ಕೈಯಲ್ಲಿ ಹಿಡಿದು ಫಾಸ್ಟ್ಯಾಗ್ (New rules for FASTag users) ತೋರಿಸುವುದು ಇನ್ಮುಂದೆ ನಡೆಯಲ್ಲ

ವಿಂಡ್‌ಸ್ಕ್ರೀನ್‌ಗೆ ಅಂಟಿಸುವುದು ಕಡ್ಡಾಯ

ವಾಹನ ಸವಾರರಿಗೆ NHAI ಹೊಸ ಮಾರ್ಗಸೂಚಿ

ದೇಶಾದ್ಯಂತ ಟೋಲ್ ಸಂಗ್ರಹ ವ್ಯವಸ್ಥೆಯನ್ನು ಇನ್ನಷ್ಟು ಸುಗಮ ಹಾಗೂ ಪಾರದರ್ಶಕಗೊಳಿಸುವ (New rules for FASTag users) ಉದ್ದೇಶದಿಂದ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಫಾಸ್ಟ್ಯಾಗ್ ಬಳಕೆಗೆ ಸಂಬಂಧಿಸಿದಂತೆ ಹೊಸ ಕಟ್ಟುನಿಟ್ಟಿನ ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದೆ.

ಇತ್ತೀಚಿನ ದಿನಗಳಲ್ಲಿ ಕೆಲವು ವಾಹನ ಸವಾರರು ನಿಯಮಗಳನ್ನು ಉಲ್ಲಂಘಿಸಿ ಫಾಸ್ಟ್ಯಾಗ್ (Fastag) ಅನ್ನು ದುರುಪಯೋಗಪಡಿಸಿಕೊಳ್ಳುತ್ತಿರುವುದು ಗಮನಕ್ಕೆ ಬಂದ ಹಿನ್ನೆಲೆ, ಇದೀಗ ಪ್ರಾಧಿಕಾರ ಕಠಿಣ ಕ್ರಮಕ್ಕೆ ಮುಂದಾಗಿದೆ.

ವಿಶೇಷವಾಗಿ ಫಾಸ್ಟ್ಯಾಗ್ ಅನ್ನು ವಾಹನದ ಗಾಜಿಗೆ ಅಂಟಿಸದೇ ಕೈಯಲ್ಲಿ ಹಿಡಿದು ಸ್ಕ್ಯಾನರ್‌ಗೆ ತೋರಿಸುವ ಕ್ರಮವನ್ನು ಗಂಭೀರ ಉಲ್ಲಂಘನೆ ಎಂದು ಪರಿಗಣಿಸಲಾಗಿದೆ.

ಟೋಲ್ ಪ್ಲಾಜಾಗಳಲ್ಲಿ ಸಂಚಾರ ದಟ್ಟಣೆ ಕಡಿಮೆ ಮಾಡಲು ಮತ್ತು ವಾಹನಗಳು (New rules for FASTag users) ತಡೆರಹಿತವಾಗಿ ಸಂಚರಿಸಲು ಫಾಸ್ಟ್ಯಾಗ್ ವ್ಯವಸ್ಥೆ ಮಹತ್ವದ ಪಾತ್ರ ವಹಿಸುತ್ತದೆ.

ಆದರೆ ಕೆಲವು ವಾಹನ ಚಾಲಕರು ನಿಯಮಬಾಹಿರವಾಗಿ ಟ್ಯಾಗ್ ಅನ್ನು ಕೈಯಲ್ಲಿ ಹಿಡಿದು ಬಳಸುತ್ತಿರುವುದರಿಂದ RFID ಸ್ಕ್ಯಾನಿಂಗ್ ಪ್ರಕ್ರಿಯೆಯಲ್ಲಿ ತೊಂದರೆ ಉಂಟಾಗುತ್ತಿದೆ.

ಇದರಿಂದ ಟೋಲ್ ಪ್ಲಾಜಾಗಳಲ್ಲಿ ಅನಗತ್ಯ ವಿಳಂಬವಾಗುವುದಲ್ಲದೆ, ವ್ಯವಸ್ಥೆಯ ವಿಶ್ವಾಸಾರ್ಹತೆಗೂ ಧಕ್ಕೆಯಾಗುತ್ತಿದೆ ಎಂದು NHAI ತಿಳಿಸಿದೆ. ಈ ರೀತಿಯ ವರ್ತನೆ ಕಂಡುಬಂದರೆ ಸಂಬಂಧಿತ ಫಾಸ್ಟ್ಯಾಗ್ ಅನ್ನು ತಕ್ಷಣವೇ ಬ್ಲಾಕ್‌ಲಿಸ್ಟ್ ಮಾಡುವ ಎಚ್ಚರಿಕೆಯನ್ನು ಕೂಡ ನೀಡಲಾಗಿದೆ.

ಪ್ರಾಧಿಕಾರದ ಹೊಸ ನಿಯಮಗಳ ಪ್ರಕಾರ, ಪ್ರತಿಯೊಂದು ಫಾಸ್ಟ್ಯಾಗ್ ಕೂಡ ವಾಹನದ ಮುಂಭಾಗದ ವಿಂಡ್‌ಸ್ಕ್ರೀನ್ (Windscreen) ಮೇಲೆ ಸರಿಯಾಗಿ ಅಂಟಿಸಿರಬೇಕು. ಗಾಜಿನ ಮೇಲೆಯೇ ಟ್ಯಾಗ್ ಸ್ಥಿರವಾಗಿದ್ದರೆ RFID ರೀಡರ್‌ಗಳು ಸುಲಭವಾಗಿ ಸ್ಕ್ಯಾನ್ ಮಾಡಬಲ್ಲವು.

ಇದರಿಂದ ವಾಹನಗಳು ಟೋಲ್ ಬಳಿ ನಿಲ್ಲದೆ ವೇಗವಾಗಿ ಸಾಗಲು ಅನುಕೂಲವಾಗುತ್ತದೆ. ಅಲ್ಲದೆ, ಒಂದೇ ಫಾಸ್ಟ್ಯಾಗ್ ಅನ್ನು ಹಲವು ವಾಹನಗಳಿಗೆ ಬಳಸುವ ವಂಚನೆಗೂ ತಡೆ ಬೀಳುತ್ತದೆ. ಇಂತಹ ಅಕ್ರಮಗಳನ್ನು ನಿಯಂತ್ರಿಸಲು ಈ ಕ್ರಮ ಅಗತ್ಯವಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ಇದರ ಜೊತೆಗೆ, ಫಾಸ್ಟ್ಯಾಗ್ ಸೇವೆಗಳ ಹೆಸರಿನಲ್ಲಿ ಸಕ್ರಿಯವಾಗಿರುವ ನಕಲಿ ವೆಬ್‌ಸೈಟ್‌ಗಳು ಹಾಗೂ ಮೋಸದ ಲಿಂಕ್‌ಗಳ ಬಗ್ಗೆ ಸಹ NHAI ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಿದೆ.

ಕೆಲವರು ವಾರ್ಷಿಕ ಪಾಸ್‌, ರೀಚಾರ್ಜ್ ಹಾಗೂ ಅಪ್‌ಡೇಟ್ ಸೇವೆಗಳ ಹೆಸರಿನಲ್ಲಿ ನಕಲಿ ತಾಣಗಳನ್ನು ಸೃಷ್ಟಿಸಿ ಜನರ ಬ್ಯಾಂಕಿಂಗ್ ಮಾಹಿತಿಯನ್ನು ಕಳವು ಮಾಡಲು ಯತ್ನಿಸುತ್ತಿದ್ದಾರೆ. ಹೀಗಾಗಿ ಯಾವುದೇ ‘ಸ್ಪಾನ್ಸರ್ಡ್’ ಅಥವಾ ಅನುಮಾನಾಸ್ಪದ ಲಿಂಕ್‌ಗಳ ಮೇಲೆ ಕ್ಲಿಕ್ ಮಾಡಬಾರದು ಎಂದು ಮನವಿ ಮಾಡಲಾಗಿದೆ.

ಫಾಸ್ಟ್ಯಾಗ್ ಸಂಬಂಧಿತ ಸೇವೆಗಳಿಗೆ ಕೇವಲ ಅಧಿಕೃತ ‘ರಾಜಮಾರ್ಗಯಾತ್ರಾ’ (Rajmargyatra) ಆ್ಯಪ್‌ನ್ನು ಮಾತ್ರ ಬಳಸುವಂತೆ ಸೂಚಿಸಲಾಗಿದೆ.

ಇನ್ನೊಂದೆಡೆ, ದೇಶಾದ್ಯಂತ ಶೀಘ್ರದಲ್ಲೇ ಬ್ಯಾರಿಯರ್‌ರಹಿತ ಟೋಲ್ ವ್ಯವಸ್ಥೆಯನ್ನು ಜಾರಿಗೆ ತರಲು ಕೇಂದ್ರ ಸರ್ಕಾರ ಸಿದ್ಧತೆ ನಡೆಸಿದೆ. ಈ ವ್ಯವಸ್ಥೆಯಲ್ಲಿ ವಾಹನಗಳು ಟೋಲ್ ಪ್ಲಾಜಾಗಳಲ್ಲಿ ನಿಲ್ಲದೇ ನೇರವಾಗಿ ಸಂಚರಿಸಲಿದ್ದು, ಫಾಸ್ಟ್ಯಾಗ್ ಸ್ಕ್ಯಾನಿಂಗ್ ಸಂಪೂರ್ಣವಾಗಿ ಸ್ವಯಂಚಾಲಿತವಾಗಿರುತ್ತದೆ.

ಆದ್ದರಿಂದ ಪ್ರತಿಯೊಂದು ವಾಹನದಲ್ಲೂ ಫಾಸ್ಟ್ಯಾಗ್ ಸರಿಯಾಗಿ ಅಳವಡಿಸಿರುವುದು ಅತ್ಯಂತ ಮುಖ್ಯವಾಗಿದೆ. ವಾಹನ ಸವಾರರು ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿದರೆ ಮಾತ್ರ ಸುಗಮ ಸಂಚಾರ ಮತ್ತು ಡಿಜಿಟಲ್ ಟೋಲ್ ವ್ಯವಸ್ಥೆಯ ಯಶಸ್ಸು ಸಾಧ್ಯವಾಗಲಿದೆ ಎಂದು NHAI ತಿಳಿಸಿದೆ.