ಬೆಂಗಳೂರು, ಫೆ. 03: ಏರೋ ಇಂಡಿಯಾ ಶೋ’ Aero India-2021 ನಡೆಯುವ ಹಿನ್ನೆಲೆಯಲ್ಲಿ ಇಂದಿನಿಂದ 3 ದಿನ ಏರ್‌ಪೋರ್ಟ್‌ಗೆ ತೆರಳುವ ಮಾರ್ಗ ಬದಲಾವಣೆಯಾಗಲಿದೆ.

ಇಂದಿನಿಂದ 13 ನೇ ಆವೃತ್ತಿಯ ಏರೋ ಶೋ ಯಲಹಂಕ ವಾಯುನೆಲೆಯಲ್ಲಿ ಫೆ. 5ರವರೆಗೆ ನಡೆಯಲಿದ್ದು, ನಾಳೆ ಬೆಳಿಗ್ಗೆ ಏರೋ ಶೋಗೆ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ಚಾಲನೆ ನೀಡಲಿದ್ದಾರೆ. ಈ ದಿನಗಳಲ್ಲಿ ಬೆಳಿಗ್ಗೆ 5ರಿಂದ ರಾತ್ರಿ 10 ಗಂಟೆವರೆಗೆ ಮಾರ್ಗ ಬದಲಾವಣೆ ಮಾಡಲಾಗಿದೆ.

ವಾಹನಗಳಿಗೆ ಬದಲಿ ಮಾರ್ಗ:
ಬೆಂಗಳೂರು ಪಶ್ಚಿಮ, ಉತ್ತರದಿಂದ ಬರುವ ವಾಹನಗಳಿಗೆ- ಗೊರಗುಂಟೆಪಾಳ್ಯ, ಬಿಇಎಲ್ ವೃತ್ತ, MS ಪಾಳ್ಯ, ಯಲಹಂಕ ಮದರ್ ಡೈರಿ, ರಾಜಾನುಕುಂಟೆ, MVIT ಜಂಕ್ಷನ್, ಚಿಕ್ಕಜಾಲ ಮೂಲಕ ಏರ್‌ಪೋರ್ಟ್ ಟೋಲ್‌ಗೇಟ್ ತಲುಪಲು ಬದಲಿ ಮಾರ್ಗ ಕಲ್ಪಿಸಲಾಗಿದೆ.

ಬೆಂಗಳೂರು ದಕ್ಷಿಣ, ಕೇಂದ್ರದಿಂದ ಬರುವ ವಾಹನಗಳು- ಬಸವೇಶ್ವರ ವೃತ್ತ, ಸದಾಶಿವನಗರ ಪೊಲೀಸ್ ಠಾಣೆ, ಹೆಬ್ಬಾಳ ವೃತ್ತ, ನಾಗವಾರ ಜಂಕ್ಷನ್, ಥಣಿಸಂದ್ರ ಮುಖ್ಯರಸ್ತೆ, ರೇವಾ ಕಾಲೇಜ್ ಜಂಕ್ಷನ್, ಬಾಗಲೂರು, ಮೈಲನಹಳ್ಳಿ ಮೂಲಕ ಏರ್‌ಪೋರ್ಟ್ ಟೋಲ್‌ಗೇಟ್ ತಲುಪುವಂತೆ ಸೂಚಿಸಲಾಗಿದೆ.

ಬೆಂಗಳೂರು ಪೂರ್ವದಿಂದ ಏರ್‌ಪೋರ್ಟ್ ತಲುಪಲು ಟಿನ್‌ ಫ್ಯಾಕ್ಟರಿ, ರಾಮಮೂರ್ತಿ ನಗರ, ಹೆಣ್ಣೂರು ಕ್ರಾಸ್, ಬೈರತಿ ಕ್ರಾಸ್, ಹೊಸೂರು ಬಂಡೆ, ಜಾಗಲಹಟ್ಟಿ, ಗುಂಡಪ್ಪ ಸರ್ಕಲ್, ಬಾಗಲೂರು, ಬಿ.ಕೆ.ಹಳ್ಳಿ ಮೂಲಕ ಬೇಗೂರು ಬ್ಯಾಕ್‌ಗೇಟ್‌ನಿಂದ ಏರ್‌ಪೋರ್ಟ್‌ಗೆ ತಲುಪಬೇಕಾಗಿದೆ.

ಹೆಬ್ಬಾಳದಿಂದ ಏರ್‌ಪೋರ್ಟ್‌ವರೆಗೆ ಸಂಚಾರಕ್ಕೆ ತಡೆ ನೀಡಲಾಗಿದ್ದು, ಹೈದರಾಬಾದ್‌ನತ್ತ ತೆರಳುವ ವಾಹನಗಳಿಗೂ ಇದು ಅನ್ವಯಿಸಲಿದೆ. ಏರ್‌ ಶೋಗೆ ಹೋಗುವ ವಾಹನಗಳಿಗೆ ಮಾತ್ರ ಅವಕಾಶ ಇರಲಿದೆ.
ನಾಳೆಯಿಂದ ಏರೋ ಶೋ ಆರಂಭವಾಗುವ ಹಿನ್ನೆಲೆಯಲ್ಲಿ ಇಂದು ಲೋಹದ ಹಕ್ಕಿಗಳ ತಾಲೀಮು ನಡೆಯಲಿದೆ. ಏರೋ ಶೋನಲ್ಲಿ ಒಟ್ಟು 13 ದೇಶಗಳು ಪಾಲ್ಗೊಳ್ಳಲಿವೆ.