ಬೆಂಗಳೂರು, ಜ. 05: ಕೊರೋನಾದಿಂದಾಗಿ ತತ್ತರಿಸಿ ಹೋಗಿದ್ದ, ಜನರು ಬೆಲೆ ಏರಿಕೆಯಿಂದಾಗಿ ಗಾಯದ ಮೇಲೆ ಬರೆ ಎಳೆದಂತಾಗಿತ್ತು. ಅದರ ಬೆನ್ನಲ್ಲೆ ಇನ್ನೊಂದು ಶಾಕಿಂಗ್‌ ನ್ಯೂಸ್‌ ರಾಜ್ಯದ ಜನತೆಗೆ ನೀಡಲು ಮುಂದಾಗಿದೆ. ಅದೇನೆಂದರೆ ವಿದ್ಯುತ್ ದರದ ಬಿಸಿ,  ವಿದ್ಯುತ್‌ ದರವು ಹೆಚ್ಚಳವಾಗುವ ಸಾಧ್ಯತೆ ಇದೆ.

ಇಂಧನ ಕ್ಷೇತ್ರ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿರುವ ಹಿನ್ನೆಲೆಯಲ್ಲಿ ವಿದ್ಯುತ್ ದರ ಏರಿಕೆ ಮಾಡಲು ಬೆಸ್ಕಾಂ, ಮೆಸ್ಕಾಂ ಮೊದಲಾದ ಎಸ್ಕಾಂಗಳಿಂದ ಕೆ.ಇ.ಆರ್.ಸಿ.ಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂಬುದಾಗಿ ಮೂಲಗಳಿಂದ ತಿಳಿದು ಬಂದಿದೆ.

ಕಳೆದ ನವಂಬರ್‌ನಲ್ಲಿ ಪ್ರತಿ ಯೂನಿಟ್‌ಗೆ 33 ಪೈಸೆ ವಿದ್ಯುತ್ ದರ ಹೆಚ್ಚಳಕ್ಕೆ ಕೆ.ಇ.ಆರ್.ಸಿ. ಅನುಮತಿ ನೀಡಿತ್ತು. ಆದರಿದೀಗ ಮತ್ತೆ ಯೂನಿಟ್‌ಗೆ 1.39 ರೂಪಾಯಿ ಹೆಚ್ಚಳ ಮಾಡುವಂತೆ ವಿದ್ಯುತ್ ಸರಬರಾಜು ಸಂಸ್ಥೆಗಳು ಪ್ರಸ್ತಾವನೆ ಸಲ್ಲಿಸಲು ಮುಂದಾಗಿವೆ.

ನವೆಂಬರ್‌ನಲ್ಲಿ ಏರಿಕೆ ಮಾಡಲಾಗಿದ್ದ, ವಿದ್ಯುತ್ ದರ 5 ತಿಂಗಳಿಗೆ ಸೀಮಿತವಾಗಿದ್ದು ವಿದ್ಯುತ್ ಖರೀದಿ ವೆಚ್ಚ ಹೆಚ್ಚಾಗುತ್ತಿರುವುದರಿಂದ ಮತ್ತು ನಿರ್ವಹಣೆ, ಕಾರ್ಯ, ಬಂಡವಾಳ ವೆಚ್ಚದ ಸಾಲ ಹೆಚ್ಚಾದ ಕಾರಣ ಪ್ರತಿ ಯೂನಿಟ್‌ಗೆ 1.39 ರೂಪಾಯಿ ಹೆಚ್ಚಳ ಮಾಡಲು ಮನವಿ ಮಾಡಲಾಗಿದೆ. 5 ಎಸ್ಕಾಂಗಳಿಗೆ 5872 ಕೋಟಿ ರೂಪಾಯಿ ಹೊರೆಯಾಗುತ್ತಿದ್ದು, ವಿದ್ಯುತ್ ದರ ಏರಿಕೆ ಮೂಲಕ ಇದನ್ನು ಭರಿಸಲು ಚಿಂತನೆ ನಡೆದಿದೆ ಎಂದು ಹೇಳಲಾಗಿದೆ.