ಚೆನ್ನೈ: ಕ್ರೀಡಾಪಟುಗಳು, ಸಿನಿಮಾ ನಟ-ನಟಿಯರ ಮೇಲಿನ ಅಭಿಮಾನವನ್ನು ಅಭಿಮಾನಿಗಳು ತಮ್ಮದೇ ರೀತಿಯಲ್ಲಿ ವ್ಯಕ್ತಪಡಿಸುವುದು ಹೊಸದೇನಲ್ಲ.
ಇನ್ನೂ ಟೀಮ್ ಇಂಡಿಯಾ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅಭಿಮಾನಿಗಳ ಬಗ್ಗೆ ಹೇಳೋದೇ ಬೇಡ. ಭಾರತ ಮಾತ್ರವಲ್ಲದೇ ವಿಶ್ವದೆಲ್ಲೆಡೆ ಇರುವ ಧೋನಿ ಅಭಿಮಾನಿಗಳು ತಮ್ಮದೇ ಶೈಲಿಯಲ್ಲಿ ಕೂಲ್ ಕ್ಯಾಪ್ಟನ್ ಮಹೀ ಮೇಲಿನ ಪ್ರೀತಿ, ಅಭಿಮಾನವನ್ನು ವ್ಯಕ್ತಪಡಿಸಿದ್ದಾರೆ.
ಇದೇ ಸಾಲಿಗೆ ಸೇರಿರುವ ಮಹೇಂದ್ರ ಸಿಂಗ್ ಧೋನಿ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅಭಿಮಾನಿಯೊಬ್ಬರು, ತಮ್ಮ ಮನೆಗೆ ‘ಹೋಮ್ ಆಫ್ ಧೋನಿ ಫ್ಯಾನ್’ ಎಂದು ನಾಮಕರಣ ಮಾಡುವ ಮೂಲಕ ಅಭಿಮಾನ ಮೆರೆದಿದ್ದಾರೆ.
ತಮಿಳುನಾಡಿನ ಅರನ್ಗುರ್ ನಿವಾಸಿ ಗೋಪಿ ಕೃಷ್ಣ ಎಂಬುವವರು ತಮ್ಮ ಮನೆಗೆ ಹಳದಿ ಬಣ್ಣದಿಂದ ಪೇಂಟ್ ಮಾಡಿಸಿ, ಚೆನ್ನೈ ಸೂಪರ್ ಕಿಂಗ್ಸ್
ತಂಡದ ಮೇಲಿನ ಪ್ರೀತಿ ವ್ಯಕ್ತಪಡಿಸಿದ್ದಾರೆ. ಮನೆಯ ಮುಂಭಾಗ ಧೋನಿ ಚಿತ್ರಗಳನ್ನು ಬಿಡಿಸಲಾಗಿದೆ. ಕೇವಲ ಗೋಪಿ ಕೃಷ್ಣ ಮಾತ್ರವಲ್ಲದೇ ಇವರ ಕುಟುಂದವರೆಲ್ಲರೂ ಧೋನಿ ಹಾಗೂ ಸಿಎಸ್ಕೆ ತಂಡದ ಅಭಿಮಾನಿಗಳೆಂಬುದು ಮತ್ತೊಂದು ವಿಶೇಷ.
ಧೋನಿ ಅಭಿಮಾನಿ ಗೋಪಿ ಕೃಷ್ಣ ಅವರ ‘ಹೋಮ್ ಆಫ್ ಧೋನಿ ಫ್ಯಾನ್’ ಎಲ್ಲರ ಗಮನ ಸೆಳೆದಿದ್ದು, ಸೋಶಿಯಲ್ ಮೀಡಿಯಾಗಳಲ್ಲಿ ಸಾಕಷ್ಟು ವೈರಲ್ ಆಗಿದೆ. ಸಿಎಸ್ಕೆ ತಂಡದ ಕಟ್ಟಾ ಅಭಿಮಾನಿಯ ಗೋಪಿ ಕೃಷ್ಣ ಹಾಗೂ ಅವರ ಮನೆಯ ಫೋಟೋಗಳನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಶೇರ್ ಮಾಡುವ ಮೂಲಕ ಇಡೀ ತಂಡದ ವತಿಯಿಂದ ಕೃತಜ್ಞತೆ ಸಲ್ಲಿಸಲಾಗಿದೆ.