ಕೀಟ ನಿಯಂತ್ರಣ ಕ್ರಮಗಳಲ್ಲಿ ದೋಷ ಪತ್ತೆ; ರೈತರು ಮತ್ತು ರಫ್ತುದಾರರಲ್ಲಿ ಹೆಚ್ಚಿದ ಆತಂಕ

ಪ್ರೀಮಿಯಂ ಮಾವಿನ ತಳಿಗಳ ರಫ್ತು ಸ್ಥಗಿತ, ಕೋಟ್ಯಂತರ ರೂಪಾಯಿ ನಷ್ಟದ ಭೀತಿ

ಸಸ್ಯ ಆರೋಗ್ಯ ಮಾನದಂಡ ಉಲ್ಲಂಘನೆ ಹಿನ್ನೆಲೆ ಆಮದು ಸ್ಥಗಿತಗೊಳಿಸಿದ ಜಪಾನ್ (Japan bans Indian mangoes)

New Delhi : ಭಾರತೀಯ ಮಾವುಗಳಿಗೆ ಜಾಗತಿಕ ಮಾರುಕಟ್ಟೆಯಲ್ಲಿ ವಿಶೇಷ ಬೇಡಿಕೆ ಇದ್ದರೂ, ಇದೀಗ ಜಪಾನ್ (Japan) ಸರ್ಕಾರ ಕೈಗೊಂಡಿರುವ ನಿರ್ಧಾರವು ದೇಶದ ಮಾವು ಬೆಳೆಗಾರರು ಮತ್ತು ರಫ್ತುದಾರರಿಗೆ ದೊಡ್ಡ ಆಘಾತ ತಂದಿದೆ.

ಸುಮಾರು ಎರಡು ದಶಕಗಳ ಬಳಿಕ ಇದೇ ಮೊದಲ ಬಾರಿಗೆ ಜಪಾನ್ ಭಾರತದಿಂದ ಆಮದು ಆಗುವ ಮಾವಿನ ಹಣ್ಣುಗಳ ಮೇಲೆ ನಿಷೇಧ ಹೇರಿದೆ. (Japan bans Indian mangoes)

ಭಾರತೀಯ ಸಂಸ್ಕರಣಾ ಕೇಂದ್ರಗಳಲ್ಲಿ ಕೀಟ ನಿಯಂತ್ರಣ ಮತ್ತು ಸುರಕ್ಷತಾ ಕ್ರಮಗಳಲ್ಲಿ ಕೆಲವು ಲೋಪಗಳು ಕಂಡುಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ವರದಿಯಾಗಿದೆ.

ಇದರ ಪರಿಣಾಮವಾಗಿ ಅಲ್ಫೋನ್ಸೊ(Alphonso), ಕೇಸರ್, ಲಂಗ್ರಾ ಹಾಗೂ ಬೈಗಾನಪಳ್ಳಿ ಸೇರಿದಂತೆ ಹಲವು ಪ್ರಸಿದ್ಧ ಭಾರತೀಯ ಮಾವಿನ ತಳಿಗಳ ರಫ್ತು ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದೆ.

ಜಪಾನ್ ಕೃಷಿ ಮತ್ತು ಸಸ್ಯ ಆರೋಗ್ಯ ಸಂಬಂಧಿತ ನಿಯಮಗಳಲ್ಲಿ ಅತ್ಯಂತ ಕಟ್ಟುನಿಟ್ಟಿನ ನಿಲುವು ಹೊಂದಿರುವ ದೇಶವಾಗಿದೆ.

ಅದರ ಕ್ವಾರಂಟೈನ್ ಅಧಿಕಾರಿಗಳು ಈ ವರ್ಷದ ಆರಂಭದಲ್ಲಿ ಭಾರತದಲ್ಲಿನ ವೇಪರ್ ಹೀಟ್ ಟ್ರೀಟ್‌ಮೆಂಟ್ (VHT) ಕೇಂದ್ರಗಳ ಪರಿಶೀಲನೆ ನಡೆಸಿದ್ದರು.

ರಫ್ತಿಗೆ ಮುನ್ನ ಮಾವಿನ ಹಣ್ಣುಗಳನ್ನು ಕೀಟರಹಿತಗೊಳಿಸುವ ಜವಾಬ್ದಾರಿ ಈ ಕೇಂದ್ರಗಳದ್ದಾಗಿದ್ದು, ಪರಿಶೀಲನೆಯ ವೇಳೆ ಕೆಲವು ತಾಂತ್ರಿಕ ದೋಷಗಳು ಮತ್ತು ನಿಯಮ ಉಲ್ಲಂಘನೆಗಳು ಪತ್ತೆಯಾಗಿವೆ ಎಂದು ತಿಳಿದುಬಂದಿದೆ.

ಹಣ್ಣು ನೊಣಗಳಂತಹ ಕೀಟಗಳು ದೇಶೀಯ ಕೃಷಿಗೆ ಅಪಾಯ ಉಂಟುಮಾಡಬಹುದು ಎಂಬ ಕಾರಣದಿಂದ ಜಪಾನ್ ‘ಶೂನ್ಯ ಸಹಿಷ್ಣುತೆ’ (Zero tolerance) ನೀತಿಯನ್ನು ಅನುಸರಿಸುತ್ತಿದ್ದು, ಯಾವುದೇ ರೀತಿಯ ಸಂಶಯ ಕಂಡುಬಂದರೂ ಕಠಿಣ ಕ್ರಮ ಕೈಗೊಳ್ಳುತ್ತದೆ.

ಭಾರತ ಮತ್ತು ಜಪಾನ್ ನಡುವಿನ ರಫ್ತು ಒಪ್ಪಂದದ ಪ್ರಕಾರ, ರಫ್ತಿಗೆ ಒಳಪಡುವ ಪ್ರತಿಯೊಂದು ಮಾವಿನ ಹಣ್ಣೂ ಕಡ್ಡಾಯವಾಗಿ VHT ಪ್ರಕ್ರಿಯೆಗೆ ಒಳಪಡಬೇಕು.

ಈ ವಿಧಾನದಲ್ಲಿ ರಾಸಾಯನಿಕಗಳನ್ನು ಬಳಸದೇ ನಿಯಂತ್ರಿತ ಉಷ್ಣಾಂಶ ಮತ್ತು ತೇವಾಂಶದ ಮೂಲಕ ಕೀಟಗಳು ಹಾಗೂ ಅವುಗಳ ಲಾರ್ವಾಗಳನ್ನು ನಾಶಪಡಿಸಲಾಗುತ್ತದೆ.

ಈ ವರ್ಷದ ಮಾರ್ಚ್‌ನಲ್ಲಿ ಉತ್ತರ ಪ್ರದೇಶದ ರೆಹಮಾನ್‌ಪುರದಲ್ಲಿರುವ ಕೇಂದ್ರದ ಪರಿಶೀಲನೆ ವೇಳೆ ಫ್ಯೂಮಿಗೇಶನ್ (Fumigation) ಮತ್ತು ಡಿಸ್ಇನ್ಫೆಕ್ಷನ್ (Disinfection) ಪ್ರಕ್ರಿಯೆಗಳಲ್ಲಿ ಕೆಲವು ದೋಷಗಳು ಕಂಡುಬಂದಿವೆ ಎಂದು ವರದಿಯಾಗಿದೆ. (Japan bans Indian mangoes)

ನಂತರ ಜಪಾನ್‌ನ ಯೋಕೋಹಾಮಾ ಪ್ಲಾಂಟ್ ಪ್ರೊಟೆಕ್ಷನ್ ಅಸೋಸಿಯೇಶನ್ (Yokohama Plant Protection Association) , ಮಾರ್ಚ್ 25, 2026ರ ನಂತರ ನೀಡಲಾದ ತಪಾಸಣಾ ಪ್ರಮಾಣಪತ್ರ ಹೊಂದಿರುವ ಭಾರತೀಯ ಮಾವಿನ ಸರಕುಗಳನ್ನು ಸ್ವೀಕರಿಸುವುದಿಲ್ಲ ಎಂದು ಘೋಷಿಸಿದೆ.

ಜಪಾನ್ ಭಾರತಕ್ಕೆ ಅತಿದೊಡ್ಡ ಮಾವಿನ ಆಮದುದಾರ ರಾಷ್ಟ್ರವಲ್ಲದಿದ್ದರೂ, ಅಲ್ಲಿನ ಮಾರುಕಟ್ಟೆಯಲ್ಲಿ ಭಾರತೀಯ ಮಾವುಗಳಿಗೆ ಹೆಚ್ಚಿನ ಬೆಲೆ ಮತ್ತು ವಿಶೇಷ ಸ್ಥಾನಮಾನವಿದೆ.

ವಿಶೇಷವಾಗಿ ಪ್ರೀಮಿಯಂ ಗುಣಮಟ್ಟದ ಮಾವುಗಳಿಗೆ ಉತ್ತಮ ಆದಾಯ ದೊರೆಯುತ್ತಿದ್ದ ಕಾರಣ, ಈ ನಿರ್ಬಂಧವು ರಫ್ತುದಾರರಿಗೆ ಆರ್ಥಿಕವಾಗಿ ದೊಡ್ಡ ಹೊಡೆತ ನೀಡಲಿದೆ.

ಭಾರತವು ವಿಶ್ವದಲ್ಲೇ ಅತಿಹೆಚ್ಚು ಮಾವು ಉತ್ಪಾದಿಸುವ ರಾಷ್ಟ್ರವಾಗಿದ್ದು, ವರ್ಷಕ್ಕೆ ಕೋಟ್ಯಂತರ ಟನ್‌ಗಳಷ್ಟು ಉತ್ಪಾದನೆ ಮಾಡುತ್ತದೆ. (Japan bans Indian mangoes)

ದೇಶೀಯ ಬಳಕೆಯ ಜೊತೆಗೆ ಜಪಾನ್‌ನಂತಹ ಉನ್ನತ ಮೌಲ್ಯದ ಮಾರುಕಟ್ಟೆಗಳಿಗೆ ರಫ್ತು ಮಾಡುವುದರಿಂದ ರೈತರು ಹಾಗೂ ವ್ಯಾಪಾರಿಗಳಿಗೆ ಹೆಚ್ಚುವರಿ ಲಾಭ ದೊರೆಯುತ್ತಿತ್ತು

. ಈಗಿನ ನಿರ್ಬಂಧದಿಂದ ಭಾರತದ ಕೃಷಿ ಗುಣಮಟ್ಟ ನಿಯಂತ್ರಣ ವ್ಯವಸ್ಥೆಗಳ ಮೇಲಿನ ವಿಶ್ವಾಸಕ್ಕೂ ಧಕ್ಕೆಯಾಗುವ ಸಾಧ್ಯತೆ ಇದೆ ಎಂಬ ಆತಂಕ ವ್ಯಕ್ತವಾಗಿದೆ.

ಇದರ ನಡುವೆ ಈಗಾಗಲೇ ಹವಾಮಾನ ವೈಪರೀತ್ಯದಿಂದ ಸಂಕಷ್ಟ ಅನುಭವಿಸುತ್ತಿರುವ ಮಾವು ಬೆಳೆಗಾರರಿಗೆ ಈ ಬೆಳವಣಿಗೆ ಮತ್ತೊಂದು ಹೊಡೆತವಾಗಿ ಪರಿಣಮಿಸಿದೆ.

ಎಲ್ ನಿನೊ (El Nino) ಪರಿಣಾಮ, ಅತಿಯಾದ ಬಿಸಿಲು ಮತ್ತು ಅಸ್ಥಿರ ಹವಾಮಾನದಿಂದಾಗಿ ಹಲವು ಪ್ರದೇಶಗಳಲ್ಲಿ ಈ ವರ್ಷ ಬೆಳೆ ಉತ್ಪಾದನೆ ಗಣನೀಯವಾಗಿ ಕುಸಿದಿದೆ.

ಕೆಲವು ಸಮೀಕ್ಷೆಗಳ ಪ್ರಕಾರ, ಮಹಾರಾಷ್ಟ್ರ ಸೇರಿದಂತೆ ಪ್ರಮುಖ ಮಾವು ಬೆಳೆಯುವ ಪ್ರದೇಶಗಳಲ್ಲಿ ಶೇಕಡಾ 85ರಿಂದ 90ರಷ್ಟು ಬೆಳೆ ಹಾನಿಯಾಗಿದೆ.

ಇಂತಹ ಸಂದರ್ಭದಲ್ಲಿ ಜಪಾನ್ ವಿಧಿಸಿರುವ ನಿಷೇಧವು ರೈತರ ಆದಾಯವನ್ನು ಮತ್ತಷ್ಟು ಕಡಿಮೆ ಮಾಡುವ ಭೀತಿ ಉಂಟುಮಾಡಿದೆ.

ಸಮಸ್ಯೆ ಪರಿಹರಿಸಿ ಜಪಾನ್‌ನ ವಿಶ್ವಾಸವನ್ನು ಮರಳಿ ಗಳಿಸಲು ಭಾರತ ಸರ್ಕಾರ ಮತ್ತು ಸಂಬಂಧಿತ ಸಂಸ್ಥೆಗಳು ತ್ವರಿತ ಕ್ರಮ ಕೈಗೊಳ್ಳಬೇಕೆಂಬ ಒತ್ತಾಯವೂ ಕೇಳಿಬರುತ್ತಿದೆ.