ಪರ್ವತಗಳು ಬಣ್ಣಗಳಿಂದ ಆವೃತವಾಗಿರುವುದನ್ನು ಎಂದಾದರೂ ಕಂಡಿದ್ದೀರಾ? ಬಹುಶಃ ತುಂಬಾ ಜನ ಇಂತಹ ಬೆಟ್ಟಗಳನ್ನು ನೋಡಿರಲು ಸಾಧ್ಯವೇ ಇಲ್ಲ. ಕಂಡ ತಕ್ಷಣ ಎಂತಹವರನ್ನೂ ಸೆಳೆಯುವಂತಹ ಪರ್ವತಗಳ ಸಾಲಿದು.

ಪೆರುವಿನ ಅತ್ಯುತ್ತಮ ಮತ್ತು ಹೊಸ ಆಕರ್ಷಣೆಗಳಲ್ಲಿ ಒಂದಾಗಿದೆ ಈ ವಿನಿಕುಂಕಾ ಪರ್ವತ ಶ್ರೇಣಿ. ಕುಸ್ಕೊ ನಗರದಿಂದ 100 ಕಿಲೋಮೀಟರ್‌ಗಿಂತಲೂ ಹೆಚ್ಚು ದೂರದಲ್ಲಿರುವ ಇದು ಸಮುದ್ರ ಮಟ್ಟದಿಂದ 5,200 ಮೀಟರ್ ಎತ್ತರದಲ್ಲಿದೆ. ಏಳು-ಬಣ್ಣದ ಮಳೆಬಿಲ್ಲು ಪರ್ವತ ಅಂತ ಕರೆಯಲ್ಪಡೋ ವಿನಿಕುಂಕಾವನ್ನ ಸ್ಥಳೀಯರು ಸರಳವಾಗಿ ಕಲರ್ಡ್ ಹಿಲ್ ಅಂತ ಕರೆಯುತ್ತಾರೆ. ಇದರ ಅಸ್ತಿತ್ವದ ಬಗ್ಗೆ ಇತ್ತೀಚೆಗಷ್ಟೇ ತಿಳಿದುಬಂದಿದೆ. ಹಿಂದಿನಿಂದಲೂ (ಸ್ಥಳೀಯ ನಿವಾಸಿಗಳ ಪ್ರಕಾರ) ಇದರ ಮೇಲ್ಭಾಗ ಹಿಮದಿಂದ ಆವ್ರತವಾಗಿತ್ತು,

ಜಾಗತಿಕ ತಾಪಮಾನ ಏರಿಕೆಯ ಪ್ರಭಾವದಿಂದ ಕರಗಲು ಪ್ರಾರಂಭಿಸಿತು, ಇದರಿಂದಾಗಿ ಪರ್ವತಗಳು ಈಗ ಹೊಂದಿರುವ ರೂಪವನ್ನು ಪಡೆದುಕೊಂಡವು. ವಿನಿಕುಂಕಾ ಅನ್ನೋ ಹೆಸರು ಕ್ವೆಚುವಾ ಭಾಷೆಯ ಎರಡು ಪದಗಳಿಂದ ಬಂದಿದೆ: ವೈನಿ – ಕಲ್ಲು (ಈ ಸ್ಥಳದ ವಿಶಿಷ್ಟವಾದ ಅನೇಕ ಕಲ್ಲುಗಳು) ಮತ್ತು ಕುಂಕ – ಕುತ್ತಿಗೆ (ಪಾಸ್‌ನ ಅಡಚಣೆ). ಇದನ್ನು ಸೆವೆನ್-ಕಲರ್ಡ್ ಅಥವಾ ರೈನ್ಬೋ ಮೌಂಟೇನ್ ಎಂದೂ ಕರೆಯುತ್ತಾರೆ. ಗಾಢ ಬಣ್ಣಗಳು ಇದರ ವಿಶೇಷ. ಈ ಬಣ್ಣದ ಪರ್ವತದ ಹಿಂದೆ ನಿಖರ ಕಾರಣಗಳಿವೆ. ಈ ಬಣ್ಣಗಳಿಗೆ ಬೌಗೋಳಿಕವಾಗಿ ಸಂಭವಿಸುವ ಕೆಲವೊಂದು ಘಟನೆಗಳು ಕಾರಣವಾಗಿರುತ್ತವೆ.

ಅದೆಷ್ಟೋ ವರ್ಷಗಳ ಹಿಂದೆ ಸಂಭವಿಸಿದ ಜ್ವಾಲಾಮುಖಿಯಿಂದ ಹೊರಹೊಮ್ಮುವ ಲಾವಾರಸ ವರ್ಷಗಳುರುಳಿದಂತೆ ಈ ರೀತಿ ಬಣ್ಣದಂತೆ ಕಾಣುತ್ತವೆ ಎಂದು ತಜ್ಞರು ಹೇಳುತ್ತಾರೆ. ಈ ಅಪರೂಪದ ಬಂಡೆಗಳು ರೂಪುಗೊಳ್ಳಲು ಲಕ್ಷಾಂತರ ವರ್ಷಗಳೇ ಹಿಡಿದಿವೆಯಂತೆ. ಈ ಮರಳು ಮತ್ತು ಹೂಳಿನಿಂದ ರೂಪುಗೊಂಡ ಬಂಡೆಗಳು ಕಾಲ ಕ್ರಮೇಣ ಕಬ್ಬಿಣ ಹಾಗೂ ಇತರ ಖನಿಜಗಳ ಜೊತೆ ಸಂಯೋಜನೆಗೊಂಡು ಶೇಖರಣೆಯಾಗುವುದರಿಂದ ಈ ಬಣ್ಣ ಬಣ್ಣದ ತಾಣ ರೂಪುಗೊಂಡಿದೆ ಎನ್ನುತ್ತಾರೆ ತಜ್ಞರು.

ಸಾಮಾನ್ಯವಾಗಿ ವಿವಿಧ ಖನಿಜಗಳು ವಿವಿಧ ಬಣ್ಣದಲ್ಲಿ ಇರುತ್ತವೆ. ಈ ಬೆಟ್ಟದಲ್ಲಿ ಈ ಎಲ್ಲಾ ಖನಿಜಗಳು ಒಂದೆಡೆ ಕಾಣಸಿಗುತ್ತದೆ. ಹೀಗಾಗಿ, ಬೇರೆ ಬೇರೆ ಖನಿಜಗಳ ಬಣ್ಣ ಇಲ್ಲಿ ಪ್ರತಿಫಲಿಸುತ್ತದೆ. ಹೀಗಾಗಿ, ಈ ಬೆಟ್ಟಗಳು ಬೆರಗು ಮೂಡಿಸುತ್ತವೆ ಜೊತೆಗೆ ಕೌತುಕದ ಕಣಜವಾಗಿಯೂ ಮಾರ್ಪಟ್ಟಿದೆ. ವೈಜ್ಞಾನಿಕ ಕಾರಣಗಳೇನೇ ಇದ್ದರೂ ನಿಜಕ್ಕೂ ಈ ತಾಣಗಳು ಅಚ್ಚರಿ ಮೂಡಿಸುತ್ತವೆ.

• ಪಚಿತ್ರ ಸಚಿನ್