ಗುಂಡಿನ ಚಕಮಕಿ: ಉಗ್ರರ ಜೊತೆಗಿನ ಗುಂಡಿನ ಕಾಳಗದಲ್ಲಿ ಭಾರತೀಯ ಐವರು ಯೋಧರ ಸಾವು

Jammu and Kashmir: ಶುಕ್ರವಾರ (ಡಿ.22) ಜಮ್ಮು ಮತ್ತು ಕಾಶ್ಮೀರದ (Jammu and Kashmir) ಪೂಂಚ್ ಜಿಲ್ಲೆಯಲ್ಲಿ ಉಗ್ರರ ಜೊತೆಗೆ ನಡೆದ ಗುಂಡಿನ ಕಾಳಗದಲ್ಲಿ ಭಾರತೀಯ ಸೇನೆಯ ಐವರು ಯೋಧರು (Soldier) ಹುತಾತ್ಮರಾಗಿದ್ದು, ಇನ್ನು ಮೂವರು ಗಾಯಗೊಂಡಿದ್ದಾರೆ ಎಂದು ಸೇನೆ ತಿಳಿಸಿದೆ.

ಗುರುವಾರ ಮಧ್ಯಾಹ್ನ ಪೂಂಚ್ ವಲಯದ ರಜೌರಿಯಲ್ಲಿನ ದೇರಾ ಕಿ ಗಾಲಿ (Dera Ki Gali in Rajouri) ಮೂಲಕ ಎರಡು ಸೇನಾ ವಾಹನಗಳು ಹಾದು ಹೋಗುವಾಗ ಭಯೋತ್ಪಾದಕರು (Terrorists) ಗುಂಡು ಹಾರಿಸಿದ್ದರು. ಇದರ ಬಳಿಕ ಎರಡೂ ಕಡೆಗಳ ನಡುವೆ ಎನ್‌ಕೌಂಟರ್ ಆರಂಭವಾಗಿತ್ತು. ಬುಧವಾರ ರಾತ್ರಿಯಿಂದಲೇ ಭಾರತೀಯ ಸೇನೆಯು ಡಿಕೆಜಿ ಪ್ರದೇಶ ಎಂದು ಕರೆಯಲಾಗುವ ದೇರಾ ಕಿ ಗಾಲಿ ಒಳಗೆ ಹಾಗೂ ಸುತ್ತಮುತ್ತಲೂ ವ್ಯಾಪಕ ಶೋಧ ಕಾರ್ಯಾಚರಣೆ ನಡೆಸುತ್ತಿತ್ತು. ಪ್ರಸ್ತುತ ಎನ್‌ಕೌಂಟರ್ (Encounter) ಮುಂದುವರಿದಿದೆ.

ಕಳೆದ ರಾತ್ರಿ ಡಿಕೆಜಿ ಪ್ರದೇಶದಲ್ಲಿ ಖಚಿತ ಗುಪ್ತಚರ ಮೂಲಗಳ ಆಧಾರದಲ್ಲಿ ಜಂಟಿ ಕಾರ್ಯಾಚರಣೆ ಆರಂಭಿಸಲಾಗಿತ್ತು. ಈ ಸಂಜೆ ಭಯೋತ್ಪಾದಕರ ಜಾಡು ಸಿಕ್ಕಿದ್ದು, ಎನ್‌ಕೌಂಟರ್ ಪ್ರಗತಿಯಲ್ಲಿದೆ” ಎಂದು ರಕ್ಷಣಾ ವಕ್ತಾರರು ತಿಳಿಸಿದ್ದಾರೆ. ಸೇನಾ ವಾಹನದ ಮೇಲೆ ದಾಳಿ ನಡೆಸಲು ಉಗ್ರರು ಡಿಕೆಜಿ ಮತ್ತು ಬಫ್ಲಿಯಾಜ್ (DKG and Bafliaz) ನಡುವಿನ ಧತ್ಯಾರ್ ಮೋರ್ಹ್ ಸ್ಥಳವನ್ನು ಆಯ್ದುಕೊಂಡಿದ್ದರು.

ಇಲ್ಲಿ ಬಹಳ ಕಡಿದಾದ ತಿರುವು ಮತ್ತು ಏರುತಗ್ಗಿನ ರಸ್ತೆಯ ಕಾರಣದಿಂದ ಸೇನಾ ವಾಹನಗಳು ಸಂಪೂರ್ಣ ನಿಧಾನವಾಗುತ್ತದೆ. ಧತ್ಯಾರ್ ಮೊರ್ಹ್‌ನ ಬೆಟ್ಟ (Hill of Dhatyar Morh) ವೊಂದರಲ್ಲಿ ಸನ್ನದ್ಧರಾಗಿ ನಿಂತಿದ್ದ ಉಗ್ರರು, ಎರಡು ಸೇನಾ ವಾಹನಗಳ ಮೇಲೆ ಗುಂಡಿನ ದಾಳಿ ನಡೆಸಿದ್ದಾರೆ. ಮಧ್ಯಾಹ್ನ 3.45ರ ವೇಳೆಗೆ ಈ ಘಟನೆ ನಡೆದಿದೆ.

ಸೇನೆಯ ಟ್ರಕ್ (Truck) ಮತ್ತು ಮಾರುತಿ ಜಿಪ್ಸಿ ವಾಹನಗಳನ್ನು ಗುರಿಯಾಗಿಸಿ ದಾಳಿ ನಡೆಸುವುದಕ್ಕೂ ಮುನ್ನ ಉಗ್ರರು ಈ ಭಾಗದಲ್ಲಿ ಪರಿಶೀಲನೆ ನಡೆಸಿರುವ ಸಾಧ್ಯತೆ ಇದೆ. ಈ ದಾಳಿಯಲ್ಲಿ ಮೂವರು ಅಥವಾ ನಾಲ್ವರು ಉಗ್ರರು ಭಾಗಿಯಾಗಿರಬಹುದು ಎಂದು ಸೇನೆ ಹೇಳಿದೆ. ಉಗ್ರರ ದಾಳಿಗೆ ಪ್ರತಿಯಾಗಿ ಸೇನೆ ಗುಂಡಿನ ದಾಳಿ ನಡೆಸಿತು.

ಆದರೆ ಅವರು ಸ್ಥಳದಿಂದ ಪರಾರಿಯಾಗುವಲ್ಲಿ ಯಶಸ್ವಿಯಾದರು ಎಂದು ಮೂಲಗಳು ತಿಳಿಸಿವೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಪಾಕಿಸ್ತಾನದ ಮೂಲದ ಉಗ್ರ ಸಂಘಟನೆಯ ಲಷ್ಕರ್ ಎ ತಯಬಾದ (ಎಲ್‌ಇಟಿ) ಘಟಕವಾದ ದಿ ಪೀಪಲ್ಸ್ ಆಂಟಿ- ಫ್ಯಾಸಿಸ್ಟ್ ಫ್ರಂಟ್ (The People’s Anti-Fascist Front) ಈ ಘಟನೆಯ ಹೊಣೆ ಹೊತ್ತುಕೊಂಡಿದೆ.

ಭವ್ಯಶ್ರೀ ಆರ್ ಜೆ