ನವದೆಹಲಿ, ಮಾ. 12: ಅಮೆರಿಕ, ಭಾರತ, ಜಪಾನ್ ಮತ್ತು ಆಸ್ಟ್ರೇಲಿಯಾ ದೇಶಗಳ ಕ್ವಾಡ್ ಸಭೆ ಇಂದು ನಡೆಯಲಿದ್ದು, ಭಾರತದ ಪ್ರಧಾನಿ ನರೇಂದ್ರ ಮೋದಿ, ಅಮೆರಿಕದ ಅಧ್ಯಕ್ಷ ಜೋ ಬೈಡನ್, ಜಪಾನ್ ಪ್ರಧಾನಮಂತ್ರಿ ಯೋಶಿಹಿಡೆ ಸುಗಾ ಹಾಗೂ ಆಸ್ಟ್ರೇಲಿಯಾ ಪ್ರಧಾನ ಮಂತ್ರಿ ಸ್ಕಾಟ್ ಮಾರಿಸನ್ ಅವರು ಈ ಸಭೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ. 14 ವರ್ಷಗಳ ಹಿಂದೆ ಅಸ್ತಿತ್ವಕ್ಕೆ ಬಂದ ಕ್ವಾಡ್ ಕೂಟದಲ್ಲಿ ಇದೇ ಮೊದಲ ಬಾರಿಗೆ ಆನ್ಲೈನ್ ಮೂಲಕ ಸಭೆ ನಡೆಯುತ್ತಿದ್ದು, ನಾಲ್ಕು ದೇಶಗಳ ಮುಖ್ಯಸ್ಥರು ಈ ಸಭೆಯಲ್ಲಿ ಪಾಲ್ಗೊಳ್ಳುತ್ತಿರುವುದೂ ಇದೇ ಮೊದಲು.
ಕೊರೋನಾ ಲಸಿಕೆ ಉತ್ಪಾದನೆ ಮತ್ತು ವಿತರಣೆ, ಭದ್ರತಾ ಪರಿಸ್ಥಿತಿ, ಆರ್ಥಿಕ ಸಹಕಾರ ಇತ್ಯಾದಿ ಕೆಲ ಪ್ರಮುಖ ವಿಚಾರಗಳು ಈ ಸಭೆಯಲ್ಲಿ ಚರ್ಚೆಯಾಗುವ ಸಾಧ್ಯತೆ ಇದೆ. ಎಲೆಕ್ಟ್ರಿಕ್ ಕಾರುಗಳ ಮೋಟಾರ್ಗಳ ಉತ್ಪಾದನೆಗೆ ಅಗತ್ಯವಾಗಿರುವ ಅಪರೂಪದ ಭೂ ಲೋಹ (Rare Earth Metals – ಸ್ಕಾಂಡಿಯಮ್, ವೈಟ್ರಿಯಮ್, ಸೆರಿಯಮ್ ಇತ್ಯಾದಿ ಲೋಹ) ಗಳನ್ನ ಪಡೆದುಕೊಳ್ಳುವ ಬಗ್ಗೆ ನಾಲ್ಕು ದೇಶಗಳು ಈ ಸಭೆಯಲ್ಲಿ ಚರ್ಚೆ ಮಾಡುವ ನಿರೀಕ್ಷೆಯೂ ಇದೆ.
“ಈ ಸಭೆಯಲ್ಲಿ ಲಸಿಕೆ ಬಗ್ಗೆ ಏನಾದರೂ ನಿರ್ಧಾರ ಹೊರಬರಬಹುದು ಎಂದು ನಿರೀಕ್ಷಿಸಿದ್ದೇನೆ. ಲಸಿಕೆಗಳು ಎಲ್ಲರಿಗೂ ಸಿಗುವಂಥ ವಾತಾವರಣ ನಿರ್ಮಿಸಲು ನಾವು ಪ್ರಮುಖ ಪಾತ್ರ ವಹಿಸಬೇಕು ಎಂಬ ಉದ್ದೇಶದಿಂದ ತಿಂಗಳುಗಟ್ಟಲೆ ಕೆಲಸ ಮಾಡುತ್ತಿದ್ದೇವೆ” ಎಂದು ಅಮೆರಿಕದ ವಿದೇಶಾಂಗ ಸಚಿವ (ಯುಎಸ್ ಸೆಕ್ರೆಟರಿ ಆಫ್ ಸ್ಟೇಟ್) ಟೋನಿ ಬ್ಲಿಂಕೆನ್ ಹೇಳಿದ್ದಾರೆ.
ಭಾರತದಲ್ಲಿ ಲಸಿಕೆ ಉತ್ಪಾದನೆಗೆ ಗಮನ:
ಲಸಿಕೆ ಉತ್ಪಾದನೆಯಲ್ಲಿ ಭಾರತ ವಿಶ್ವದಲ್ಲೇ ಅಗ್ರಮಾನ್ಯ ದೇಶವಾಗಿದೆ. ಈಗ ಕೊರೋನಾ ವೈರಸ್ ಲಸಿಕೆ ತುರ್ತಾಗಿ ಜಾಗತಿಕ ದೇಶಗಳಿಗೆ ಬೇಕಾಗಿರುವುದರಿಂದ ಭಾರತದಲ್ಲಿ ಲಸಿಕೆ ಉತ್ಪಾದನೆ ಸಾಮರ್ಥ್ಯವನ್ನು ಇನ್ನಷ್ಟು ಹೆಚ್ಚಿಸಲು ಹಣಕಾಸು ವ್ಯವಸ್ಥೆ ಒದಗಿಸುವ ಬಗ್ಗೆ ಕ್ವಾಡ್ ರಾಷ್ಟ್ರಗಳ ಸಭೆಯಲ್ಲಿ ಒಂದು ನಿರ್ಧಾರ ಬರಬಹುದು ಎಂದು ಅಮೆರಿಕದ ಉನ್ನತಾಧಿಕಾರಿಯೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ. ಇವರ ಪ್ರಕಾರ, ಅಮೆರಿಕದಲ್ಲಿ ಅಭಿವೃದ್ಧಿಯಾದ ಲಸಿಕೆಯನ್ನ ಭಾರತದಲ್ಲಿ ಉತ್ಪಾದನೆ ಮಾಡುವ ವ್ಯವಸ್ಥೆಗೆ ಈ ಸಭೆಯಲ್ಲಿ ಒಪ್ಪಿಗೆ ಸಿಗುವ ನಿರೀಕ್ಷೆ ಇದೆ. ಅಮೆರಿಕದ ಜಾನ್ಸನ್ ಅಂಡ್ ಜಾನ್ಸನ್ ಸಂಸ್ಥೆಯ ಕೋವಿಡ್ ಲಸಿಕೆಯನ್ನ ಭಾರತದಲ್ಲಿ ಉತ್ಪಾದನೆಯಾಗಬಹುದು. ಇನ್ನು, ಈ ಕ್ವಾಡ್ ಸಭೆ ಬಗ್ಗೆ ಪ್ರತಿಕ್ರಿಯಿಸಿರುವ ಚೀನಾ, ಪ್ರಾದೇಶಿಕವಾಗಿ ಶಾಂತಿ ನೆಲಸಲು ಈ ಸಭೆ ಪೂರಕವಾಗಿದ್ದರೆ ಒಳಿತು ಎಂದು ಆಶಿಸಿದೆ.
ಏನಿದು ಕ್ವಾಡ್ ಸಭೆ?
ಕ್ವಾಡ್ ಒಕ್ಕೂಟ ಅಸ್ತಿತ್ವಕ್ಕೆ ಬಂದಿದ್ದು 2007ರಲ್ಲಿ ಜಪಾನ್ ದೇಶದ ಅಂದಿನ ಪ್ರಧಾನಿ ಶಿಂಜೋ ಆಬೆ ಅವರಿಂದ ಸ್ಥಾಪನೆಯಾದ ಒಕ್ಕೂಟ ಇದು. ಹೆಚ್ಚುತ್ತಿರುವ ಚೀನಾದ ಪ್ರಭಾವಳಿಯನ್ನು ಎದುರಿಸುವ ಉದ್ದೇಶದಿಂದ ಕ್ವಾಡ್ ರಾಷ್ಟ್ರಗಳ ಗುಂಪನ್ನ ರಚಿಸಲಾಯಿತು. ಕ್ವಾಡ್ ಎಂದರೆ ನಾಲ್ಕು ಎಂದರ್ಥ. ನಾಲ್ಕು ದೇಶಗಳ ಗುಂಪು ಇದು. ಇದರಲ್ಲಿ ಅಮೆರಿಕ, ಭಾರತ, ಜಪಾನ್ ಮತ್ತು ಆಸ್ಟ್ರೇಲಿಯಾ ದೇಶಗಳಿವೆ. 2007ರಲ್ಲಿ ಸ್ಥಾಪನೆಯಾದ ಈ ಗುಂಪು ಒಂದೇ ವರ್ಷದಲ್ಲಿ ಬಹುತೇಕ ನಿರ್ಜೀವವಾಗಿತ್ತು. ಚೀನಾ ವಿರುದ್ಧ ಯಾವುದೇ ತಂತ್ರದಲ್ಲಿ ತಾನು ಭಾಗಿಯಾಗುವುದಿಲ್ಲ ಎಂದು 2008ರಲ್ಲಿ ಭಾರತದ ಪ್ರಧಾನಿ ಸ್ಪಷ್ಟಪಡಿಸಿದರು. ಆಸ್ಟ್ರೇಲಿಯಾ ಕೂಡ ಈ ಗುಂಪಿನಿಂದ ಹೊರಬಿದ್ದಿತು. ಆದರೆ, 2017ರಲ್ಲಿ ಡೊನಾಲ್ಡ್ ಟ್ರಂಪ್ ಮತ್ತು ನರೇಂದ್ರ ಮೋದಿ ಅವರ ಪ್ರಯತ್ನದಿಂದಾಗಿ ಈ ಕ್ವಾಡ್ ಕೂಟಕ್ಕೆ ಮರುಚೈತನ್ಯ ಸಿಕ್ಕಿದೆ. ಅಮೆರಿಕದ ನೂತನ ಅಧ್ಯಕ್ಷ ಜೋ ಬೈಡೆನ್ ಕೂಡ ಈ ಕ್ವಾಡ್ ಬಗ್ಗೆ ಮುತುವರ್ಜಿ ತೋರಿದ್ದಾರೆ.