• ಗ್ರಾಹಕರ ಸುರಕ್ಷತೆಗಾಗಿ ನಕಲಿ ORS ಮಾರಾಟ ನಿಷೇಧಿಸಿದ FSSAI
• WHO ಸೂತ್ರ ಪಾಲಿಸದ ORS ಬ್ರಾಂಡ್‌ಗಳಿಗೆ ಭಾರತದಲ್ಲಿ ಹೊಸ ನಿಯಮಗಳು ಜಾರಿ
• ಒಆರ್‌ಎಸ್ ಬಗ್ಗೆ ತಪ್ಪು ಲೇಬಲಿಂಗ್: FSSAI ಕಠಿಣ ಎಚ್ಚರಿಕೆ

New delhi: ಭಾರತದ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಮತ್ತೊಮ್ಮೆ ಸ್ಪಷ್ಟ ಎಚ್ಚರಿಕೆ ನೀಡಿದೆ ವಿಶ್ವ ಆರೋಗ್ಯ ಸಂಸ್ಥೆ (WHO) ಶಿಫಾರಸು ಮಾಡಿದ ಸೂತ್ರವನ್ನು ಪಾಲಿಸದ ಯಾವುದೇ ಉತ್ಪನ್ನವನ್ನು ‘ಒಆರ್‌ಎಸ್’ (Oral Rehydration Salts) ಎಂದು ಮಾರಾಟ ಮಾಡುವುದು ಸಂಪೂರ್ಣ ನಿಷೇಧ ಎಂದಿದೆ. (FSSAI warns fake ORS products)

ಅಕ್ಟೋಬರ್ 14 ರಂದು ಹೊರಡಿಸಲಾದ ಅಧಿಕೃತ ನಿರ್ದೇಶನದಲ್ಲಿ, ಈ ವಿಷಯದ ಕುರಿತಾಗಿ ಆಹಾರ ತಯಾರಿಕಾ ಕಂಪನಿಗಳಿಗೆ ಮತ್ತು ಮಾರಾಟಗಾರರಿಗೆ ಸ್ಪಷ್ಟ ಮಾರ್ಗಸೂಚಿ ನೀಡಲಾಗಿದೆ.

ಎಫ್‌ಎಸ್ಎಸ್ಎಐ ಹೇಳಿಕೆಯ ಪ್ರಕಾರ, ಹಲವಾರು ಬ್ರಾಂಡ್‌ಗಳು (Brand) ಒಆರ್‌ಎಸ್ ಹೆಸರಿನಲ್ಲಿ ತಪ್ಪುಮಾರ್ಗದ ಉತ್ಪನ್ನಗಳನ್ನು ಮಾರಾಟ ಮಾಡುತ್ತಿದ್ದವು.

ಇವುಗಳಲ್ಲಿ ಅನೇಕವು WHO ನಿಂದ ಶಿಫಾರಸು ಮಾಡಲ್ಪಟ್ಟ ನಿಖರವಾದ ಸಕ್ಕರೆ, ಉಪ್ಪು ಮತ್ತು ನೀರಿನ ಪ್ರಮಾಣದ ಸೂತ್ರವನ್ನು ಪಾಲಿಸುತ್ತಿಲ್ಲ.

ಈ ಹಿನ್ನೆಲೆಯಲ್ಲಿ, ಇಂತಹ ಉತ್ಪನ್ನಗಳನ್ನು ಒಆರ್‌ಎಸ್ ಎಂದು ಲೇಬಲ್ ಮಾಡುವುದು ಅಥವಾ ಅದರಂತೆ ಪ್ರಚಾರ ಮಾಡುವುದು ಕಾನೂನುಬಾಹಿರ ಎಂದು ಪ್ರಾಧಿಕಾರ ಸ್ಪಷ್ಟಪಡಿಸಿದೆ. (FSSAI warns fake ORS products)

ಆಹಾರ ವ್ಯವಹಾರ ಸಂಸ್ಥೆಗಳು ಇನ್ನು ಮುಂದೆ ಒಆರ್‌ಎಸ್ ಶಬ್ದವನ್ನು ಬಳಸುವಂತಿಲ್ಲ, ಅದರ ಬದಲಾಗಿ “ಹೈಡ್ರೇಶನ್ ಡ್ರಿಂಕ್” (Hydration Drink) , “ಎನರ್ಜಿ ಡ್ರಿಂಕ್” (Energy Drink) ಅಥವಾ “ಇಲೆಕ್ಟ್ರೋಲೈಟ್ ಪಾನೀಯ” ಎಂಬ ಪರ್ಯಾಯ ಪದಗಳನ್ನು ಬಳಸಬೇಕೆಂದು ಸೂಚಿಸಲಾಗಿದೆ.

ಅಷ್ಟಕ್ಕೂ ಒಆರ್‌ಎಸ್ ಎಂದರೆ Oral Rehydration Salts ಇದು ಸರಳವಾದ ಅತ್ಯಂತ ಪರಿಣಾಮಕಾರಿ ದ್ರಾವಣ. ಸಕ್ಕರೆ, ಉಪ್ಪು ಮತ್ತು ಶುದ್ಧ ನೀರಿನ ಸರಿಯಾದ ಪ್ರಮಾಣದಿಂದ ತಯಾರಾಗುವ ಈ ಮಿಶ್ರಣವು ಅತಿಸಾರ, ವಾಂತಿ ಅಥವಾ ಶಾಖದಿಂದ ಉಂಟಾಗುವ ನಿರ್ಜಲೀಕರಣ (Dehydration) ಸಮಸ್ಯೆಯಿಂದ ಜೀವ ಉಳಿಸಲು ಸಹಕಾರಿಯಾಗಿದೆ.

ಈ ದ್ರಾವಣದಲ್ಲಿನ ಗ್ಲೂಕೋಸ್ ಅಂಶವು ಅತ್ಯಂತ ಮುಖ್ಯವಾದದ್ದು. ಇದು ದೇಹದಲ್ಲಿ ಸೋಡಿಯಂ ಮತ್ತು ನೀರಿನ ಹೀರಿಕೆ (Absorption) ಪ್ರಕ್ರಿಯೆಯನ್ನು ವೇಗಗೊಳಿಸುತ್ತದೆ.

ಆದರೆ ಗ್ಲೂಕೋಸ್ ಅಂಶವಿಲ್ಲದ ಯಾವುದೇ ಪಾನೀಯವು ಒಆರ್‌ಎಸ್‌ನಂತೆ ಕೆಲಸ ಮಾಡುವುದಿಲ್ಲ ಎಂಬುದನ್ನು ವೈದ್ಯರು ಸ್ಪಷ್ಟವಾಗಿ ಹೇಳಿದ್ದಾರೆ.

ಇನ್ನು ಈ ಸಮಸ್ಯೆ ಹೊಸದೇನಲ್ಲ. ಇತ್ತೀಚಿನ ಎಚ್ಚರಿಕೆಗಿಂತ ಮೊದಲು, ಎಫ್‌ಎಸ್ಎಸ್ಎಐ ಏಪ್ರಿಲ್ 2022 ರಲ್ಲಿಯೇ ಈ ವಿಷಯದಲ್ಲಿ ಸೂಚನೆ ನೀಡಿತ್ತು.

ಹಲವು ಕಂಪನಿಗಳು ತಮ್ಮ ಪ್ಯಾಕೇಜಿಂಗ್‌ನಲ್ಲಿ “ORS alternative” ಅಥವಾ “ORS substitute” ಎಂಬ ಪದಗಳನ್ನು ಬಳಸುತ್ತಿದ್ದು, ಗ್ರಾಹಕರನ್ನು ತಪ್ಪು ದಾರಿಯಲ್ಲಿ ನಡಿಸುತ್ತಿದ್ದವು.

ಈ ಹಿನ್ನೆಲೆಯಲ್ಲಿ ಎಫ್‌ಎಸ್ಎಸ್ಎಐ (FSSAI) ಈಗ ಮತ್ತಷ್ಟು ಕಠಿಣ ಕ್ರಮ ಕೈಗೊಂಡಿದೆ. ಇಂತಹ ಉತ್ಪನ್ನಗಳ ವಿರುದ್ಧ ಪರಿಶೀಲನೆ, ಲೈಸೆನ್ಸ್ ರದ್ದುಪಡಿಸುವಿಕೆ ಹಾಗೂ ದಂಡಾತ್ಮಕ ಕ್ರಮಗಳು ಕೈಗೊಳ್ಳಲಾಗುತ್ತದೆ.

ಆಹಾರ ವ್ಯವಹಾರ ನಡೆಸುವ ಪ್ರತಿಯೊಬ್ಬರೂ ಈ ನಿಯಮವನ್ನು ಕಡ್ಡಾಯವಾಗಿ ಪಾಲಿಸಬೇಕಿದೆ.

ಎಫ್‌ಎಸ್ಎಸ್ಎಐಯ ಈ ತೀರ್ಮಾನವು ಗ್ರಾಹಕರ ಸುರಕ್ಷತೆ ಮತ್ತು ಆರೋಗ್ಯದ ದೃಷ್ಟಿಯಿಂದ ಅತ್ಯಂತ ಪ್ರಮುಖ ಹೆಜ್ಜೆಯಾಗಿದೆ.

WHO ಮಾನದಂಡಗಳನ್ನು ಪಾಲಿಸದ ಯಾವುದೇ ಉತ್ಪನ್ನವನ್ನು ಒಆರ್‌ಎಸ್ ಎಂದು ಮಾರಾಟ ಮಾಡುವುದು ಕಾನೂನುಬಾಹಿರವಾಗಿದೆ ಹೀಗಾಗಿ, ಗ್ರಾಹಕರು ಖರೀದಿ ಮಾಡುವಾಗ ಪ್ಯಾಕೇಜ್‌ನ್ನು ಓದಿ “WHO Formula ORS” ಎಂದು ಸ್ಪಷ್ಟವಾಗಿ ನಮೂದಿಸಿರುವುದನ್ನು ಖಚಿತಪಡಿಸಿಕೊಂಡು ಕೊಂಡುಕೊಳ್ಳಲು ಸೂಚಿಸಿದೆ.