- ಮೋಹನ್‌ ಶೆಟ್ಟಿ
ಜನಮೆಚ್ಚಿದ, ಜಗಮೆಚ್ಚಿದ ಪವರ್ ಸ್ಟಾರ್(Powerstar) ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ದೈಹಿಕವಾಗಿ ಅಗಲಿ, ಇಂದು ನಮ್ಮೆಲ್ಲರ ಮನಸ್ಸಿನಲ್ಲಿ ಆರಾಧ್ಯ ದೈವವಾಗಿ ನೆಲೆಯೂರಿದ್ದಾರೆ. ಪ್ರೀತಿಯಿಂದ ಜನರು ಪುನೀತ್ ರಾಜ್‍ಕುಮಾರ್(Puneethrajkumar) ಅವರನ್ನು ಅಪ್ಪು(Appu) ಎಂದೇ ಕರೆಯುತ್ತಿದ್ದರು. ಇಂದಿಗೂ ಕೂಡ ಅಪ್ಪು ಎಂಬ ನಾಮಸ್ಮರಣೆ ಕೋಟಿ ಕೋಟಿ ಹೃದಯಗಳಲ್ಲಿ ಮಂತ್ರ ಪಠನೆಯಾಗಿ ರಾರಾಜಿಸುತ್ತಿದೆ. ಪುನೀತ್ ರಾಜ್‍ಕುಮಾರ್(Puneethrajkumar) ಅವರು ಕಡೆಯದಾಗಿ ನಟಿಸಿದ ಚಲನಚಿತ್ರ ಎಂದರೆ ಅದು `ಜೇಮ್ಸ್'(James).
ಈ ಸಿನಿಮಾದ ಕೊಂಚ ಭಾಗ ಮಾತ್ರ ಚಿತ್ರೀಕರಣಕ್ಕೆ ಬಾಕಿ ಉಳಿದಿತ್ತು. ಸದ್ಯ ಈ ಕುರಿತು ಚಿತ್ರದ ನಿರ್ದೇಶಕರಾಗಿರುವ ಚೇತನ್ ಅವರು ಜೇಮ್ಸ್ ಚಿತ್ರದ ಬಾಕಿಯನ್ನು ನಾವು ಪೂರ್ಣಗೊಳಿಸಲು ಮುಂದಾಗಿದ್ದೇವೆ. ಹೀಗಾಗಿಯೇ ಸಿನಿಮಾದ ಚಿತ್ರೀಕರಣ ಪ್ರಾರಂಭಿಸಲು ತಂಡದೊಂದಿಗೆ ಸಜ್ಜಾಗಿದ್ದೇವೆ. ಕಳೆದ ಎರಡು ತಿಂಗಳಿಂದ ಅಭಿಮಾನಿಗಳು ಅಪ್ಪು ಅವರ ಹುಟ್ಟುಹಬ್ಬಕ್ಕೆ ನಾವು ಜೇಮ್ಸ್ ಚಿತ್ರವನ್ನು ನೋಡಲೇಬೇಕು ಎಂದು ಪಟ್ಟು ಹಿಡಿದು ಕುಳಿತ್ತಿದ್ದಾರೆ ಎಂದು ನಿರ್ದೇಶಕರು ತಿಳಿಸಿದ್ದು, ಇದಕ್ಕಾಗಿಯೇ ನಿರ್ದೇಶಕ ಚೇತನ್ ಹರಸಾಹಸ ಮಾಡುತ್ತಿದ್ದು, ಚಿತ್ರೀಕರಣವನ್ನು ಮುಗಿಸಲು ಪ್ಲಾನ್ ಮಾಡಿದ್ದಾರೆ.
ಈ ನಡುವೆ ಅಪ್ಪು ಅವರ ಕೊನೆಯ ಸಿನಿಮಾದಲ್ಲಿ ದೊಡ್ಮನೆ ಅಣ್ಣಂದಿರನ್ನು ಸೇರಿಸುವ ಪ್ರಯತ್ನ ಚೇತನ್ ಮಾಡಿದ್ದಾರೆ. ಹೌದು, ನಟ ಶಿವರಾಜ್‍ಕುಮಾರ್(Shivarajkumar) ಮತ್ತು ರಾಘವೇಂದ್ರ ರಾಜ್‍ಕುಮಾರ್(Raghavendrarajkumar) ಅವರಿಬ್ಬರನ್ನು ವಿಶೇಷ ಪಾತ್ರದಲ್ಲಿ ತೋರಿಸಲು ಚೇತನ್ ನಿರ್ಧರಿಸಿದ್ದಾರಂತೆ. ಈ ಸುದ್ದಿ ಕಳೆದ ಒಂದೆರೆಡು ವಾರಗಳಿಂದ ಗಾಂಧಿನಗರದಲ್ಲಿ ಹರಿದಾಡುತ್ತಿತ್ತು. ಈ ವಿಷಯ ತಿಳಿಯುತ್ತಿದ್ದಂತೆ ಅಪ್ಪು ಅವರ ಅಭಿಮಾನಿಗಳಲ್ಲಿ ಕಾತುರ, ಆತುರ ಎರಡು ಮತ್ತಷ್ಟು ಹೆಚ್ಚಾಗಿದೆ.
ಪುನೀತ್ ರಾಜ್‍ಕುಮಾರ್ ಅವರನ್ನು ಅವರ ಅಭಿಮಾನಿಗಳು ಈ ಹಿಂದೆ ನಡೆದಿದ್ದ ಹಲವಾರು ಕಾರ್ಯಕ್ರಮಗಳಲ್ಲಿ ನೀವು ನಿಮ್ಮ ಅಣ್ಣಂದಿರೊಟ್ಟಿಗೆ ಯಾವಾಗ ಅಭಿನಯಿಸಲಿದ್ದೀರಾ.? ನಾವು ಯಾವಾಗ ನೋಡಬಹುದು.? ಎಂಬ ಅನೇಕ ಪ್ರಶ್ನೆಗಳನ್ನು ಮುಂದಿಟ್ಟಿದ್ದರು. ಆದರೆ ಈ ಮಾತಿಗೆಲ್ಲಾ ಅಪ್ಪು ನೋಡಣ, ಮಾಡೋಣ ಅದಕ್ಕೆಲ್ಲಾ ಒಂದು ಒಳ್ಳೆ ಸಮಯ ಬರಲಿದೆ, ಕಾಯಬೇಕು ಎಂದಿದ್ದರು. ಆದರೇ ಈ ರೀತಿ ಆಗುತ್ತೆ ಎಂದು ಯಾರಿಗೂ ತಿಳಿದಿರಲಿಲ್ಲ.!
ಸದ್ಯ ಈಗ ಆ ಕನಸು ನನಸಾಗುವತ್ತ ಸಾಗಿದೆ. ಹೌದು, ಶಿವರಾಜ್‍ಕುಮಾರ್ ಮತ್ತು ರಾಘವೇಂದ್ರ ರಾಜ್‍ಕುಮಾರ್ ಅವರಿಬ್ಬರು ಈಗ ಜೇಮ್ಸ್ ಸಿನಿಮಾದಲ್ಲಿ ಅತಿಥಿ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬುದು ಖಚಿತವಾಗಿದೆ. ಒಟ್ಟಾರೆ ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಅವರನ್ನು ಕಣ್ತುಂಬಿಕೊಳ್ಳಲು ಕೋಟ್ಯಾಂತರ ಅಭಿಮಾನಿಗಳು ತುದಿಗಾಲಿನಲ್ಲಿ ಕಾಯುತ್ತಿದ್ದಾರೆ. ಈ ಸಿನಿಮಾವನ್ನು ಯಶಸ್ವಿ ಮಾಡುವ ಮೂಲಕ ಪವರ್ ಸ್ಟಾರ್ ಅಪ್ಪು ಅವರಿಗೆ ವಿಶೇಷ ಗೌರವ ಸಲ್ಲಿಸುವುದು ಕನ್ನಡಿಗರ ಗುರಿಯಾಗಿದೆ.
