Bengaluru: ತಂತ್ರಜ್ಞಾನ ಅಭಿವೃದ್ಧಿಗೊಂಡಂತೆಲ್ಲ ಸಂತೋಷದ ಜೊತೆಜೊತೆಗೆ ದುಃಖ ಉಂಟಾಗುತ್ತದೆ. ಇದರಿಂದಾಗಿ ಹೊಸ ಬೆಳವಣಿಗೆ ಕಾಣಬಹುದಾದರೂ ಹಲವಾರು ಮಂದಿ ಕೆಲಸ ಕಳೆದುಕೊಳ್ಳುತ್ತಾರೆ.ಕಳೆದೊಂದು ವರ್ಷದಿಂದ ಕಳೆಗುಂದಿದ್ದ ಐಟಿ ಕಂಪನಿಗಳು (IT Company) ಇದೀಗ ಮತ್ತೆ ಚಿಗಿರಿಕೊಂಡಿದ್ದು, ಹೊಸಬರ ನೇಮಕಾತಿ ಹೆಚ್ಚಿಸಲು ನಿರ್ಧರಿಸಿವೆ.
ದೇಶದ ಪ್ರಮುಖ ಐಟಿ ಕಂಪನಿಗಳಾದ ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್ (TCS), ಇನ್ಫೋಸಿಸ್, ಎಚ್ಸಿಎಲ್ ಟೆಕ್ (HCL Tech), ವಿಪ್ರೋ ಹಾಗೂ ಟೆಕ್ ಮಹೀಂದ್ರಾ ಮತ್ತೆ ಕಾಲೇಜು ಕ್ಯಾಂಪಸ್ಗಳಿಗೆ ಕಾಲಿಡಲು ಸಜ್ಜಾಗಿವೆ. ಹೊಸ ಪ್ರತಿಭಾವಂತರನ್ನು ಹುಡುಕಿಕೊಂಡು ಎಂಜಿನಿಯರಿಂಗ್ ಕಾಲೇಜುಗಳ ಬಾಗಿಲು ತಟ್ಟಲು ಮುಂದಾಗಿವೆ.
ಇನ್ನು ಈಗಾಗಲೇ ಹೇಳಿರುವ ಪ್ರಕಾರ ಪ್ರಮುಖ ಐದು ಐಟಿ ಕಂಪನಿಗಳು ಈ ವರ್ಷ 81,000 ದಿಂದ 88,000ದಷ್ಟು ಹೊಸಬರನ್ನು ಉದ್ಯೋಗಕ್ಕೆ ನೇಮಕ ಮಾಡಿಕೊಳ್ಳಲಿವೆ. ಇದರಲ್ಲಿ ಅರ್ಧಕ್ಕಿಂತ ಹೆಚ್ಚು ಫ್ರೆಷರ್ಸ್ನ್ನು ಟಿಸಿಎಸ್ ಕಂಪನಿಯೊಂದೇ ನೇಮಕ ಮಾಡಿಕೊಳ್ಳಲಿದೆ.ಟಾಟಾ ಒಡೆತನದ ದೇಶದ ಅತಿ ದೊಡ್ಡ ಐಟಿ ಸೇವಾ ರಫ್ತು ಸಂಸ್ಥೆ ಟಿಸಿಎಸ್ ಈ ವರ್ಷ ಸುಮಾರು 40,000 ಹೊಸಬರನ್ನು ನೇಮಕ ಮಾಡಿಕೊಳ್ಳಲಿದೆ.
2024ನೇ ಆರ್ಥಿಕ ವರ್ಷದಲ್ಲೂ ಸರಿ ಸುಮಾರು ಇಷ್ಟೇ ಮಂದಿಯನ್ನು ಟಿಸಿಎಸ್ ನೇಮಕ ಮಾಡಿಕೊಂಡಿತ್ತು. 2023ರಲ್ಲಿ 44,000 ಹೊಸಬರಿಗೆ ಕಂಪನಿ ಉದ್ಯೋಗ ನೀಡಿತ್ತು. ಇನ್ನೂ ಈ ವರ್ಷದ ಜೂನ್ ತ್ರೈಮಾಸಿಕದಲ್ಲಿ ಈಗಾಗಲೇ ಕಂಪನಿ 11,000 ಹೊಸಬರನ್ನು ನೇಮಕ ಮಾಡಿಕೊಂಡಿದೆ.
ಇನ್ನು ವಿಪ್ರೋ ಕಂಪನಿ (Wipro Company) 2022ರಲ್ಲಿ 22,000 ಫ್ರೆಷರ್ಸ್ನ್ನು ಕಂಪನಿ ಕೆಲಸಕ್ಕೆ ನೇಮಿಸಿಕೊಂಡಿತ್ತು. ನಂತರ ಸತತ 6 ತ್ರೈಮಾಸಿಕಗಳ ಕಾಲ ನೇಮಕದಿಂದ ಹಿಂದೆ ಸರಿದಿತ್ತು. ಇದೀಗ ಮತ್ತೆ ನೇಮಕ ಶುರು ಮಾಡಿದ್ದು ಜೂನ್ ತ್ರೈಮಾಸಿಕದಲ್ಲಿ 3,000 ಹೊಸಬರಿಗೆ ಉದ್ಯೋಗ ನೀಡಿದೆ. ಈ ವರ್ಷ 10,000-12,000 ಫ್ರೆಷರ್ಸ್ಗೆ ಉದ್ಯೋಗ ನೀಡಲು ಬಯಸಿದೆ.ಟೆಕ್ ಮಹೀಂದ್ರಾ 6,000 ಉದ್ಯೋಗಿಗಳ ನೇಮಕಕ್ಕೆ ಉದ್ದೇಶಿಸಿದ್ದು, ಈಗಾಗಲೇ ಜೂನ್ನಲ್ಲಿ 1,000 ಫ್ರೆಷರ್ಸ್ನ್ನು ಕೆಲಸಕ್ಕೆ ತೆಗೆದುಕೊಂಡಿದೆ. ಹೀಗೆ ಒಟ್ಟಾರೆ ಈ ವರ್ಷ 81,000 ದಿಂದ 88,000ದಷ್ಟು ಇಂಜಿನಿಯರಿಂಗ್ ಪದವೀಧರರು ಟೆಕ್ಕಿಗಳಾಗಿ ಐಟಿ ಕಂಪನಿ ಸೇರಿ ಭವಿಷ್ಯ ರೂಪಿಸಿಕೊಳ್ಳಲಿದ್ದಾರೆ.
