ಮಸ್ಕಿ, ಏ. 12: ಚುನಾವಣೆ ಬಂತೆಂದರೆ ಮತದಾರರ ಮನವೊಲಿಸಲು ಕಣದಲ್ಲಿರುವ ಅಭ್ಯರ್ಥಿಗಳು ನಾನಾ ಕಸರತ್ತು ನಡೆಸುತ್ತಾರೆ. ಕೆಲವರು ವಿವಿಧ ಆಮಿಗಳನ್ನು ನೀಡಿ ಮತದಾರರನ್ನು ತಮ್ಮತ್ತ ಸೆಳೆಯುವ ಪ್ರಯತ್ನ ಮಾಡಿದರೆ, ಇನ್ನೂ ಕೆಲವರು ಸಿನಿತಾರೆಯರ ಪ್ರಯತ್ನ ಮಾಡೋದು ಸಹಜ. ಇದೇ ಹಾದಿಯಲ್ಲಿ ಸಾಗಿರುವ ಮಸ್ಕಿ ಉಪ ಚುನಾವಣೆಯಲ್ಲಿ ಬಿಜಿಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸಿರುವ ಪ್ರತಾಪಗೌಡ ಪಾಟೀಲ್, ಗಾಯಕಿ ಮಂಗ್ಲಿ ಅವರನ್ನು ತಮ್ಮ ಪರ ಪ್ರಚಾರ ನಡೆಸಲು ಸ್ಟಾರ್ ಪ್ರಚಾರಕರನ್ನಾಗಿ ಕರೆತಂದಿದ್ದಾರೆ.

ಇತ್ತೀಚೆಗೆ ಬಿಡುಗಡೆಯಾದ ನಟ ದರ್ಶನ್ ಅಭಿನಯದ ರಾಬರ್ಟ್ ಚಿತ್ರದ ತೆಲುಗು ಚಿತ್ರದಲ್ಲಿ ‘ಕಣ್ಣೇ ಅದರಿಂದಿ..’ ಹಾಡಿನ ಮೂಲಕ ಹೆಚ್ಚು ಜನಪ್ರಿಯತೆ ಪಡೆದಿರುವ ತೆಲುಗು ಸಿನಿಮಾದ ಹಿನ್ನೆಲೆ ಗಾಯಕಿ ಮಂಗ್ಲಿ ಅವರು ಬಿಜೆಪಿ ಅಭ್ಯರ್ಥಿ ಪ್ರತಾಪಗೌಡ ಪಾಟೀಲ ಪರ ಚುನಾವಣಾ ಪ್ರಚಾರ ಮಾಡುವುದಕ್ಕೆ ನಾಳೆ (ಏ.13) ಮಸ್ಕಿಗೆ ಬರಲಿದ್ದಾರೆ.

ಕನ್ನಡದ ‘ರಾಬರ್ಟ್‌’ ಸಿನಿಮಾದ ‘ಕಣ್ಣು ಹೊಡೆಯಾಕ..’ ಎಂಬ ಹಾಡನ್ನು ತೆಲುಗು ಭಾಷೆಯಲ್ಲಿ ಮಂಗ್ಲಿ ಹಾಡಿದ್ದಾರೆ. ಆ ಹಾಡು ಸಾಕಷ್ಟು ಜನಪ್ರಿಯತೆ ಗಳಿಸಿತ್ತು. ಆ ಮೂಲಕ ಮಂಗ್ಲಿ ಅವರು ಹೆಚ್ಚು ಜನಪ್ರಿಯರಾದರು. ಅವರ ಕಂಠಸಿರಿಗೆ ಸಂಗೀತ ಪ್ರಿಯರು ಮನಸೋತಿದ್ದಾರೆ.