ಮಾನವನ ದುರಾಸೆಗೆ ಬಲಿಯಾಗಿ ಅಳಿವಿನಂಚಿನಲ್ಲಿರುವ ಕಡಲ ಹಸುಗಳ ಬಗ್ಗೆ ಕೇಳಿದ್ದೀರಾ? ಇಲ್ಲಿದೆ ಮಾಹಿತಿ!

ಕಡಲ ಹಸು(Sea Cow) ಅಮೆರಿಕ(America) ಖಂಡದ ತೀರಗಳಲ್ಲಿ ಕಂಡು ಬರುವ ಟ್ರಿಕೆಕಸ್‌ ಕುಲದ ಒಂದು ಸಸ್ಯಾಹಾರಿ ಜಲಚರ ಸಸ್ತನಿ.

ಇದು ಸುಮಾರು 4.0 ಮೀಟರ್‌ ಉದ್ದ ಮತ್ತು 590 ಕಿಲೋಗ್ರಾಂಗಳಷ್ಟು ತೂಕ ಹೊಂದಿರುತ್ತವೆ. ಭೂಮಿ ಮೇಲೆ ಕಾಣಸಿಗುವ ಹುಲ್ಲನ್ನು ಮೇಯುವ ಹಸುವಿನ ರೀತಿಯೇ ಕಡಲ ಹಸು ಕೂಡ ಸಮುದ್ರದಲ್ಲಿರುವ ಜಲಸಸ್ಯಗಳನ್ನು ನಿಧಾನವಾಗಿ ಮೇಯುತ್ತದೆ! ಅಪರೂಪದ ಜೀವಿಯಾದ ಕಡಲ ಹಸುವನ್ನು ಬೇಟೆಯಾಡುವುದು ಕಾನೂನು ಬಾಹಿರವಾಗಿದ್ದರೂ ಸಹ ಅವುಗಳ ಮಾಂಸಕ್ಕಾಗಿ ಅಕ್ರಮವಾಗಿ ಬೇಟೆಯಾಡಲಾಗುತ್ತಿದೆ. ಇಂಥ ಅಪರೂಪದ ಹಾಗೂ ಆಕರ್ಷಣೀಯ ಜೀವಿಯನ್ನು ಭವಿಷ್ಯದಲ್ಲಿ ಉಳ್ಳಿಸಿಕೊಳ್ಳಲು ಇದರ ಬಗ್ಗೆ ಜಾಗೃತಿ ಮೂಡಿಸುವುದು ಬಹಳ ಮುಖ್ಯವಾಗಿದೆ.

ಕಡಲ ಹಸು ಹೆಚ್ಚಾಗಿ ಇರುವಂಥ ಪ್ರದೇಶವಾದ ಮೆಕ್ಸಿಕೋ ಮತ್ತು ಕೆರಿಬಿಯನ್‌ಗಳಲ್ಲಿ ಮ್ಯಾನಟೀ ಅಪ್ರಿಶಿಯೇಷನ್‌ ದಿನದ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ. ಪ್ರಾಣಿ ಸಂಗ್ರಹಾಲಯಗಳು, ಕಡಲ ಜೀವಶಾಸ್ತ್ರ ಕೇಂದ್ರಗಳು ಈ ದಿನದಂದು ಸಮುದ್ರ ಹಸು ಕುರಿತ ವಿಶೇಷ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತವೆ. ಕೆಲವರು ಸ್ವಯಂ ಸೇವಕರಾಗಿ ಕಡಲ ಹಸುಗಳ ಜಾಗೃತಿ ಅಭಿಯಾನವನ್ನು ಪ್ರಾರಂಭಿಸುತ್ತಾರೆ. ಮತ್ತೆ ಕೆಲವರು ಅವುಗಳ ಸಂರಕ್ಷಣಾ ಕಾರ್ಯಕ್ರಮಗಳನ್ನು ನಿರ್ವಹಿಸಲು ದಾನ ಮಾಡುವ ಮಾಲಕ ಮ್ಯಾನಟೀ ಮೆಚ್ಚುಗೆ ದಿನವನ್ನು ಆಚರಿಸುತ್ತಾರೆ.

ಅಳಿವಿನಂಚಿನಲ್ಲಿರುವ ಕಡಲ ಹಸು ಅಥವಾ ಸಮುದ್ರ ಹಸು ಬಗ್ಗೆ ಜಾಗೃತಿ ಮೂಡಿಸಲು ಪ್ರತಿ ವರ್ಷ ಮಾರ್ಚ್‌ ತಿಂಗಳ ಕೊನೆ ಬುಧವಾರದಂದು ಕಡಲ ಹಸು ಅಥವಾ ಮ್ಯಾನಟೀ ಅಪ್ರಿಶಿಯೇಷನ್‌ ದಿನವನ್ನು ಅಮೆರಿಕ ಸೇರಿದಂತೆ ವಿಶ್ವದ ಹಲವು ಭಾಗಗಳಲ್ಲಿ ಆಚರಿಸಲಾಗುತ್ತದೆ.