ಮಹರಾಷ್ಟ್ರ, ಡಿ. 30: ಈಗಾಗಲೇ ಹೆಣ್ಮಕ್ಕಳಿಗಾಗಿ ಬ್ಯೂಟಿ ಪಾರ್ಲರ್, ಪುರುಷರಿಗಾಗಿ ಮೆನ್ಸ್ ಪಾರ್ಲರ್ ಇರುವುದು ಸರ್ವೇ ಸಾಮಾನ್ಯ. ಆದರೆ ಈಗ ಹೊಸದಾಗಿ ಎಮ್ಮೆಗಳಿಗೂ ಪಾರ್ಲರ್ ಆರಂಭವಾಗಿರುವುದು ಆಶ್ಚರ್ಯಕರ. ಈ ಪಾರ್ಲರ್ ಆರಂಭವಾಗಿರುವುದು ಮಹಾರಾಷ್ಟ್ರದ ಕೊಲ್ಲಾಪುರದಲ್ಲಿ. ಇಲ್ಲಿನ ನಗರ ಸೇವಕರೊಬ್ಬರು ಎಮ್ಮೆಗಳಿಗಾಗಿ ವಿಶೇಷ ಬ್ಯೂಟಿ ಪಾರ್ಲರ್ ಆರಂಭಿಸಿ ಎಲ್ಲರ ಗಮನ ಸೆಳೆದಿದ್ದಾರೆ. ಇಂತಹ ಹೊಸ ಪ್ರಯತ್ನಕ್ಕೆ ಮುಂದಾಗಿ, ಜಾನುವಾರು ಪ್ರೀತಿ ಮೆರೆಯುತ್ತಿರುವವರು ಮತ್ಯಾರು ಅಲ್ಲ ನಗರ ಸೇವಕ ವಿಜಯ ಸೂರ್ಯವಂಶಿ. ಈ ಪಾರ್ಲರ್ ಮಂಗೇಶ್ಕರ್ ನಗರದಲ್ಲಿ ತಲೆ ಎತ್ತಿದ್ದು, ದಿನನಿತ್ಯ 50ಕ್ಕಿಂತ ಅಧಿಕ ಎಮ್ಮೆಗಳಿಗೆ ಸ್ನಾನ, ಎಣ್ಣೆಯಿಂದ ಮಸಾಜ್ ಮಾಡಲಾಗುತ್ತಿದೆ. ಮೂರು ವಾರಕ್ಕೊಮ್ಮೆ ಕೇಶ ಕತ್ತರಿಸಿ ಎಮ್ಮೆಗಳ ಅಂದ ಹೆಚ್ಚಿಸಲಾಗುತ್ತಿದೆ. 6 ತಿಂಗಳ ಹಿಂದೆ ಆರಂಭವಾದ ಪಾರ್ಲರ್ನಲ್ಲಿ ಲಭ್ಯವಿರುವ ಸೇವೆಗಳೆಲ್ಲವೂ ಉಚಿತ ಎಂಬುದು ಇನ್ನಷ್ಟು ಗಮನಾರ್ಹ.
ಈ ಪಾರ್ಲರ್ನಲ್ಲಿ ರೈತರೇ ಎಮ್ಮೆಗಳಿಗೆ ಸ್ನಾನ ಮಾಡಿಸುತ್ತಾರೆ. ಅಲ್ಲದೇ ಎಣ್ಣೆ ಮಸಾಜ್ ಮಾಡಿ ಕೇಶವನ್ನೂ ಕತ್ತರಿಸುತ್ತಾರೆ. ಪಾಲಿಕೆ ಜಾಗದಲ್ಲೇ ಪಾರ್ಲರ್ ಇರುವುದರಿಂದ ಪಾಲಿಕೆ ಸಿಬ್ಬಂದಿ ನಿರ್ವಹಣೆ ಮಾಡುತ್ತಾರೆ. ವಿದ್ಯುತ್ ಶುಲ್ಕವನ್ನಷ್ಟೇ ನಾನು ಭರಿಸುತ್ತೇನೆ. ಈ ಯೋಜನೆಗೆ ಉತ್ತಮ ಸ್ಪಂದನೆ ವ್ಯಕ್ತವಾದ ಹಿನ್ನೆಲೆಯಲ್ಲಿ 6 ನಗರ ಸೇವಕರು ತಮ್ಮತಮ್ಮ ವಾರ್ಡ್ಗಳಲ್ಲಿ ಈ ಮಾದರಿ ಪಾರ್ಲರ್ ಆರಂಭಿಸಲು ಪ್ರಯತ್ನಿಸಿದ್ದಾರೆ.
ಪಾರ್ಲರ್ಗೆ ಹೊಂದಿಕೊಂಡಂತೆ ಎರಡು ಉದ್ಯಾನಗಳಿವೆ. ಪಾರ್ಲರ್ಗೆ ಬರುವ ಎಮ್ಮೆಗಳು ಹಾಕುವ ಸಗಣಿಯನ್ನು ಗೊಬ್ಬರವಾಗಿ ಹಾಗೂ ಮೈತೊಳೆದ ನಿರುಪಯುಕ್ತ ನೀರನ್ನು ಆ ಉದ್ಯಾನಕ್ಕೆ ಬಳಸಲಾಗುತ್ತಿದೆ. ಎಮ್ಮೆಗಳ ಕೇಶವನ್ನು ಮರುಬಳಕೆ ಮಾಡಲಾಗುತ್ತದೆ. ಆ ಪೈಕಿ ವಿನೂತನ ಯೋಜನೆ ಜಾರಿಗಾಗಿ ಸೂರ್ಯವಂಶಿ ಪ್ರತಿನಿಧಿಸುವ ವಾರ್ಡ್ 44ಕ್ಕೆ ಪಾಲಿಕೆಯಿಂದ ಅಗ್ರಸ್ಥಾನ ಸಿಕ್ಕಿರುವುದು ವಿಶೇಷ.