• ಇನ್ಮುಂದೆ ನಂದಿನಿ ಪಾರ್ಲರ್‌ಗಳಿಗೆ ಕಠಿಣ (KMF warns of cancellation of license) ಗೈಡ್‌ಲೈನ್
• ನಂದಿನಿ ಹೊರತು ಬೇರೆ ಬ್ರ್ಯಾಂಡ್ ಮಾರಾಟ ಮಾಡಿದ್ರೆ ಲೈಸೆನ್ಸ್ ರದ್ದು
• ನಕಲಿ ತುಪ್ಪ ಪ್ರಕರಣದ ಬಳಿಕ, ಬ್ರ್ಯಾಂಡ್‌ ಗೌರವ ರಕ್ಷಿಸಲು ಮುಂದಾದ KMF

Bengaluru: ಕರ್ನಾಟಕ ಮಿಲ್ಕ್ ಫೆಡರೇಶನ್‌ (KMF) ರಾಜ್ಯದಾದ್ಯಂತ ಕಾರ್ಯನಿರ್ವಹಿಸುತ್ತಿರುವ ನಂದಿನಿ ಪಾರ್ಲರ್‌ಗಳಿಗೆ (Nandini Parlours) ಹೊಸ ನಿಯಮವನ್ನು ಜಾರಿಗೊಳಿಸುವ ಚಿಂತನೆ ನಡೆಸಿದ್ದು , ಇನ್ನು ಮುಂದೆ ಪಾರ್ಲರ್‌ಗಳಲ್ಲಿ ನಂದಿನಿ ಹೊರತುಪಡಿಸಿ ಬೇರೆ ಬ್ರ್ಯಾಂಡ್‌ಗಳ ಉತ್ಪನ್ನಗಳನ್ನು ಮಾರಾಟ ಮಾಡಿದರೆ ಲೈಸೆನ್ಸ್ ರದ್ದು ಮಾಡುವ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಿದೆ.

ಇತ್ತೀಚೆಗೆ ನಕಲಿ ನಂದಿನಿ ತುಪ್ಪ ಮಾರಾಟ ಪ್ರಕರಣ ರಾಜ್ಯದಾದ್ಯಂತ ದೊಡ್ಡ ಚರ್ಚೆಗೆ ಕಾರಣವಾಗಿದ್ದರಿಂದ, ಬ್ರ್ಯಾಂಡ್‌ ಗೌರವವನ್ನು ಉಳಿಸಿಕೊಳ್ಳಲು ಕೆಎಂಎಫ್ ಈ ಕಠಿಣ ನಿರ್ಧಾರ ಕೈಗೊಂಡಿದೆ.

ಕೆಲ ದಿನಗಳ ಹಿಂದೆ ಸಿಸಿಬಿ ಪೊಲೀಸರು ಮತ್ತು ಕೆಎಂಎಫ್ ಜಾಗೃತ ದಳ ನಡೆಸಿದ ವಿಶೇಷ ದಾಳಿಯಲ್ಲಿ ದೊಡ್ಡ ಮಟ್ಟದ ನಕಲಿ ನಂದಿನಿ ತುಪ್ಪ ತಯಾರಿಕಾ ಜಾಲ ಪತ್ತೆಯಾದುದು ಬ್ರ್ಯಾಂಡ್‌ಗೆ ದೊಡ್ಡ ಆಘಾತವಾಯಿತು.

ನಂದಿನಿ ಪಾರ್ಲರ್‌ಗಳಿಂದ ತುಪ್ಪವನ್ನು ಖರೀದಿಸುವ ನೆಪದಲ್ಲಿ ಕೆಲಸ ಮಾಡುತ್ತಿದ್ದ ಆರೋಪಿಗಳು ಮೂಲ ಉತ್ಪನ್ನವನ್ನು ತಮಿಳುನಾಡಿನ ತಿರುಪೂರ್‌ಗೆ ಕಳುಹಿಸಿ ಅಲ್ಲಿ ನಕಲಿ ವಸ್ತುಗಳನ್ನು ಕಲಬೆರಕೆ ಮಾಡುತ್ತಿದ್ದರಂತೆ.

ಪ್ಯಾಕೇಟ್ ವಿನ್ಯಾಸ, ಬಣ್ಣ, ಲೋಗೋ ಎಲ್ಲವೂ ನಿಜವಾದಂತೆಯೇ ಇದ್ದ ಕಾರಣ ಮೋಸವನ್ನು ಪತ್ತೆಹಚ್ಚುವುದು ಕಷ್ಟವಾಗಿತ್ತು.

ಈ ಪ್ರಕರಣ ಬೆಳಕಿಗೆ ಬಂದ ನಂತರ, ಉತ್ಪನ್ನಗಳ ಸುರಕ್ಷತೆ ಮತ್ತು ಗ್ರಾಹಕರ ವಿಶ್ವಾಸ ರಕ್ಷಿಸಲು ಕೆಎಂಎಫ್ ಇನ್ನಷ್ಟು ಜಾಗ್ರತೆ ವಹಿಸುವ ಅಗತ್ಯ ಎದುರಾಗಿದೆ.

ಈ ಹಿನ್ನೆಲೆಯಲ್ಲಿ ಕೆಎಂಎಫ್ ಹಲವಾರು ಹೊಸ ನಿಯಮಾನುಸಾರ ಕ್ರಮಗಳನ್ನು ಜಾರಿಗೊಳಿಸುತ್ತಿದೆ. ಅವುಗಳಲ್ಲಿ ಪ್ರಮುಖವಾಗಿರುವುದು—ನಂದಿನಿ ಪಾರ್ಲರ್‌ಗಳು ತಮ್ಮ ಅಂಗಡಿಗಳಲ್ಲಿ ಯಾವುದೇ ಇತರೆ ಕಂಪನಿ ಅಥವಾ ಬ್ರ್ಯಾಂಡ್‌ನ ಉತ್ಪನ್ನಗಳನ್ನು ಮಾರಾಟ ಮಾಡಬಾರದು ಅನ್ನುವುದು.

ಈಗಾಗಲೇ ಕೆಲ ಪಾರ್ಲರ್‌ಗಳಲ್ಲಿ ಬೇರೆ ಬ್ರ್ಯಾಂಡ್ ಉತ್ಪನ್ನಗಳ ಮಾರಾಟದ ಮಾಹಿತಿ ಕೆಎಂಎಫ್ ಗಮನಕ್ಕೆ ಬಂದಿದೆ ಎಂದು ವರದಿಯಾಗಿದೆ.

ಇದಕ್ಕೆ ಸಂಬಂಧಪಟ್ಟಂತೆ ಕೆಲವು ಅಂಗಡಿ ಮಾಲೀಕರಿಗೆ ನೋಟಿಸ್ (Notice) ಜಾರಿಗೊಳಿಸಲಾಗಿದೆ. ಮುಂದುವರೆದು ಇದೇ ತಪ್ಪು ಮತ್ತೆ ಕಂಡುಬಂದರೆ, ಪಾರ್ಲರ್‌ನ ಲೈಸೆನ್ಸ್ (Parlor license) ಅನ್ನು ನೇರವಾಗಿ ರದ್ದು ಮಾಡಲಾಗುವುದು ಎಂದು ಹಿರಿಯ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಈ ಕುರಿತು ಮಾತನಾಡಿದ ಕೆಎಂಎಫ್‌ನ ವ್ಯವಸ್ಥಾಪಕ ನಿರ್ದೇಶಕ ಶಿವಸ್ವಾಮಿ, ನಂದಿನಿ ನಮ್ಮ ಹೆಮ್ಮೆಯ ಬ್ರ್ಯಾಂಡ್.

ಅದರ ಗುಣಮಟ್ಟ, ವಿಶ್ವಾಸ ಮತ್ತು ನಿಷ್ಠೆ ರಾಜ್ಯದ ಕೋಟ್ಯಾಂತರ ಗ್ರಾಹಕರಿಗೆ ಗೊತ್ತು. ಯಾವುದೇ ಕಾರಣಕ್ಕೂ ಬ್ರ್ಯಾಂಡ್‌ಗೆ ಕೆಟ್ಟ ಹೆಸರು ತರಲು ನಾವು ಅವಕಾಶ ನೀಡುವುದಿಲ್ಲ.

ನಂದಿನಿ ಪಾರ್ಲರ್ ಎನ್ನಿಸಿಕೊಂಡು ಬೇರೆ ಬ್ರ್ಯಾಂಡ್‌ಗಳಿಗೆ ಜಾಗ ನೀಡುವುದು ಅನುಮತಿಸಲಾಗುವುದಿಲ್ಲ. ಈಗಾಗಲೇ ಕೆಲವರಿಗೆ ಎಚ್ಚರಿಕೆ ನೀಡಿದ್ದೇವೆ.

ಇನ್ಮೇಲೆ ನೋಟಿಸ್ ಮಾತ್ರವಲ್ಲ, ನೇರ ಲೈಸೆನ್ಸ್ ರದ್ದು ಮಾಡಲಾಗುತ್ತದೆ ಎಂದು ಸ್ಪಷ್ಟ ಎಚ್ಚರಿಕೆ ನೀಡಿದ್ದಾರೆ.

ಇನ್ನು ಕರ್ನಾಟಕದಲ್ಲಿ ನಂದಿನಿ ಉತ್ಪನ್ನಗಳ ಮೇಲೆ ಜನರ ವಿಶ್ವಾಸ ಅಪಾರ. ಹಾಲು, ಬೆಣ್ಣೆ, ತುಪ್ಪ, ಐಸ್ ಕ್ರೀಮ್, ಪೇಸ್‌ಚುರೈಜ್ಡ್ (Pasteurized) ಉತ್ಪನ್ನಗಳು– ಎಲ್ಲವೂ ಮನೆಮಾತಾಗಿವೆ.

ಇಂತಹ ಸಂದರ್ಭದಲ್ಲಿ ನಕಲಿ ಉತ್ಪನ್ನಗಳ ಪ್ರವೇಶ ಗ್ರಾಹಕರಿಗೆ ನೇರ ಅಪಾಯವಾಗುತ್ತದೆ.

ಇದನ್ನು ತಡೆಗಟ್ಟಲು ಪೂರೈಕೆ ಸರಪಳಿ ಮೇಲ್ವಿಚಾರಣೆ, ಪ್ಯಾಕೇಜಿಂಗ್ ಸೆಕ್ಯುರಿಟಿ ಫೀಚರ್‌ಗಳ (Packaging security features)ಹೆಚ್ಚಳ, ಪಾರ್ಲರ್‌ಗಳ ನಿಯಮಿತ ಪರಿಶೀಲನೆ ಸೇರಿದಂತೆ ಹಲವಾರು ಕ್ರಮಗಳನ್ನು ಕೆಎಂಎಫ್ ಕೈಗೊಳ್ಳುತ್ತಿದೆ.

ನಂದಿನಿ ಬ್ರ್ಯಾಂಡ್ ಹೆಸರಿಗೆ ಧಕ್ಕೆಯಾಗದಂತೆ ನೋಡಿಕೊಳ್ಳುವ ಜವಾಬ್ದಾರಿಯನ್ನು ಸಂಘಟನೆ ಗಂಭೀರವಾಗಿ ತೆಗೆದುಕೊಂಡಿದ್ದು, ಪಾರ್ಲರ್ ಮಾಲೀಕರು ಸಹ ಈ ನಿಯಮ ಪಾಲನೆಗೆ ಸಹಕರಿಸಬೇಕು ಎಂಬ ಮನವಿ ಮಾಡಲಾಗಿದೆ.

ಗ್ರಾಹಕರು ನಕಲಿ ಉತ್ಪನ್ನಗಳ ಬಗ್ಗೆ ಅನುಮಾನ ಬಂದರೆ ತಕ್ಷಣ ಕೆಎಂಎಫ್‌ಗೆ ಮಾಹಿತಿ ಕೊಟ್ಟರೆ, ಅಪರಾಧಿಗಳನ್ನು ಪತ್ತೆಹಚ್ಚಲು ಸಹಾಯಕವಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನು ಓದಿ:1ನೇ ತರಗತಿಯಿಂದಲೇ ಕಂಪ್ಯೂಟರ್ ಶಿಕ್ಷಣ : ರಾಜ್ಯ ಸರ್ಕಾರದಿಂದ ಮಹತ್ವಾಕಾಂಕ್ಷಿ ಹೆಜ್ಜೆ