ಬಿಡದಿ ನಕಲಿ ಔಷಧ ಪ್ರಕರಣದ ಬೆನ್ನಲ್ಲೇ (PHANA verify medicines) ಆಸ್ಪತ್ರೆಗಳಿಗೆ ಕಟ್ಟುನಿಟ್ಟಿನ ಸೂಚನೆ
ಬ್ಯಾಚ್ ನಂಬರ್‌ನಿಂದ ಎಕ್ಸ್‌ಪೈರಿ ದಿನಾಂಕದವರೆಗೆ ಎಲ್ಲವನ್ನೂ ಪರಿಶೀಲಿಸುವಂತೆ ಆದೇಶ
ಸ್ಟಾಕ್‌ನಲ್ಲಿರುವ ಔಷಧಗಳ ಬ್ಯಾಚ್ ನಂಬರ್ ಪರಿಶೀಲನೆಗೆ ಸೂಚನೆ; ಅನುಮಾನಾಸ್ಪದ ಔಷಧ ಕಂಡರೆ ಅಧಿಕಾರಿಗಳಿಗೆ ಮಾಹಿತಿ ನೀಡುವಂತೆ PHANA ಸೂಚನೆ
Bengaluru : ಬೆಂಗಳೂರಿನ ಸಮೀಪ ಬಿಡದಿ ಬಳಿ ನಕಲಿ ಔಷಧ ಜಾಲ ಪತ್ತೆಯಾದ (PHANA verify medicines) ಬೆನ್ನಲ್ಲೇ ಖಾಸಗಿ ಆಸ್ಪತ್ರೆಗಳ ಒಕ್ಕೂಟ PHANA (Private Hospitals and Nursing Homes Association) ಎಚ್ಚೆತ್ತುಕೊಂಡಿದೆ.
ರೋಗಿಗಳ ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡಿರುವ ಒಕ್ಕೂಟ, ತನ್ನ ವ್ಯಾಪ್ತಿಯ ಸುಮಾರು 4,500 ಖಾಸಗಿ ಆಸ್ಪತ್ರೆಗಳಿಗೆ ಔಷಧಗಳ ಖರೀದಿ, ಸಂಗ್ರಹಣೆ ಮತ್ತು ಬಳಕೆಯಲ್ಲಿ ಕಟ್ಟುನಿಟ್ಟಿನ ಮುನ್ನೆಚ್ಚರಿಕೆ ವಹಿಸುವಂತೆ ಮಾರ್ಗಸೂಚಿ ನೀಡಿದೆ.
ಆಸ್ಪತ್ರೆಗಳ ಮೆಡಿಸಿನ್ ಸ್ಟೋರ್, ಫಾರ್ಮಸಿ, ಖರೀದಿ ವಿಭಾಗ ಹಾಗೂ ಕ್ಲಿನಿಕಲ್ ವಿಭಾಗಗಳಲ್ಲಿ (PHANA verify medicines) ಔಷಧಗಳ ಪರಿಶೀಲನೆ ಮತ್ತು ದಾಖಲೆ ನಿರ್ವಹಣೆಯನ್ನು ಮತ್ತಷ್ಟು ಬಿಗಿಗೊಳಿಸುವಂತೆ ಸೂಚಿಸಲಾಗಿದೆ.
ನಕಲಿ ಔಷಧ ಪ್ರಕರಣದಲ್ಲಿ ಜಪ್ತಿಯಾಗಿರುವ ಔಷಧಗಳ ಬ್ಯಾಚ್ ನಂಬರ್‌ಗಳನ್ನು ಆಸ್ಪತ್ರೆಗಳಲ್ಲಿ ಈಗಾಗಲೇ ಇರುವ ಔಷಧ ಸ್ಟಾಕ್‌ನೊಂದಿಗೆ ಹೋಲಿಕೆ ಮಾಡುವಂತೆ PHANA ತಿಳಿಸಿದೆ.
ಆಸ್ಪತ್ರೆಗಳಲ್ಲಿ ಸಂಗ್ರಹಿಸಿರುವ ಪ್ರತಿಯೊಂದು ಔಷಧದ ಹೆಸರು, ಬ್ರ್ಯಾಂಡ್, ಬ್ಯಾಚ್ ನಂಬರ್, ತಯಾರಿಕಾ ದಿನಾಂಕ ಹಾಗೂ ಅವಧಿ ಮುಕ್ತಾಯ ದಿನಾಂಕವನ್ನು ಪರಿಶೀಲಿಸಬೇಕು.
ಪ್ಯಾಕೆಟ್, ಲೇಬಲ್ ಅಥವಾ ವಯಲ್‌ನಲ್ಲಿ ಯಾವುದೇ ಅನುಮಾನಾಸ್ಪದ ಬದಲಾವಣೆ ಕಂಡುಬಂದರೆ ಅಂತಹ ಔಷಧವನ್ನು ಯಾವುದೇ ಕಾರಣಕ್ಕೂ ರೋಗಿಗಳಿಗೆ ನೀಡಬಾರದು.
ಅನುಮಾನ ಮೂಡಿಸುವ ಔಷಧಗಳನ್ನು ಇತರ ಸ್ಟಾಕ್‌ನಿಂದ ಪ್ರತ್ಯೇಕವಾಗಿ ಇರಿಸಿ, ಸಂಬಂಧಪಟ್ಟ ಅಧಿಕಾರಿಗಳಿಗೆ ತಕ್ಷಣ ಮಾಹಿತಿ ನೀಡುವಂತೆ ಸೂಚಿಸಲಾಗಿದೆ.
ಮುಂದಿನ ದಿನಗಳಲ್ಲಿ ಔಷಧ ಖರೀದಿಸುವಾಗಲೂ ಆಸ್ಪತ್ರೆಗಳು ಹೆಚ್ಚಿನ ಎಚ್ಚರಿಕೆ ವಹಿಸಬೇಕು ಎಂದು PHANA ಸ್ಪಷ್ಟಪಡಿಸಿದೆ. ಕೇವಲ ಪರವಾನಗಿ ಹೊಂದಿರುವ
ಅಧಿಕೃತ ತಯಾರಕರು, ಮಾನ್ಯತೆ ಪಡೆದ ಡಿಸ್ಟ್ರಿಬ್ಯೂಟರ್‌ಗಳು ಹಾಗೂ ವಿಶ್ವಾಸಾರ್ಹ ಸರಬರಾಜುದಾರರಿಂದ ಮಾತ್ರ ಔಷಧಗಳನ್ನು ಖರೀದಿಸಬೇಕು.
ಆಸ್ಪತ್ರೆಗಳಿಗೆ ಔಷಧ ಸರಬರಾಜಾದ ತಕ್ಷಣ ಅದರ ಪ್ಯಾಕೇಜಿಂಗ್, ಲೇಬಲ್, ಬ್ರ್ಯಾಂಡ್, ಬ್ಯಾಚ್ ನಂಬರ್, ತಯಾರಿಕಾ ದಿನಾಂಕ ಮತ್ತು ಎಕ್ಸ್‌ಪೈರಿ ದಿನಾಂಕವನ್ನು ಪರಿಶೀಲಿಸಬೇಕು.
ಔಷಧದ ಗುಣಮಟ್ಟ ಅಥವಾ ಪ್ಯಾಕಿಂಗ್ ಕುರಿತು ಅನುಮಾನ ಕಂಡುಬಂದರೆ ಅದನ್ನು ಬಳಕೆ ಮಾಡದೆ ಪ್ರತ್ಯೇಕವಾಗಿ ಸಂಗ್ರಹಿಸಬೇಕು ಎಂದು ಮಾರ್ಗಸೂಚಿಯಲ್ಲಿ ತಿಳಿಸಲಾಗಿದೆ.
ಔಷಧಗಳ ಖರೀದಿ ಮತ್ತು ಬಳಕೆಯ ಸಂಪೂರ್ಣ ದಾಖಲೆಗಳನ್ನು ನಿರ್ವಹಿಸುವುದಕ್ಕೂ ಒಕ್ಕೂಟ ಒತ್ತು ನೀಡಿದೆ. ಪ್ರತಿಯೊಂದು ಔಷಧ ಖರೀದಿಯ ಇನ್ವಾಯ್ಸ್‌ಗಳನ್ನು ಕಡ್ಡಾಯವಾಗಿ ಸಂರಕ್ಷಿಸುವುದರ ಜೊತೆಗೆ ಬ್ಯಾಚ್‌ವಾರು ಸ್ಟಾಕ್ ದಾಖಲೆಗಳನ್ನು ನಿರ್ವಹಿಸಬೇಕು.
ಯಾವ ಔಷಧವನ್ನು ಯಾವ ಸಂಸ್ಥೆಯಿಂದ ಖರೀದಿಸಲಾಗಿದೆ, ಯಾವ ಬ್ಯಾಚ್ ಆಸ್ಪತ್ರೆಗೆ ಬಂದಿದೆ ಮತ್ತು ಅದು ಯಾವ ವಿಭಾಗದಲ್ಲಿ ಅಥವಾ ಯಾವ ರೋಗಿಗಳ ಚಿಕಿತ್ಸೆಗೆ ಬಳಕೆಯಾಗಿದೆ ಎಂಬುದನ್ನು ಪತ್ತೆಹಚ್ಚಲು ಸಾಧ್ಯವಾಗುವ ರೀತಿಯಲ್ಲಿ ದಾಖಲೆ ಇರಬೇಕು.
ಇದರಿಂದ ಅನುಮಾನಾಸ್ಪದ ಔಷಧ ಪತ್ತೆಯಾದ ಸಂದರ್ಭದಲ್ಲಿ ಅದರ ಮೂಲದಿಂದ ಬಳಕೆಯವರೆಗಿನ ಮಾಹಿತಿಯನ್ನು ತ್ವರಿತವಾಗಿ ಪರಿಶೀಲಿಸಲು ಸಾಧ್ಯವಾಗಲಿದೆ.
ಅನುಮಾನಾಸ್ಪದ ಔಷಧ ಪತ್ತೆಯಾದರೆ ಅದನ್ನು ಬಳಸದೆ ತಕ್ಷಣ ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಬೇಕು ಎಂದು PHANA ಅಧ್ಯಕ್ಷೆ ಶೋಭಾ ಪ್ರಕಾಶ್ (Shobha Prakash) ಅವರ ನೇತೃತ್ವದ ಒಕ್ಕೂಟ ಆಸ್ಪತ್ರೆಗಳಿಗೆ ಸೂಚಿಸಿದೆ.
ಪ್ರಕರಣಕ್ಕೆ ಸಂಬಂಧಿಸಿದ ಖಾಲಿ ವಯಲ್ಸ್, ಔಷಧ ಲೇಬಲ್‌ಗಳು, ಇನ್ವಾಯ್ಸ್‌ಗಳು ಹಾಗೂ ಇತರ ದಾಖಲೆಗಳನ್ನು ಸುರಕ್ಷಿತವಾಗಿ ಸಂರಕ್ಷಿಸುವಂತೆಯೂ ತಿಳಿಸಲಾಗಿದೆ.
ಬಿಡದಿ ಬಳಿ ಪತ್ತೆಯಾಗಿರುವ ನಕಲಿ ಔಷಧ ಜಾಲದ ತನಿಖೆ ಮುಂದುವರಿದಿರುವ ಹಿನ್ನೆಲೆಯಲ್ಲಿ ಖಾಸಗಿ ಆಸ್ಪತ್ರೆಗಳಲ್ಲಿ ಮುನ್ನೆಚ್ಚರಿಕೆ ಕ್ರಮಗಳನ್ನು ಬಿಗಿಗೊಳಿಸಲಾಗಿದೆ.
ರೋಗಿಗಳ ಜೀವ ಮತ್ತು ಆರೋಗ್ಯದ ವಿಚಾರದಲ್ಲಿ ಯಾವುದೇ ನಿರ್ಲಕ್ಷ್ಯಕ್ಕೆ ಅವಕಾಶ ನೀಡಬಾರದು ಎಂಬ ಉದ್ದೇಶದಿಂದ ಔಷಧ ಖರೀದಿ, ಸಂಗ್ರಹಣೆ ಮತ್ತು ಬಳಕೆಯ ಪ್ರತಿಯೊಂದು ಹಂತದಲ್ಲೂ ಎಚ್ಚರಿಕೆ ವಹಿಸುವಂತೆ PHANA ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
ಇದನ್ನು ಓದಿ : https://vijayatimes.com/economic-d-day-declared-america/
