- ವಾಹನ ಭೌತಿಕ ಪರಿಶೀಲನೆಯ ನಂತರವೇ (Digital system in RTO offices ) ಫಿಟ್ನೆಸ್ ಪ್ರಮಾಣಪತ್ರ; ಅಕ್ರಮಗಳಿಗೆ ಕಟ್ಟುನಿಟ್ಟಿನ ಕ್ರಮ
- ಜಿಯೋ-ಫೆನ್ಸಿಂಗ್ ಆಧಾರಿತ mVahan ಆಪ್ ಮೂಲಕ ಪರಿಶೀಲನೆ; ರಾಜ್ಯದ 66 ಆರ್‌ಟಿಓಗಳಲ್ಲಿ ಜಾರಿ
- ವಾಹನ ಪರಿಶೀಲನೆ ವೇಳೆ 6 ಫೋಟೋ ಕಡ್ಡಾಯ; ಪಾರದರ್ಶಕತೆಗೆ ಸರ್ಕಾರದ ಹೊಸ ಹೆಜ್ಜೆ
Bengaluru: ಕರ್ನಾಟಕದಲ್ಲಿ ನೋಂದಣಿಯಾಗಿ ಸಂಚರಿಸುತ್ತಿರುವ ವಾಣಿಜ್ಯ ವಾಹನಗಳ (Digital system in RTO offices) ಅರ್ಹತಾ (Fitness) ಪ್ರಮಾಣಪತ್ರ ವಿತರಣೆಯಲ್ಲಿ ಪಾರದರ್ಶಕತೆ ಮತ್ತು ನಿಖರತೆ ಹೆಚ್ಚಿಸಲು ರಾಜ್ಯ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ.
ಸಾರಿಗೆ ಇಲಾಖೆ ಈಗ ಜಿಯೋ-ಫೆನ್ಸಿಂಗ್ (Geo-fencing) ಆಧಾರಿತ ‘ಎಂವಾಹನ್ ಫಿಟ್ನೆಸ್’ ಮೊಬೈಲ್ ಅಪ್ಲಿಕೇಷನ್ ಅನ್ನು ರಾಜ್ಯದ ಎಲ್ಲಾ ಪ್ರಾದೇಶಿಕ ಸಾರಿಗೆ ಕಚೇರಿಗಳಲ್ಲಿ (RTO) ಜಾರಿಗೆ ತಂದಿದೆ.
ಈ ಹೊಸ ವ್ಯವಸ್ಥೆಯ ಮೂಲಕ ವಾಹನದ ನಿಜವಾದ ಪರಿಶೀಲನೆ ನಡೆದ ನಂತರವೇ ಫಿಟ್ನೆಸ್ ಪ್ರಮಾಣಪತ್ರ ನೀಡುವ ವ್ಯವಸ್ಥೆ ಆರಂಭವಾಗಿದೆ.
ಇದರಿಂದ ಬಹುಕಾಲದಿಂದ ಕೇಳಿಬರುತ್ತಿದ್ದ ಅಕ್ರಮ ಮತ್ತು ದೋಷಪೂರಿತ (Digital system in RTO offices) ವಿಧಾನಗಳಿಗೆ ತಡೆ ಬೀಳಲಿದೆ ಎಂದು ಸಾರಿಗೆ ಇಲಾಖೆ ತಿಳಿಸಿದೆ.
ರಾಜ್ಯದ ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ (Ramalinga Reddy) ಈ ಬಗ್ಗೆ ಮಾಹಿತಿ ನೀಡಿದ್ದು, ಕರ್ನಾಟಕದ ಒಟ್ಟು 66 ಆರ್‌ಟಿಓ ಕಚೇರಿಗಳಲ್ಲಿ ಈ ಡಿಜಿಟಲ್ ವ್ಯವಸ್ಥೆಯನ್ನು ಅನುಷ್ಠಾನಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಜಿಯೋ-ಫೆನ್ಸಿಂಗ್ ತಂತ್ರಜ್ಞಾನವನ್ನು ಬಳಸಿ ಪ್ರತಿಯೊಂದು ಆರ್‌ಟಿಓ ಕಚೇರಿಯಲ್ಲಿ ವಾಹನ ಪರಿಶೀಲನೆ ನಡೆಸುವ ನಿಗದಿತ ಪ್ರದೇಶಗಳನ್ನು ಗುರುತಿಸಲಾಗಿದೆ.
ವಾಹನಗಳು ಆ ಪ್ರದೇಶಕ್ಕೆ ಭೌತಿಕವಾಗಿ ಹಾಜರಾಗಿದ ನಂತರ ಮಾತ್ರ ಪರಿಶೀಲನೆ ಪ್ರಕ್ರಿಯೆ ಆರಂಭವಾಗುತ್ತದೆ.
ಈ ಕ್ರಮದಿಂದ ನಕಲಿ ಪರಿಶೀಲನೆ, ದಾಖಲೆಗಳ ದೋಷ ಮತ್ತು ಅನಧಿಕೃತ ಪ್ರಮಾಣಪತ್ರ ವಿತರಣೆಗೆ ಬ್ರೇಕ್ ಬೀಳಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಅಪ್ಲಿಕೇಷನ್ ಮೂಲಕ ವಾಹನದ ಫಿಟ್ನೆಸ್ ಪರಿಶೀಲನೆ ಪ್ರಕ್ರಿಯೆ ಸಂಪೂರ್ಣವಾಗಿ ಡಿಜಿಟಲ್ ಆಗಿರುತ್ತದೆ.
ಪರಿಶೀಲನೆಯ ಸಂದರ್ಭದಲ್ಲಿ ವಾಹನದ ಕನಿಷ್ಠ ಆರು ವಿಭಿನ್ನ ಛಾಯಾಚಿತ್ರಗಳನ್ನು ತೆಗೆದು ಅಪ್ಲಿಕೇಷನ್‌ನಲ್ಲಿ (Application) ಅಪ್‌ಲೋಡ್ ಮಾಡುವುದು ಕಡ್ಡಾಯವಾಗಿದೆ.
ಈ ಚಿತ್ರಗಳು ಮತ್ತು ಮಾಹಿತಿಯನ್ನು ಆನ್‌ಲೈನ್‌ನಲ್ಲಿ ಪರಿಶೀಲಿಸಿದ ಬಳಿಕವೇ ವಾಹನಕ್ಕೆ ಅರ್ಹತಾ ಪ್ರಮಾಣಪತ್ರ ನೀಡಲಾಗುತ್ತದೆ. ಇದರಿಂದ ವಾಹನಗಳು ನಿಜವಾಗಿಯೂ
ಪರಿಶೀಲನೆಗೊಂಡಿವೆ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಾಗುತ್ತದೆ. ಜೊತೆಗೆ ಪ್ರಕ್ರಿಯೆಯ ಪ್ರತಿಯೊಂದು ಹಂತವೂ ದಾಖಲಾಗುವ ಕಾರಣ ಪಾರದರ್ಶಕತೆ ಹೆಚ್ಚುತ್ತದೆ.
ಕರ್ನಾಟಕದಲ್ಲಿ ಪ್ರಸ್ತುತ ಸುಮಾರು 30 ಲಕ್ಷಕ್ಕೂ ಹೆಚ್ಚು ವಾಣಿಜ್ಯ ವಾಹನಗಳು ನೋಂದಾಯಿಸಿ ಕಾರ್ಯನಿರ್ವಹಿಸುತ್ತಿವೆ.
ಈ ವಾಹನಗಳಿಗೆ ಫಿಟ್ನೆಸ್ ಪ್ರಮಾಣಪತ್ರ ನೀಡುವ ಪ್ರಕ್ರಿಯೆಯಲ್ಲಿ ಏಕರೂಪತೆ ಇಲ್ಲದೆ ಇರುವುದರ ಬಗ್ಗೆ ಹಾಗೂ ಕೆಲವೊಂದು ಅಕ್ರಮಗಳ ಬಗ್ಗೆ ಸಾರ್ವಜನಿಕರಿಂದ
ಹಲವು ವರ್ಷಗಳಿಂದ ದೂರಗಳು ಕೇಳಿಬರುತ್ತಿದ್ದವು. ಕೆಲ ಸಂದರ್ಭಗಳಲ್ಲಿ ವಾಹನವನ್ನು ಪರಿಶೀಲಿಸದೇ ಪ್ರಮಾಣಪತ್ರ ನೀಡಲಾಗಿದೆ ಎಂಬ ಆರೋಪಗಳೂ ಇದ್ದವು.
ಈ ಹಿನ್ನೆಲೆಯಲ್ಲಿ ಸರ್ಕಾರ ಡಿಜಿಟಲ್ (Digital) ವ್ಯವಸ್ಥೆಯನ್ನು ಅಳವಡಿಸಿ ಪ್ರಕ್ರಿಯೆಯನ್ನು ಕಟ್ಟುನಿಟ್ಟಾಗಿ ಮಾಡಿದೆ.
ಹೊಸ ವ್ಯವಸ್ಥೆಯ ಪ್ರಕಾರ ನಿಗದಿತ ಜಿಯೋ-ಫೆನ್ಸಿಂಗ್ ಪ್ರದೇಶದ ಹೊರಗೆ ವಾಹನಗಳಿಗೆ ಫಿಟ್ನೆಸ್ ಪ್ರಮಾಣಪತ್ರ ನೀಡಲು ಅವಕಾಶ ಇರುವುದಿಲ್ಲ.
ಇದರಿಂದ ಅಧಿಕಾರಿಗಳು ಮತ್ತು ವಾಹನ ಮಾಲೀಕರು ನಿಯಮಾನುಸಾರ ಪ್ರಕ್ರಿಯೆ ಅನುಸರಿಸುವುದು ಕಡ್ಡಾಯವಾಗುತ್ತದೆ.
ಜೊತೆಗೆ ಪ್ರಾದೇಶಿಕ ಸಾರಿಗೆ ಅಧಿಕಾರಿಗಳಿಗೆ, ಪ್ರಮಾಣಪತ್ರಕ್ಕಾಗಿ ಬರುವ ವಾಹನಗಳಲ್ಲಿ ಕನಿಷ್ಠ 20 ಶೇಕಡಾ ವಾಹನಗಳನ್ನು ಮರುಪರಿಶೀಲನೆ ಮಾಡುವಂತೆ ಸೂಚಿಸಲಾಗಿದೆ.
ಈ ಕ್ರಮದಿಂದ ವ್ಯವಸ್ಥೆಯ ಮೇಲಿನ ಸಾರ್ವಜನಿಕ ವಿಶ್ವಾಸ ಹೆಚ್ಚುವ ನಿರೀಕ್ಷೆಯಿದೆ. ದೀರ್ಘಕಾಲದಿಂದ ಟೀಕೆಗೆ ಗುರಿಯಾಗಿದ್ದ ಫಿಟ್ನೆಸ್ ಪ್ರಮಾಣಪತ್ರ ವಿತರಣೆಯಲ್ಲಿನ ದೋಷಗಳಿಗೆ ಈಗ ತೆರೆ ಬೀಳುವ ಸಾಧ್ಯತೆ ಇದೆ ಎಂದು ಸಾರಿಗೆ ಇಲಾಖೆ ವಿಶ್ವಾಸ ವ್ಯಕ್ತಪಡಿಸಿದೆ.
ಇದನ್ನು ಓದಿ : https://vijayatimes.com/us-green-signal-to-buy-oil/
