ಕಿರಿಕ್ ಪಾರ್ಟಿ ಚಿತ್ರದ ಮೂಲಕ ಸ್ಯಾಂಡಲ್ ವುಡ್‍ಗೆ ಎಂಟ್ರಿ ಕೊಟ್ಟರೂ, ಟಾಲಿವುಡ್‍ನಲ್ಲೇ ಸಾಕಷ್ಟು ಹೆಸರು ಮಾಡಿದವರು ಕೊಡಗಿನ ಹುಡುಗಿ ರಶ್ಮಿಕಾ ಮಂದಣ್ಣ. ಚಲೋ, ಗೀತ ಗೋವಿದಂ ಹೀಗೆ ಹಿಟ್ ಚಿತ್ರಗಳಲ್ಲಿ ಅಭಿನಯಿಸಿರುವ ರಶ್ಮಿಕಾ ಸದ್ಯ ಕಾಲಿವುಡ್‍ನಲ್ಲೂ ಆಫರ್ ಗಿಟ್ಟಿಸಿಕೊಂಡಿದ್ದಾರೆ. ಈಗ ವಿಷ್ಯ ಏನು ಗೊತ್ತಾ..? ಡಿಯರ್ ಕಾಮ್ರೆಡ್ ಎಂಬ ಬಹುಭಾಷಾ ಚಿತ್ರದಲ್ಲಿ ಅಭಿನಯಿಸಿ ಎಲ್ಲರ ಮೆಚ್ಚುಗೆ ಗಳಿಸಿದ್ದ ರಶ್ಮಿಕಾ ನಂತರ ತಮಿಳಿನ ಪ್ರಮುಖ ವೆಬ್ ಸೈಟ್ ಒಂದಕ್ಕೆ ಸಂದರ್ಶನ ನೀಡಿದ್ದಾರೆ. ಆ ಸಂದರ್ಶನದಲ್ಲಿ ತನಗೆ ಕನ್ನಡ ಬಹುವುದಿಲ್ಲ, ಹಾಗೂ ಡಬ್ಬಿಂಗ್ ಮಾಡುವುದು ಸಹ ಬಲು ಕಷ್ಟ ಎಂದಿದ್ದಾರೆ. ಈ ವಿಡಿಯೋ ವೈರಲ್ ಆಗಿದ್ದು, ಕನ್ನಡಾಭಿಮಾನಿಗಳ ಕೋಪಕ್ಕೆ ಗುರಿಯಾಗಿದ್ದಾರೆ.
ಈ ಬಗ್ಗೆ ಕನ್ನಡಪರ ಹೋರಾಟಗಾರರು ವಾಣಿಜ್ಯ ಮಂಡಳಿಗೆ ದೂರು ನೀಡಿದ್ದಾರೆ. ಈ ದೂರಿನಂತೆ ರಶ್ಮಿಕಾರನ್ನು ಅಧ್ಯಕ್ಷರು ಪ್ರಶ್ನಿಸಿದ್ದಕ್ಕೆ ಗರಂ ಆದ ನಟಿ, ನಾನೇನೂ ತಪ್ಪು ಹೇಳಿಲ್ಲ. ನನಗೆ ಕನ್ನಡವೇ ಬರುವುದಿಲ್ಲ ಎಂದು ನಾನೆಲ್ಲೂ ಹೇಳಿಲ್ಲ. ಬದಲಾಗಿ ಭಾಷೆಯ ಉಚ್ಛಾರಣೆಯ ವೇಳೆ ಬಾಯಿ ತೊದಲುತ್ತದೆ ಎಂಬರ್ಥದಲ್ಲಿ ಹೇಳಿದ್ದೆ. ಈ ಸಂಬಂಧ ವಿಚಾರಣೆಗೆ ನಾನು ಫಿಲಂ ಛೇಂಬರ್‍ಗೆ ಬರಲಾರೆ. ಈ ವಿಚಾರವಾಗಿ ಏನೇ ಆದರೂ ಹೈಕೋರ್ಟ್‍ನಲ್ಲಿ ಕಾನೂನು ಹೋರಾಟ ಮಾಡುವುದಾಗಿ ಹೇಳಿದ್ದಾರಂತೆ..ಒಟ್ನಲ್ಲಿ ಕರುನಾಡಿನಲ್ಲಿ ಕನ್ನಡಿಗರ ಆಕ್ರೋಶಕ್ಕೆ ರಶ್ಮಿಕಾ ಗುರಿಯಾಗಿರುವುದಂತೂ ನಿಜ.
