ಪಂಚರಾಜ್ಯಗಳ ಚುನಾವಣೆಯ ಫಲಿತಾಂಶಕ್ಕೆ ಕ್ಷಣಗಣನೆ ಪ್ರಾರಂಭವಾಗಿದೆ. ಆದರೆ ಇದೀಗ ಉತ್ತರಪ್ರದೇಶದಲ್ಲಿ ಇವಿಎಂ ಅಕ್ರಮ ವಿವಾದ ಸದ್ದು ಮಾಡುತ್ತಿದೆ.

ಆಡಳಿತ ಪಕ್ಷ ಬಿಜೆಪಿ ಅಧಿಕಾರ ಬಳಸಿಕೊಂಡು ಮತಯಂತ್ರಗಳನ್ನೇ ಟ್ಯಾಪರಿಂಗ್ ಮಾಡುತ್ತಿದೆ. ಅದೇ ರೀತಿ ಕೆಲವೆಡೆ ಮತಯಂತ್ರಗಳನ್ನು ಅಭ್ಯರ್ಥಿಗಳಿಗೆ ಯಾವುದೇ ಮಾಹಿತಿ ನೀಡದೇ ಸಾಗಿಸಲಾಗುತ್ತಿದೆ.

ಕಳೆದ 2017ರ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಸುಮಾರು 50 ಕ್ಷೇತ್ರಗಳಲ್ಲಿ 5000 ಮತಗಳ ಅಂತರದಿಂದ ಗೆಲುವು ಸಾಧಿಸಿತ್ತು.

ಪ್ರತಿಬಾರಿ ಚುನಾವಣೆ ನಡೆದಾಗಲೂ ಇವಿಎಂ ವಿವಾದ ಸದ್ದು ಮಾಡುತ್ತದೆ. ಆದರೆ ಮತದಾನ ಪೂರ್ವದಲ್ಲಿ ಯಾವುದೇ ವಿವಾದ ಇರುವುದಿಲ್ಲ. ಮತದಾನವಾದ ನಂತರ ಅದರಲ್ಲೂ ಸಮೀಕ್ಷೆಗಳ ಫಲಿತಾಂಶ ಹೊರಬಿದ್ದ ನಂತರ ಇವಿಎಂ ಗಲಾಟೆ ಜೋರಾಗುತ್ತದೆ. ಇನ್ನು ಇವಿಎಂ ಕುರಿತು ಗಂಭೀರವಾಗಿ ಯೋಚಿಸಬೇಕಾದ ಕೆಲ ಮೂಲಭೂತ ಸಂಗತಿಗಳ ಬಗ್ಗೆ ಮಾತ್ರ ಯಾವುದೇ ರಾಜಕೀಯ ಪಕ್ಷದ ನಾಯಕರು ಮಾತನಾಡುವುದಿಲ್ಲ. ಆರೋಪ ಮಾಡುವಾಗ ತೋರುವ ಬದ್ದತೆಯನ್ನು ಅದಕ್ಕೆ ಉತ್ತರ ಕಂಡುಕೊಳ್ಳುವಾಗ ಮಾತ್ರ ಇರುವುದಿಲ್ಲ. 

ಇನ್ನು ಇವಿಎಂ ಕುರಿತು ಮತ್ತು ಚುನಾವಣೆ ಅಕ್ರಮಗಳ ಕುರಿತು ಮಾತನಾಡುವವರು ಕೆಳಗಿನ ಈ ಪ್ರಶ್ನೆಗಳಿಗೆ ಉತ್ತರಿಸಬೇಕಾಗಿದೆ. ಇವಿಎಂ ಟ್ಯಾಪರಿಂಗ್ ಮಾಡಬಹುದು ಎಂದು ಆರೋಪ ಮಾಡಲಾಗುತ್ತದೆ. ಆದರೆ ಅದನ್ನು ನಿರೂಪಿಸಲು ಇದುವರೆಗೂ ಸಾಧ್ಯವಾಗಿಲ್ಲ. ಕೇಂದ್ರ ಚುನಾವಣಾ ಆಯೋಗ ಬಹಿರಂಗ ಆಹ್ವಾನ ನೀಡಿದರು, ಯಾವುದೇ ಪಕ್ಷ ಚುನಾವಣಾ ಆಯೋಗದ ಸವಾಲನ್ನು ಯಾಕೆ ಸ್ವೀಕರಿಸಲಿಲ್ಲ? ಇನ್ನು ಭಾರತದಲ್ಲಿ ಬಳಸಲಾಗುತ್ತಿರುವ ಮತಯಂತ್ರಗಳು ಯಾವುದೇ ರೀತಿಯ ಅಂರ್ತಜಾಲ ಸಂಪರ್ಕ ವ್ಯವಸ್ಥೆಯನ್ನು ಹೊಂದಿಲ್ಲ. ಹೀಗಾಗಿ ಅವುಗಳನ್ನು ಹ್ಯಾಕ್ ಮಾಡಲು ಸಾಧ್ಯವೇ?

ಇವಿಎಂ ಅಕ್ರಮದ ಆರೋಪ ಕೇವಲ ಬಿಜೆಪಿ ಮೇಲೆ ಮಾತ್ರ ಕೇಳಿ ಬರುತ್ತದೆ. ಹಾಗಾದರೆ ಇವಿಎಂ ಟ್ಯಾಪರಿಂಗ್ ಟೆಕ್ನಾಲಜಿ ಬೇರೆ ಪಕ್ಷಗಳಿಗೆ ದೊರೆತಿಲ್ಲವೇ? ಪಶ್ಚಿಮ ಬಂಗಾಳ, ರಾಜಸ್ಥಾನ, ಕೇರಳ ಮತ್ತು ಪಂಜಾಬ್‍ನಲ್ಲಿ ಕಳೆದ ಬಾರಿ ಚುನಾವಣೆ ನಡೆದಾಗ, ಬಿಜೆಪಿ ಹೊರತಾದ ಪಕ್ಷಗಳೇ ಅಧಿಕಾರಕ್ಕೆ ಬಂದಾಗ ಇವಿಎಂಗಳನ್ನು ಬಳಸಲಾಗಿತ್ತಲ್ಲವೇ? ಕೊನೆಯದಾಗಿ ಚುನಾವಣೆ ನಂತರ ಇವಿಎಂ ಗಲಾಟೆ ಶುರುವಾಗುತ್ತದೆ. ಮತಯಂತ್ರಗಳಲ್ಲೇ ದೋಷವಿದ್ದರೆ, ಅವುಗಳನ್ನು ಬದಲಿಸಲು ಎಲ್ಲ ಪಕ್ಷಗಳು ಚುನಾವಣಾ ಪೂರ್ವದಲ್ಲಿಯೇ ಹೋರಾಟ ಮಾಡಬೇಕಲ್ಲವೇ?