ಡೆನ್ಮಾರ್ಕ್(Denmark) ದೇಶವು(Country) ಹಲವಾರು ವಿಶೇಷತೆಗಳನ್ನು ಒಳಗೊಂಡಿದೆ. ಇದು ಇಡೀ ವಿಶ್ವದಲ್ಲೇ ಅತ್ಯಂತ ಖುಷಿಯಾಗಿರುವ ಜನರನ್ನು ಹೊಂದಿರುವ ದೇಶವಂತೆ! ವಿಶ್ವ ಸಂತೋಷ ದಿನದ ಅಂಗವಾಗಿ ‘ವರ್ಲ್ಡ್ ಹ್ಯಾಪಿನೆಸ್ ರಿಪೋರ್ಟ್’(World Happiness Report) ಈ ವರದಿಯನ್ನು ಬಿಡುಗಡೆ ಮಾಡಿದೆ.
156 ದೇಶಗಳ ಮೇಲೆ ನಡೆಸಿದ ಅಧ್ಯಯನದ ಪ್ರಕಾರ, ಈ ಭೂಮಿಯ ಮೇಲೆ ಡೆನ್ಮಾರ್ಕ್ ದೇಶ ಅತ್ಯಂತ ಸುಖ ಸಂತೋಷವನ್ನು ಹೊಂದಿರುವ ಜನರನ್ನು ಒಳಗೊಂಡ ದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ವಿಶ್ವಸಂಸ್ಥೆ ಇದನ್ನು ಅಧಿಕೃತವಾಗಿ ಪ್ರಕಟಿಸಿದೆ. ನಮ್ಮ ಭಾರತ ದೇಶ 118ನೇ ಸ್ಥಾನ ಗಳಿಸಿದೆ, ಆಫ್ರಿಕಾ ಖಂಡದ ಬುರುಂಡಿಯ ಜನ ಹೆಚ್ಚು ಅಸಂತೋಷದಿಂದ ಕೂಡಿದ್ದು, ಕೊನೆಯ ಸ್ಥಾನದಲ್ಲಿದೆ. ಡೆನ್ಮಾರ್ಕ್ ನ ನಂತರ ಸ್ವಿಜರ್ಲೆಂಡ್, ಐಸ್ಲೆಂಡ್, ನಾರ್ವೆ, ಫಿನ್ಲೆಂಡ್, ಕೆನಡಾ, ನೆದರ್ಲೆಂಡ್, ನ್ಯೂಜಿಲ್ಯಾಂಡ್, ಆಸ್ಟ್ರೇಲಿಯಾ, ಸ್ವೀಡನ್ ದೇಶಗಳು ಟಾಪ್ 10 ರಲ್ಲಿವೆ.
5.6 ದಶಲಕ್ಷ ಜನರನ್ನು ಹೊಂದಿರುವ ಡೆನ್ಮಾರ್ಕ್ ಈ ಹಿಂದೆ ಕೂಡ ಭೂಮಿ ಮೇಲಿನ ಅತ್ಯಂತ ಸಂತೋಷದ ದೇಶ ಎಂಬ ಕೀರ್ತಿಗೆ ಭಾಜನವಾಗಿತ್ತು. 2012 ರಿಂದ ಮೂರು ಬಾರಿ ಈ ಗೌರವಕ್ಕೆ ಪಾತ್ರವಾಗಿದೆ. ಈ ಸಮೀಕ್ಷೆಯಲ್ಲಿ, ದೇಶದ ಜನರ ಆರೋಗ್ಯ, ವೈದ್ಯಕೀಯ ಸೌಲಭ್ಯ, ಕುಟುಂಬ ಸದಸ್ಯರ ಮಧ್ಯೆ ಇರುವ ಸಂಬಂಧಗಳು, ಉದ್ಯೋಗ ಭದ್ರತೆ ಮತ್ತು ಇತರ ಸಾಮಾಜಿಕ ಕಾರಣಗಳು, ರಾಜಕೀಯ ಸ್ವಾತಂತ್ರ್ಯ ಮತ್ತು ಸರ್ಕಾರದ ಮಟ್ಟದಲ್ಲಿ ಭ್ರಷ್ಟಾಚಾರದ ಪ್ರಮಾಣವನ್ನು ಕೂಡ ಪರಿಗಣನೆಗೆ ತೆಗೆದುಕೊಳ್ಳಲಾಗುತ್ತದೆ.
ಪ್ರಪಂಚದಲ್ಲಿ ಅತ್ಯಂತ ಕಡಿಮೆ ಭ್ರಷ್ಟಾಚಾರ ಹೊಂದಿರುವ ದೇಶ ಎನ್ನುವ ಕೀರ್ತಿಗೆ ಕೂಡ ಡೆನ್ಮಾರ್ಕ್ ಪಾತ್ರವಾಗಿದೆ. ಡೆನ್ಮಾರ್ಕ್ ನಲ್ಲಿ ಶೇ 43% ರಷ್ಟು ಮಂದಿ ಮಹಿಳೆಯರು ಸರ್ಕಾರಿ ವಲಯದಲ್ಲಿ ಕೆಲಸ ಮಾಡುತ್ತಿದ್ದಾರೆ. ಜನರು ಕಷ್ಟದಲ್ಲಿದ್ದಾಗ ಅಲ್ಲಿನ ಸರ್ಕಾರ ಹೆಚ್ಚೆಚ್ಚು ಸಹಕಾರ ನೀಡುವುದರಿಂದ, ದೇಶದಲ್ಲಿ ಭ್ರಷ್ಟಾಚಾರದ ಪ್ರಮಾಣ ಕಡಿಮೆ ಎನ್ನುತ್ತದೆ ಅಧ್ಯಯನ.