ಬೆಂಗಳೂರು ನ 23 : ಮಳೆಯಿಂದಾಗಿ ಪೂರ್ಣ ಪ್ರಮಾಣದಲ್ಲಿ ಮನೆ ಬಿದ್ದರೆ 5 ಲಕ್ಷ ರೂ. ಹಾಗೂ ಸಣ್ಣ ಪ್ರಮಾಣದಲ್ಲಿ ಹಾನಿಯಾದರೆ 1 ಲಕ್ಷ ರೂ. ಪರಿಹಾರ ನೀಡಲಾಗುವುದು ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ತಿಳಿಸಿದ್ದಾರೆ.

ಯಲಹಂಕದ ವಿವಿಧ ಭಾಗಗಳಲ್ಲಿ ಮಳೆಯಿಂದಾದ ನಷ್ಟ ಪರಿಶೀಲನೆ ನಡೆಸಿದರು. ಬಳಿಕ ಮಾತನಾಡಿದ ಅವರು, ಸುಮಾರು 10 ಕಿ.ಮೀ ಮುಖ್ಯರಸ್ತೆ, 20 ಕಿ.ಮೀ ಅಡ್ಡ ರಸ್ತೆಗಳು ಹಾಳಾಗಿವೆ. ಎನ್​ಜಿಟಿ ಆದೇಶದಂತೆ ಹಲವಾರು ಅಪಾರ್ಟ್​ಮೆಂಟ್​​ಗಳು ಬಫರ್ ಝೋನ್​ನಲ್ಲಿರುವುದರಿಂದ ಏನು ಸಮಸ್ಯೆ ಇಲ್ಲ. ಈ ಹಿಂದೆ ರಾಜಕಾಲುವೆ ಮೇಲೆ ಮನೆ ಕಟ್ಟೋಕೆ ಅವಕಾಶ ಕೊಟ್ಟಿರುವುದೇ ಈ ರೀತಿ ಅವಾಂತರಕ್ಕೆ‌ ಕಾರಣ ಎಂದರು.

ಧಾರಾಕಾರ ಮಳೆಗೆ ಯಲಹಂಕ ಸಮೀಪದ ಸುಮಾರು 300 ಎಕರೆ ವಿಸ್ತೀರ್ಣವಿರುವ ಅಮ್ಮಾನಿ ಕೆರೆ ಕಟ್ಟೆ ಒಡೆದು ಕೋಗಿಲು ಕ್ರಾಸ್ ಬಳಿಯಿರುವ ಕೇಂದ್ರೀಯ ವಿಹಾರ ಅಪಾರ್ಟ್​ಮೆಂಟ್​​ ಸಂಪೂರ್ಣ ಜಲಾವೃತಗೊಂಡಿದೆ. ಅಪಾರ್ಟ್​ಮೆಂಟ್​ನ ಬೆಸ್ಮೆಂಟ್​ ಬೀಚ್​ನಂತಾಗಿದ್ದು, ವಾಹನಗಳ ಇಂಜಿನ್​ ಕೆಟ್ಟು ಹೋಗುವ ಭೀತಿ ಎದುರಾಗಿದೆ. ಸುಮಾರು 3 ಸಾವಿರಕ್ಕೂ ಅಧಿಕ ಮಂದಿ ವಾಸವಿರುವ ಕೇಂದ್ರೀಯ ವಿಹಾರದಲ್ಲಿ 4 ರಿಂದ 5 ಅಡಿ ನೀರು ನಿಂತಿದ್ದು, ವಿದ್ಯುತ್ ಕಡಿತಗೊಳಿಸಿ ಬೋಟ್ ಮೂಲಕ ಜನರನ್ನು ರಕ್ಷಣೆ ಮಾಡಲಾಗಿದೆ.