರಗಟ್ಟಲೇ ಕುಳಿತು ಚಿತ್ರಗಳನ್ನು ಪೂರ್ತಿ ಮಾಡುತ್ತಾರಂತೆ!
ಇನ್ನು, ಒಂದೇ ಭಾಷೆಯಲ್ಲಿ ಅತಿ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ ಕಲಾವಿದನಾಗಿ ಗಿನ್ನಿಸ್ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲಿ ಬ್ರಹ್ಮಾನಂದಂ ಹೆಸರು ದಾಖಲಾಗಿದೆ. ಆದರೆ ಇಂತಹ ಮೇರು ನಟನಿಗೆ ಆರೋಗ್ಯ ಸಮಸ್ಯೆ ಎದುರಾದ ಕಾರಣ, ಇತ್ತೀಚಿನ ದಿನಗಳಲ್ಲಿ ಸಿನಿಮಾ ಅವಕಾಶಗಳು ಕ್ಷೀಣಿಸಿದ್ದವು. ಹಾಗಾಗಿ ಇವರು ಕಿರುತೆರೆಗೆ ಅಡಿಯಿಟ್ಟು ಅಲ್ಲೂ ರಂಜಿಸುತ್ತಿದ್ದು, ಒಂದಷ್ಟು ಜಾಹೀರಾತುಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಏನೇ ಆಗಲಿ ಇಂತಹ ಕಲಾವಿದರು ನೂರ್ಕಾಲ ಬದುಕಬೇಕು ಎನ್ನುವುದೇ ಅಭಿಮಾನಗಳ ಹಾರೈಕೆ.
- ಪವಿತ್ರ
