Mumbai: ಬಹಳ ದಿನಗಳ ಬಳಿಕ ಬಾಲಿವುಡ್ನ ಭಾಯ್‌ಜಾನ್‌ ಸಲ್ಮಾನ್‌ಖಾನ್ (Salman Khan) ಕಂಬ್ಯಾಕ್‌ ಮಾಡಿದ್ದಾರೆ. ಬಹು ನಿರೀಕ್ಷಿತ ಸಿನೆಮಾ ‘ಕಿಸಿ ಕ ಭಾಯ್ ಕಿಸಿ ಕಿ ಜಾನ್’ ಇಂದು ಏಪ್ರಿಲ್ 21 ರಿಲೀಸ್ ಆಗಿದೆ. ತಮಿಳಿನ ‘ವೀರಂ’(2014) ಚಿತ್ರದ ರೀಮೇಕ್‌ (Remake) ಆಗಿರುವ ಈ ಚಿತ್ರದ ಮೂಲಕ ಸಲ್ಮಾನ್‌ ಮತ್ತೆ ಚಿತ್ರಪ್ರೇಮಿಗಳನ್ನು ರಂಜಿಸಲು ಮತ್ತೆ ಬೆಳ್ಳಿ ತೆರೆಮೇಲೆ ಕಾಣಿಸಿಕೊಂಡಿದ್ದಾರೆ. ಕೊರೋನಾ ಹಾಗೂ ಕೆಲವು ಕಾರಣದಿಂದ ಸಲ್ಮಾನ್ ಖಾನ್ ಸಿನಿಮಾಗಳು ರಿಲೀಸ್ ಆಗಿರಲಿಲ್ಲ. ಸದ್ಯ ಮೂರು ನಾಲ್ಕು ವರ್ಷಗಳ ಬಳಿಕ ದೊಡ್ಡ ಪರದೆಗಳ ಮೇಲೆ ಅವರು ಕಂಬ್ಯಾಕ್ ಮಾಡಿದ್ದಾರೆ.

‘ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್’(Kisi Ka Bhai Kisi Ki Jaan) ಸಾಹಸಮಯ ಚಿತ್ರವಾಗಿದ್ದು, ಇದನ್ನು ಫರ್ಹಾದ್‌ ಸಾಮ್ಮಿ ನಿರ್ದೇಶಿಸಿದ್ದಾರೆ. ಇದನ್ನು ಸಲ್ಮಾನ್‌ ಖಾನ್‌ ಫಿಲಂಸ್‌ ನಿರ್ಮಿಸಿದೆ. ಈ ಚಿತ್ರದಲ್ಲಿ ಸಲ್ಮಾನ್ ಖಾನ್ , ವೆಂಕಟೇಶ್ , ಪೂಜಾ ಹೆಗ್ಡೆ (Pooja Hegde) ಮತ್ತು ಜಗಪತಿ ಬಾಬು ಅವರು ಸಮಗ್ರ ಪೋಷಕ ಪಾತ್ರದಲ್ಲಿ ನಟಿಸಿದ್ದಾರೆ. ಸಾಹಸಮಯ ಕೌಟುಂಬಿಕ ಚಿತ್ರ ಇದಾಗಿದ್ದು, ಈ ಚಿತ್ರವನ್ನು ಮಾಸ್ ಎಂಟರ್ಟೇನರ್ ಎಂದು ಅಭಿಮಾನಿಗಳು ಕರೆಯುತ್ತಿದ್ದಾರೆ.

ಬಾಲಿವುಡ್ನಲ್ಲಿ (Bollywood) ಯಾವುದೇ ರಿಮೇಕ್ ಚಿತ್ರಗಳು ಸದ್ದು ಮಾಡುತ್ತಿಲ್ಲ. ಈ ವರ್ಷ ರಿಲೀಸ್ ಆದ ಅನೇಕ ರಿಮೇಕ್ ಸಿನಿಮಾಗಳು ಸೋತಿವೆ. ಆದಾಗ್ಯೂ ಸಲ್ಮಾನ್ ಖಾನ್ ಅವರು 2014ರಲ್ಲಿ ರಿಲೀಸ್ ಆದ ತಮಿಳಿನ ವೀರಂ ಚಿತ್ರವನ್ನು ರಿಮೇಕ್ ಮಾಡಿದ್ದಾರೆ. ಮೂಲ ಚಿತ್ರದಲ್ಲಿ ಸಾಕಷ್ಟು ಆ್ಯಕ್ಷನ್ (Action) ಇತ್ತು. ಈ ಕಾರಣಕ್ಕೆ ಸಲ್ಲು ಇದನ್ನು ರಿಮೇಕ್ ಮಾಡುವ ನಿರ್ಧಾರಕ್ಕೆ ಬಂದರು. ಹೋಂ ಬ್ಯಾನರ್ನಲ್ಲಿ ಅವರು ಚಿತ್ರ ನಿರ್ಮಾಣ ಮಾಡಿದ್ದಾರೆ.