ಮಕ್ಕಳ ಪಾಸ್‌ಪೋರ್ಟ್‌ಗೆ (New rules for children passports) ಹೊಸ ರೂಲ್ಸ್; ಶುಲ್ಕವೂ ಏರಿಕೆ
15 ವರ್ಷದೊಳಗಿನ ಮಕ್ಕಳ ವ್ಯಾಲಿಡಿಟಿಯಲ್ಲಿ ಬದಲಾವಣೆ, ಪೋಷಕರು ತಿಳಿಯಲೇಬೇಕಾದ ಹೊಸ ನಿಯಮಗಳಿವು
ಮಕ್ಕಳ ವ್ಯಾಲಿಡಿಟಿಯಿಂದ ಶುಲ್ಕದವರೆಗೆ ಹಲವು ಪರಿಷ್ಕರಣೆ; 8 ವರ್ಷದೊಳಗಿನವರಿಗೆ 10% ರಿಯಾಯಿತಿ
New delhi : ವಿದೇಶಕ್ಕೆ ಪ್ರಯಾಣಿಸಲು ಪಾಸ್‌ಪೋರ್ಟ್ ಪಡೆಯಲು (New rules for children passports) ಸಿದ್ಧರಾಗಿರುವವರಿಗೆ ಕೇಂದ್ರ ಸರ್ಕಾರದ ಹೊಸ ನಿಯಮಗಳು ಮಹತ್ವದ ಬದಲಾವಣೆಯನ್ನು ತಂದಿವೆ.
ವಿದೇಶಾಂಗ ಸಚಿವಾಲಯವು ಪಾಸ್‌ಪೋರ್ಟ್ ನಿಯಮಗಳಲ್ಲಿ ಕೆಲವು ಪರಿಷ್ಕರಣೆಗಳನ್ನು ಮಾಡಿದ್ದು, ಇದರ ಪರಿಣಾಮ ಮಕ್ಕಳಿಂದ ಹಿಡಿದು ವಯಸ್ಕರ ವರೆಗೆ ವಿವಿಧ ವರ್ಗದ ಅರ್ಜಿದಾರರ ಮೇಲೆ ಬೀಳಲಿದೆ.
ವಿಶೇಷವಾಗಿ 15 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಪಾಸ್‌ಪೋರ್ಟ್‌ನ ಮಾನ್ಯತಾ ಅವಧಿಯಲ್ಲಿ ಪ್ರಮುಖ ಬದಲಾವಣೆ ಮಾಡಲಾಗಿದೆ.
ಇದರ ಜೊತೆಗೆ ಹೊಸ ಪಾಸ್‌ಪೋರ್ಟ್, ನವೀಕರಣ, ತತ್ಕಾಲ್ ಸೇವೆ, ಕಳೆದುಹೋದ ಅಥವಾ ಹಾನಿಗೊಳಗಾದ (New rules for children passports) ಪಾಸ್‌ಪೋರ್ಟ್ ಬದಲಾವಣೆ ಸೇರಿದಂತೆ ಹಲವು ಸೇವೆಗಳ ಶುಲ್ಕವನ್ನು ಪರಿಷ್ಕರಿಸಲಾಗಿದೆ.
ಹೊಸ ನಿಯಮಗಳಿಗೆ ಸಂಬಂಧಿಸಿದ ತಿದ್ದುಪಡಿಗಳನ್ನು 2026ರ ಸೆಪ್ಟೆಂಬರ್‌ನಲ್ಲಿ ಭಾರತದ ಗೆಜೆಟ್‌ನಲ್ಲಿ ಪ್ರಕಟಿಸಲಾಗಿದೆ.
ಹೊಸ ನಿಯಮಗಳ ಪ್ರಕಾರ, 15 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ನೀಡಲಾಗುವ ಸಾಮಾನ್ಯ 36 ಪುಟಗಳ ಪಾಸ್‌ಪೋರ್ಟ್ ಇನ್ನು ಮುಂದೆ ನೇರವಾಗಿ 10 ವರ್ಷಗಳವರೆಗೆ
ಮಾನ್ಯವಾಗಿರುವುದಿಲ್ಲ. ಬದಲಾಗಿ, ಪಾಸ್‌ಪೋರ್ಟ್ ನೀಡಿದ ದಿನಾಂಕದಿಂದ ಐದು ವರ್ಷಗಳವರೆಗೆ ಅಥವಾ ಮಗು 18 ವರ್ಷ ತುಂಬುವವರೆಗೆ ಮಾತ್ರ ಅದು ಮಾನ್ಯವಾಗಿರುತ್ತದೆ.
ಈ ಎರಡರಲ್ಲಿ ಯಾವುದು ಮೊದಲು ಸಂಭವಿಸುತ್ತದೆಯೋ ಅದನ್ನೇ ಮಾನ್ಯತಾ ಅವಧಿಯ ಅಂತಿಮ ದಿನವೆಂದು ಪರಿಗಣಿಸಲಾಗುತ್ತದೆ. ಉದಾಹರಣೆಗೆ, 14 ವರ್ಷದ
ಮಗುವಿಗೆ ಪಾಸ್‌ಪೋರ್ಟ್ ನೀಡಿದರೆ, ಐದು ವರ್ಷಗಳ ಅವಧಿ ಪೂರ್ಣಗೊಳ್ಳುವ ಮೊದಲೇ ಮಗು 18 ವರ್ಷಕ್ಕೆ ತಲುಪಬಹುದು.
ಅಂತಹ ಸಂದರ್ಭದಲ್ಲಿ ಮಗುವಿನ 18ನೇ ಹುಟ್ಟುಹಬ್ಬದಂದು ಪಾಸ್‌ಪೋರ್ಟ್‌ನ ಮಾನ್ಯತೆ ಮುಕ್ತಾಯವಾಗುತ್ತದೆ. ಹೀಗಾಗಿ ಮಕ್ಕಳ ಪಾಸ್‌ಪೋರ್ಟ್ ಪಡೆಯುವಾಗ
ಅರ್ಜಿಯ ಸಮಯದಲ್ಲಿನ ವಯಸ್ಸು ಪ್ರಮುಖ ಅಂಶವಾಗಲಿದೆ. ಈ ಬದಲಾವಣೆಯನ್ನು ಪಾಸ್‌ಪೋರ್ಟ್ ನಿಯಮಗಳು, 1980ರ ನಿಯಮ 12(1A)ಕ್ಕೆ ಮಾಡಲಾಗಿದೆ.
ಪಾಸ್‌ಪೋರ್ಟ್ ಸೇವೆಗಳ ಶುಲ್ಕದಲ್ಲೂ ಗಮನಾರ್ಹ ಏರಿಕೆ ಮಾಡಲಾಗಿದೆ. ಸಾಮಾನ್ಯ ಸೇವೆಯಡಿ ಹೊಸದಾಗಿ ಪಡೆಯುವ ಅಥವಾ ನವೀಕರಿಸುವ 36 ಪುಟಗಳ ವಯಸ್ಕರ
ಪಾಸ್‌ಪೋರ್ಟ್‌ಗೆ ಈಗ ₹2,500 ಶುಲ್ಕ ನಿಗದಿಯಾಗಿದೆ. ಈ ಮೊದಲು ಶುಲ್ಕ ₹1,500 ಇತ್ತು. 60 ಪುಟಗಳ ಪಾಸ್‌ಪೋರ್ಟ್ ಶುಲ್ಕ ₹2,000ರಿಂದ ₹3,500ಕ್ಕೆ ಏರಿಕೆಯಾಗಿದೆ.
ತತ್ಕಾಲ್ ಸೇವೆಯಲ್ಲಿಯೂ ಶುಲ್ಕ ಹೆಚ್ಚಿದ್ದು, 36 ಪುಟಗಳ ಪಾಸ್‌ಪೋರ್ಟ್‌ಗೆ ₹5,000 ಹಾಗೂ 60 ಪುಟಗಳ ಪಾಸ್‌ಪೋರ್ಟ್‌ಗೆ ₹6,000 ಪಾವತಿಸಬೇಕಾಗುತ್ತದೆ.
ಇದೇ ರೀತಿ ಪಾಸ್‌ಪೋರ್ಟ್ ಕಳೆದುಹೋದ ಅಥವಾ ಹಾನಿಗೊಳಗಾದ ಸಂದರ್ಭದಲ್ಲಿ ಬದಲಿ ಪಾಸ್‌ಪೋರ್ಟ್ ಪಡೆಯುವ ವೆಚ್ಚವೂ ಹೆಚ್ಚಾಗಿದೆ.
ಪೊಲೀಸ್ ಕ್ಲಿಯರೆನ್ಸ್ ಸರ್ಟಿಫಿಕೇಟ್ ಸೇರಿದಂತೆ ಕೆಲವು ಪಾಸ್‌ಪೋರ್ಟ್ ಸಂಬಂಧಿತ ಸೇವೆಗಳಿಗೂ ಹೊಸ ಶುಲ್ಕ ರಚನೆ ಅನ್ವಯವಾಗಲಿದೆ.
ಮಕ್ಕಳ ಪಾಸ್‌ಪೋರ್ಟ್ ಶುಲ್ಕದಲ್ಲಿಯೂ ಪರಿಷ್ಕರಣೆ ಮಾಡಲಾಗಿದೆ. ಸಾಮಾನ್ಯ ಸೇವೆಯಡಿ ಹೊಸ ಅಥವಾ ನವೀಕರಿಸಿದ 36 ಪುಟಗಳ ಅಪ್ರಾಪ್ತ ವಯಸ್ಕರ ಪಾಸ್‌ಪೋರ್ಟ್‌ಗೆ
ಈಗ ₹1,750 ಶುಲ್ಕ ವಿಧಿಸಲಾಗುತ್ತದೆ. ಈ ಮೊದಲು ₹1,000 ಶುಲ್ಕವಿತ್ತು. ತತ್ಕಾಲ್ ಸೇವೆಯಲ್ಲಿ ಇದೇ ಪಾಸ್‌ಪೋರ್ಟ್‌ಗೆ ₹3,000 ಪಾವತಿಸಬೇಕಾಗುತ್ತದೆ.
ಪಾಸ್‌ಪೋರ್ಟ್ ಕಳೆದುಹೋದರೆ ಅಥವಾ ಹಾನಿಗೊಳಗಾದರೆ ಬದಲಿ ಪಾಸ್‌ಪೋರ್ಟ್ ಪಡೆಯಲು ಇನ್ನಷ್ಟು ಶುಲ್ಕ ಪಾವತಿಸಬೇಕಾಗಬಹುದು. 60 ಪುಟಗಳ ಪಾಸ್‌ಪೋರ್ಟ್‌ಗೆ ತತ್ಕಾಲ್ ಬದಲಿ ಸೇವೆಯ ಶುಲ್ಕ ₹8,500ಕ್ಕೆ ಏರಿಕೆಯಾಗಿದೆ.
ಈ ಮೊದಲು ಇದೇ ಸೇವೆಗೆ ₹5,500 ಶುಲ್ಕವಿತ್ತು. ಅಂದರೆ ಪಾಸ್‌ಪೋರ್ಟ್‌ಗೆ ಸಂಬಂಧಿಸಿದ ವಿವಿಧ ಸೇವೆಗಳನ್ನು ಬಳಸುವವರು ಹೊಸ ಶುಲ್ಕ ರಚನೆಯನ್ನು ಗಮನದಲ್ಲಿಟ್ಟುಕೊಂಡು ಅರ್ಜಿ ಸಲ್ಲಿಸುವುದು ಅಗತ್ಯವಾಗಿದೆ.
ಶುಲ್ಕ ಹೆಚ್ಚಳದ ನಡುವೆಯೂ ಕೆಲವು ವರ್ಗದ ಅರ್ಜಿದಾರರಿಗೆ ರಿಯಾಯಿತಿ ಮುಂದುವರಿಸಲಾಗಿದೆ. ಎಂಟು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳು ಹಾಗೂ 60 ವರ್ಷಕ್ಕಿಂತ ಮೇಲ್ಪಟ್ಟ ಹಿರಿಯ ನಾಗರಿಕರಿಗೆ ಹೊಸ ಪಾಸ್‌ಪೋರ್ಟ್ ಅರ್ಜಿಗಳಲ್ಲಿ 10% ರಿಯಾಯಿತಿ ಲಭ್ಯವಿರುತ್ತದೆ.
ಆದರೆ ಈ ರಿಯಾಯಿತಿ ಮರು ವಿತರಣೆಗಳಿಗೆ ಅನ್ವಯಿಸುವುದಿಲ್ಲ ಎಂದು ತಿಳಿಸಲಾಗಿದೆ. ವಿದೇಶಾಂಗ ಸಚಿವಾಲಯದ ಪರಿಷ್ಕೃತ ನಿಯಮಗಳು ಮಕ್ಕಳ ಪಾಸ್‌ಪೋರ್ಟ್‌ನ ಮಾನ್ಯತೆಯನ್ನು ಅವರ ವಯಸ್ಸಿನೊಂದಿಗೆ ಹೊಂದಿಸುವುದರ ಜೊತೆಗೆ ವಿವಿಧ ಸೇವೆಗಳ ಶುಲ್ಕ ರಚನೆಯನ್ನು ಬದಲಾಯಿಸಿವೆ.
ಹೊಸ ಶುಲ್ಕಗಳು ಜುಲೈ 1ರಿಂದ ಜಾರಿಗೆ ಬಂದಿದ್ದು, ಪರಿಷ್ಕೃತ ನಿಯಮಗಳನ್ನು ಸೆಪ್ಟೆಂಬರ್ 2026ರಲ್ಲಿ ಗೆಜೆಟ್‌ನಲ್ಲಿ ಪ್ರಕಟಿಸಲಾಗಿದೆ. ಆದ್ದರಿಂದ ಮಕ್ಕಳ ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸುವ ಪೋಷಕರು ಮಗುವಿನ ವಯಸ್ಸು, ಅಗತ್ಯ ದಾಖಲೆಗಳು, ಪಾಸ್‌ಪೋರ್ಟ್‌ನ ಮಾನ್ಯತಾ ಅವಧಿ ಮತ್ತು ಅನ್ವಯವಾಗುವ ಶುಲ್ಕವನ್ನು ಮುಂಚಿತವಾಗಿ ಪರಿಶೀಲಿಸುವುದು ಮುಖ್ಯವಾಗಿದೆ.
