Bengaluru: ಸ್ಯಾಂಡಲ್ವುಡ್ ನಟ ದರ್ಶನ್ ಪ್ರಕರಣದ ಮಾತುಗಳೇ ಎಲ್ಲೆಡೆ ಕೇಳಿ ಬರುತ್ತಿದ್ದು, ರೇಣುಕಾಸ್ವಾಮಿ (Renukaswamy) ಕೊಲೆ ಪ್ರಕರಣದಲ್ಲಿ ಪೋಲೀಸರ ಕೈವಶದಲ್ಲಿರುವ ನಂಬರ್ 2 ಆರೋಪಿಯಾಗಿರುವ ನಟ ದರ್ಶನ್ ವಿರುದ್ಧ ರೌಡಿ ಶೀಟರ್ (Rowdy Sheeter) ತೆರೆಯಲಾಗುತ್ತಾ? ಹೌದು, ಇಂತಹದೊಂದು ಚರ್ಚೆ ಶುರುವಾಗಿದೆ.
![Darshan Arrested](https://sp-ao.shortpixel.ai/client/to_webp,q_glossy,ret_img,w_1024,h_630/https://vijayatimes.com/wp-content/uploads/2024/06/du6rm6ng_kannada-actor-darshan-_625x300_11_June_24-1024x630.webp)
ದರ್ಶನ್ ವಿರುದ್ಧ ಸರಣಿ ಆರೋಪಗಳಿದ್ದು, ಈ ಹಿಂದೆ ಪತ್ನಿಯ ಮೇಲೆ ಹಲ್ಲೆ ಮಾಡಿ ಜೈಲಿ (Jail) ಗೆ ಹೋಗಿದ್ದರು. ಇದೀಗ ಕೊಲೆ ಪ್ರಕರಣದಲ್ಲಿ ಬಂಧಿತರಾಗಿದ್ದಾರೆ. ಹೀಗಾಗಿ ಸರಣಿ ಕ್ರಿಮಿನಲ್ ಕೃತ್ಯಗಳ ಆರೋಪ ಹೊಂದಿರುವವರ ವಿರುದ್ಧ ರೌಡಿ ಶೀಟ್ ತೆರೆಯಲು ಅವಕಾಶ ಇದೆ. ಈ ನಿಟ್ಟಿನಲ್ಲಿ ಪೊಲೀಸರ ನಡೆ ಕುತೂಹಲ ಕೆರಳಿಸಿದ್ದು, ಈತನ ವಿರುದ್ಧ ಇದೀಗ ಕೊಲೆ ಆರೋಪ ಬಂದಿರುವ ಹಿನ್ನೆಲೆಯಲ್ಲಿ ಅವರನ್ನು ಪೊಲೀಸರು ಬಂಧಿಸಿದ್ದಾರೆ.
ಆದರೆ ಇದೇ ಮೊದಲ ಬಾರಿಗೇನು ದರ್ಶನ್ (Darshan) ವಿರುದ್ಧ ಇಂತಹ ಆರೋಪ ಕೇಳಿ ಬಂದಿದ್ದಲ್ಲ. ಬದಲಾಗಿ ಹೆಂಡತಿ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ ಆರೋಪದ ಅಡಿಯಲ್ಲಿ 28 ದಿನಗಳ ಕಾಲ ಜೈಲು ಶಿಕ್ಷೆ ಅನುಭವಿಸಿದ್ದರು. ಅಲ್ಲದೆ ಸಿನಿಮಾ ನಿರ್ಮಾಪಕರೊಬ್ಬರಿಗೆ ಕರೆ ಮಾಡಿ ಕೆಟ್ಟ ಪದಗಳಿಂದ ನಿಂದಿಸಿದ ಆರೋಪ ಇವರ ವಿರುದ್ಧ ಇದೆ.
ಇನ್ನು ಮೈಸೂರಿನ ಹೋಟೆಲ್ ಸಿಬ್ಬಂದಿಗೆ ಹಲ್ಲೆ ಮಾಡಿದ್ದಾರೆ ಎಂಬ ಆರೋಪವೂ ಕೇಳಿಬಂದಿತ್ತು. ಇಂದ್ರಜಿತ್ ಲಂಕೇಶ್ (Indrajith Lankesh) ಈ ಆರೋಪವನ್ನು ಮಾಡಿದ್ದರು. ಇದರ ಜೊತೆಗೆ ನಿರ್ಮಾಪಕ ಉಮಾಪತಿ ಜೊತೆಗಿನ ಜಗಳವೂ ತಾರಕಕ್ಕೇರಿತ್ತು. ಅಲ್ಲದೆ, ಯಜಮಾನ ಸಿನಿಮಾ ಶೂಟಿಂಗ್ (Shooting) ವೇಳೆ ಜೂನಿಯರ್ ಕಲಾವಿದರೊಬ್ಬರಿಗೆ ಹಲ್ಲೆ ಮಾಡಿದ ಆರೋಪ ದರ್ಶನ್ ವಿರುದ್ಧ ಇತ್ತು.
![](https://sp-ao.shortpixel.ai/client/to_webp,q_glossy,ret_img,w_1024,h_538/https://vijayatimes.com/wp-content/uploads/2024/06/download-1024x538.webp)
ಎಂಥವರ ವಿರುದ್ಧ ರೌಡಿ ಶೀಟರ್ ತೆರೆಯಲು ಅವಕಾಶವಿದೆ?
ಪ್ರತಿಯೊಂದು ಪೊಲೀಸ್ ಠಾಣೆಯಲ್ಲೂ ರೌಡಿಗಳ ಪುಸ್ತಕ ಅಥವಾ ರೌಡಿ ಶೀಟರ್ ಬುಕ್ ಇರುತ್ತದೆ. ನಮೂನೆ 100ರಲ್ಲಿ ಮೂರು ಭಾಗಗಳಾಗಿ ಇದನ್ನು ವಿಂಗಡನೆ ಮಾಡಲಾಗುತ್ತದೆ. ಸಾರ್ವಜನಿಕವಾಗಿ ಶಾಂತಿ ಮತ್ತು ನೆಮ್ಮದಿಗೆ ಅಪಾಯಕಾರಿಯಾದ ವ್ಯಕ್ತಿಗಳು, ಪದೇ ಪದೇ ಕ್ರಿಮಿನಲ್ (Criminal) ಕೃತ್ಯಗಳನ್ನು ಎಸಗುತ್ತಿರುವ ವ್ಯಕ್ತಿಗಳ ಮೇಲೆ ರೌಡಿ ಶೀಟರ್ ತೆರೆಯಲಾಗುತ್ತದೆ. ಬಲಪ್ರಯೋಗದ ಮೂಲಕ ಬೆದರಿಕೆ ಹಾಕುವುದು, ಹಫ್ತಾ ವಸೂಲಿ ಮಾಡುವವರು, ಅಸಭ್ಯ ವರ್ತನೆ, ದೊಂಬಿಯಲ್ಲಿ ಭಾಗಿಯಾಗುವವರು, ದರೋಢೆ ಕೃತ್ಯಗಳಲ್ಲಿ ತೊಡಗಿಸಿಕೊಳ್ಳುವವರ ವಿರುದ್ಧ ರೌಡಿ ಶೀಟರ್ ತೆರೆಯಲು ಕಾನೂನಿನಲ್ಲಿ ಅವಕಾಶ ಇದೆ.
ವೃತ ನಿರೀಕ್ಷಕರು ದಾಖಲೆಗಳನ್ನು ಪರಿಶೀಲನೆ ಮಾಡಿದ ಬಳಿಕ ರೌಡಿ ಕೃತ್ಯಗಳನ್ನು ಎಸಗಿದ ವ್ಯಕ್ತಿಯ ಹೆಸರನ್ನು ಪುಸ್ತಕದ ಭಾಗ ಎ ಅಥವಾ ಭಾಗ ಬಿ ಯಲ್ಲಿ ದಾಖಲು ಮಾಡಬೇಕಿದೆ. ಇನ್ನು ಓರ್ವ ವ್ಯಕ್ತಿ ನಿರಂತರವಾಗಿ ಇಂತಹ ಕೃತ್ಯಗಳಲ್ಲಿ ತೊಡಗಿಸಿಕೊಂಡಲ್ಲಿ, ಪರಿಸರದಲ್ಲಿ ಆತನ ವಿರುದ್ಧ ಕೆಟ್ಟ ಹೆಸರು ಇದ್ದಲ್ಲಿ ಭಾಗ ಸಿ ಯಲ್ಲಿ ಆತನ ಹೆಸರನ್ನು ನಮೂದಿಸಲಾಗುತ್ತದೆ. ಇನ್ನು ಈ ರೌಡಿಗಳ ಚಲನವಲನವನ್ನು ಗಮಿನಿಸುವುದು ಹಾಗೂ ಆತನ ಬಗ್ಗೆ ಮಾಹಿತಿಯನ್ನು ಸಂಗ್ರಹಿಸುವ ಕೆಲಸವನ್ನು ಆಯಾ ಠಾಣಾ ವ್ಯಾಪ್ತಿಯಲ್ಲಿ ಮಾಡಲಾಗುತ್ತದೆ.
ಹೈಕೋರ್ಟ್ ಮಾರ್ಗಸೂಚಿಯೇನು?
ಹೈಕೋರ್ಟ್ (Highcourt) ಕೆಲವು ಮಾರ್ಗಸೂಚಿಗಳನ್ನು ರೌಡಿ ಶೀಟರ್ ತೆರೆಯುವ ವಿಚಾರವಾಗಿ ನೀಡಿದೆ. ರೌಡಿ ಶೀಟರ್ ತೆರೆಯುವ ಮುನ್ನ ಆ ವ್ಯಕ್ತಿಗೆ ನೋಟಿಸ್ ಕೊಡಬೇಕಿದೆ. ಇನ್ನು ಇದೇ ಸಂದರ್ಭದಲ್ಲಿ ರೌಡಿ ಶೀಟ್ ತೆರೆಯುವ ಸಂದರ್ಭದಲ್ಲಿ ಅದನ್ನು ತೆರೆಯದಂತೆ ಮನವಿ ಸಲ್ಲಿಸಲು ಆ ವ್ಯಕ್ತಿಗೆ ಅವಕಾಶ ಇದೆ. ರೌಡಿ ಶೀಟ್ ತೆರೆಯುವಾಗ ಸಕಾರಣ ನೀಡಿ ಲಿಖಿತ ಆದೇಶ ಮಾಡಬೇಕಿದೆ. ಪ್ರತಿ ವರ್ಷ ರೌಡಿ ಶೀಟರ್ ಮರು ಪರಿಶೀಲಿಸಿ ಅದನ್ನು ಮುಂದುವರಿಸುವ ಬಗ್ಗೆ ಸಕಾರಣ ನೀಡಿ ಲಿಖಿತ ಆದೇಶ ಮಾಡಬೇಕಿದೆ.