ಭವಿಷ್ಯ ಭದ್ರಗೊಳಿಸುವ ಸೂಪರ್ (government guarantee security schemes) ಸೇವಿಂಗ್ಸ್ ಸ್ಕೀಮ್‌ಗಳು

ಬ್ಯಾಂಕ್ FDಗಿಂತ ಹೆಚ್ಚು ಬಡ್ಡಿ ನೀಡುವ 5 ಉಳಿತಾಯ ಯೋಜನೆಗಳಿವು

ಶೇ. 7.5 ಕ್ಕಿಂತ ಹೆಚ್ಚು ಬಡ್ಡಿ ನೀಡುವ ಸರ್ಕಾರಿ ಯೋಜನೆಗಳತ್ತ ಹೂಡಿಕೆದಾರರ ಗಮನ

ಪ್ರತಿ ವ್ಯಕ್ತಿಯೂ ತಮ್ಮ ದುಡಿದ ಹಣವನ್ನು ಸುರಕ್ಷಿತವಾಗಿ ಉಳಿಸಿಕೊಳ್ಳುವುದರ (government guarantee security schemes) ಜೊತೆಗೆ ಉತ್ತಮ ಲಾಭವೂ ಪಡೆಯಬೇಕೆಂದು ಬಯಸುತ್ತಾರೆ.

ಆದರೆ ಇಂದಿನ ಚಂಚಲ ಷೇರು ಮಾರುಕಟ್ಟೆ ಮತ್ತು ಹೂಡಿಕೆ ಕ್ಷೇತ್ರದ ಅನಿಶ್ಚಿತ ಪರಿಸ್ಥಿತಿಯಲ್ಲಿ, ಅನೇಕರು ಕಡಿಮೆ ಅಪಾಯದ ಹಾಗೂ ಸ್ಥಿರ ಆದಾಯ ನೀಡುವ ಆಯ್ಕೆಗಳತ್ತ ಮುಖ ಮಾಡುತ್ತಿದ್ದಾರೆ. ಈ ಸಂದರ್ಭದಲ್ಲಿ ಭಾರತ ಸರ್ಕಾರದ ಬೆಂಬಲಿತ ಉಳಿತಾಯ ಯೋಜನೆಗಳು ಮತ್ತೆ ಜನರ ಗಮನ ಸೆಳೆಯುತ್ತಿವೆ.

ಬ್ಯಾಂಕ್‌ಗಳ ಫಿಕ್ಸೆಡ್ ಡೆಪಾಸಿಟ್‌ಗಿಂತಲೂ ಹೆಚ್ಚು ಬಡ್ಡಿದರ ನೀಡುತ್ತಿರುವ ಕೆಲವು (government guarantee security schemes) ಸರ್ಕಾರಿ ಯೋಜನೆಗಳು, ಹೂಡಿಕೆದಾರರಿಗೆ ಭದ್ರತೆ ಮತ್ತು ಉತ್ತಮ ಆದಾಯ ಎರಡನ್ನೂ ಒದಗಿಸುತ್ತಿವೆ.

ಹೆಣ್ಣು ಮಕ್ಕಳ ಭವಿಷ್ಯವನ್ನು ಭದ್ರಗೊಳಿಸುವ ಉದ್ದೇಶದಿಂದ ಆರಂಭವಾದ ಸುಕನ್ಯಾ ಸಮೃದ್ಧಿ ಯೋಜನೆ (SSY) ಇದೀಗ ಅತ್ಯಧಿಕ ಜನಪ್ರಿಯತೆ ಗಳಿಸಿರುವ ಉಳಿತಾಯ ಯೋಜನೆಗಳಲ್ಲಿ ಒಂದಾಗಿದೆ.

ಪ್ರಸ್ತುತ ಈ ಯೋಜನೆಯಲ್ಲಿ ವರ್ಷಕ್ಕೆ 8.2 ಶೇಕಡಾ ಬಡ್ಡಿದರ ಲಭ್ಯವಿದ್ದು, 10 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಹೆಣ್ಣುಮಕ್ಕಳ ಹೆಸರಿನಲ್ಲಿ ಪೋಷಕರು ಖಾತೆ ತೆರೆಯಬಹುದು. ತೆರಿಗೆ ವಿನಾಯಿತಿ ಸೌಲಭ್ಯ, ದೀರ್ಘಾವಧಿಯ ಉಳಿತಾಯ ಹಾಗೂ ಮೆಚ್ಯುರಿಟಿ ವೇಳೆ ತೆರಿಗೆರಹಿತ ಮೊತ್ತ ಸಿಗುವ ವಿಶೇಷತೆ ಇದಕ್ಕಿದೆ.

ಮಗಳ ಉನ್ನತ ಶಿಕ್ಷಣ ಮತ್ತು ವಿವಾಹದಂತಹ ಪ್ರಮುಖ ಸಂದರ್ಭಗಳಲ್ಲಿ ಈ ಯೋಜನೆ ಆರ್ಥಿಕ ಭದ್ರತೆಯನ್ನು ಒದಗಿಸುತ್ತದೆ.

ನಿವೃತ್ತಿಯ ನಂತರ ನಿಯಮಿತ ಆದಾಯದ ಅವಶ್ಯಕತೆ ಇರುವ ಹಿರಿಯ ನಾಗರಿಕರಿಗೆ ಸೀನಿಯರ್ ಸಿಟಿಜನ್ ಸೇವಿಂಗ್ಸ್ ಸ್ಕೀಮ್‌ (SCSS) ಅತ್ಯುತ್ತಮ ಆಯ್ಕೆಯಾಗಿದೆ. ಈ ಯೋಜನೆಯಲ್ಲಿ ಸರ್ಕಾರವು 8.2 ಶೇಕಡಾ ಬಡ್ಡಿ ನೀಡುತ್ತಿದ್ದು, ಪ್ರತಿ ಮೂರು ತಿಂಗಳಿಗೊಮ್ಮೆ ಬಡ್ಡಿ ಹಣವನ್ನು ಪಾವತಿಸಲಾಗುತ್ತದೆ.

60 ವರ್ಷ ಮೇಲ್ಪಟ್ಟವರು, ಸ್ವಯಂ ನಿವೃತ್ತಿ ಪಡೆದವರು ಹಾಗೂ ಮಾಜಿ ಸೈನಿಕರು ಈ ಯೋಜನೆಯಲ್ಲಿ ಹೂಡಿಕೆ ಮಾಡಲು ಅರ್ಹರಾಗಿದ್ದಾರೆ. ಕನಿಷ್ಠ ಸಾವಿರ ರೂಪಾಯಿಯಿಂದ ಆರಂಭಿಸಿ 30 ಲಕ್ಷ ರೂಪಾಯಿವರೆಗೆ ಠೇವಣಿ ಇಡಬಹುದಾದ ಈ ಯೋಜನೆ, ನಿವೃತ್ತಿ ಜೀವನದಲ್ಲಿ ಆರ್ಥಿಕ ಸ್ಥಿರತೆಯನ್ನು ಕಾಪಾಡಲು ಸಹಾಯಕವಾಗುತ್ತದೆ.

ಇದರ ಜೊತೆಗೆ ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್‌ (NSC) ಮತ್ತು ಆರ್‌ಬಿಐ ಫ್ಲೋಟಿಂಗ್ ರೇಟ್ ಬಾಂಡ್‌ಗಳೂ ಹೂಡಿಕೆದಾರರ ವಿಶ್ವಾಸ ಗೆದ್ದಿರುವ ಪ್ರಮುಖ ಯೋಜನೆಗಳಾಗಿವೆ. NSC ಯೋಜನೆಯಲ್ಲಿ 7.7 ಶೇಕಡಾ ಬಡ್ಡಿ ಲಭ್ಯವಿದ್ದು, ಐದು ವರ್ಷಗಳ ಅವಧಿಯಲ್ಲಿ ಹಣವು ಸುರಕ್ಷಿತವಾಗಿ ಬೆಳೆಯುತ್ತದೆ. ಜೊತೆಗೆ ತೆರಿಗೆ ಉಳಿತಾಯದ ಸೌಲಭ್ಯವೂ ಲಭ್ಯ.

ಇನ್ನೊಂದೆಡೆ, ಭಾರತೀಯ ರಿಸರ್ವ್ ಬ್ಯಾಂಕ್‌ ಹೊರತರುವ ಫ್ಲೋಟಿಂಗ್ ರೇಟ್ ಬಾಂಡ್‌ಗಳು (Floating rate bond) ಪ್ರಸ್ತುತ 8.05 ಶೇಕಡಾ ಬಡ್ಡಿದರ ನೀಡುತ್ತಿವೆ. ಸರ್ಕಾರದ ಸಂಪೂರ್ಣ ಭದ್ರತೆಯೊಂದಿಗೆ ಬರುತ್ತಿರುವ ಈ ಬಾಂಡ್‌ಗಳು, ಕಡಿಮೆ ಅಪಾಯ ಬಯಸುವ ಹೂಡಿಕೆದಾರರಿಗೆ ಅತ್ಯಂತ ವಿಶ್ವಾಸಾರ್ಹ ಆಯ್ಕೆಯಾಗಿದೆ.

ಹೂಡಿಕೆ ಮಾಡಿದ ಹಣ ನಿಗದಿತ ಅವಧಿಯಲ್ಲಿ ದುಪ್ಪಟ್ಟಾಗಬೇಕು ಎಂದು ಬಯಸುವವರಿಗೆ ಕಿಸಾನ್ ವಿಕಾಸ್ ಪತ್ರ (KVP) ಸೂಕ್ತ ಯೋಜನೆಯಾಗಿದೆ. ಈ ಯೋಜನೆಯಲ್ಲಿ 7.5 ಶೇಕಡಾ ಬಡ್ಡಿದರ ದೊರೆಯುತ್ತಿದ್ದು, ಸುಮಾರು 115 ತಿಂಗಳಲ್ಲಿ ಹೂಡಿಕೆಯ ಮೊತ್ತ ದ್ವಿಗುಣವಾಗುತ್ತದೆ.

ಯಾವುದೇ ಗರಿಷ್ಠ ಹೂಡಿಕೆ ಮಿತಿ ಇಲ್ಲದಿರುವುದು ಇದರ ಮತ್ತೊಂದು ವಿಶೇಷತೆ. ಒಟ್ಟಾರೆ, ಮಾರುಕಟ್ಟೆಯ ಏರಿಳಿತಗಳಿಂದ ದೂರವಿದ್ದು, ಸರ್ಕಾರದ ಭದ್ರತೆಯೊಂದಿಗೆ ಉತ್ತಮ ಆದಾಯ ಗಳಿಸಲು ಬಯಸುವವರಿಗೆ ಇಂತಹ ಯೋಜನೆಗಳು ಅತ್ಯುತ್ತಮ ಆಯ್ಕೆಯಾಗಿವೆ.

ಸರಿಯಾದ ಯೋಜನೆಯನ್ನು ಆಯ್ಕೆ ಮಾಡಿಕೊಂಡು ದೀರ್ಘಾವಧಿಯಲ್ಲಿ ಹೂಡಿಕೆ ಮಾಡಿದರೆ, ಭವಿಷ್ಯದ ಆರ್ಥಿಕ ಭದ್ರತೆಯನ್ನು ಸುಲಭವಾಗಿ ನಿರ್ಮಿಸಿಕೊಳ್ಳಬಹುದು.