ಇದು ಅಪರೂಪದ ಮಾನಸಿಕ ಅಸ್ವಸ್ಥತೆಯಾಗಿದ್ದು , ಇದರಲ್ಲಿ ಬಾಧಿತ ವ್ಯಕ್ತಿಯು ತಾನು ಸತ್ತಿದ್ದೇನೆ, ಅಸ್ತಿತ್ವದಲ್ಲಿಲ್ಲ, ಕೊಳೆತಿದ್ದೇನೆ ಅಂತ ನಂಬಿರುತ್ತಾನೆ. ತನ್ನ ರಕ್ತ ಅಥವಾ ಆಂತರಿಕ ಅಂಗಗಳು ನಿಷ್ಕ್ರಿಯವಾಗಿವೆ ಅನ್ನುವ ಭ್ರಮೆಯಲ್ಲಿರುತ್ತಾನೆ.

ಈ ಕಾಯಿಲೆಯಿಂದ ಬಳಲುತ್ತಿರುವ ನೂರು ರೋಗಿಗಳನ್ನು ಪರೀಕ್ಷೆಗೊಳಪಡಿಸಿದಾಗ, ಅಂಕಿಅಂಶಗಳ ವಿಶ್ಲೇಷಣೆಯ ಪ್ರಕಾರ ಕೋಟಾರ್ಡ್ ಸಿಂಡ್ರೋಮ್‌ನ 45% ಪ್ರಕರಣಗಳಲ್ಲಿ ಸ್ವಯಂ ಅಸ್ತಿತ್ವದ ನಿರಾಕರಣೆ ಕಂಡುಬರುತ್ತದೆ ಎಂದು ಸೂಚಿಸಿದೆ. ಇತರ 55% ರೋಗಿಗಳು ಅಮರತ್ವದ ಭ್ರಮೆಯನ್ನು ಹೊಂದಿದ್ದಾರೆ. 1880 ರಲ್ಲಿ, ನರವಿಜ್ಞಾನಿ ಜೂಲ್ಸ್ ಕೊಟಾರ್ಡ್ ಈ ಸ್ಥಿತಿಯನ್ನು “ದಿ ಡೆಲಿರಿಯಮ್ ಆಫ್ ನೆಗೇಶನ್” ಎಂದು ವಿವರಿಸಿದರು. ಇದು ಅತೀ ತೀವ್ರತೆಯ ಮನೋವೈದ್ಯಕೀಯ ರೋಗಲಕ್ಷಣವಾಗಿದೆ. ಈ ರೋಗ ಇನ್ನೂ ಆರಂಭಿಕ ಹಂತದಲ್ಲಿದ್ದರೆ, ರೋಗಿಗಳಲ್ಲಿ ಹತಾಶೆ ಮತ್ತು ಸ್ವಯಂ ಅಸಹ್ಯದ ಲಕ್ಷಣಗಳಿರುತ್ತವೆ.

ಆದ್ರೆ ಕಾಯಿಲೆ ತೀವ್ರವಾದ ಪ್ರಕರಣಗಳಲ್ಲಿ ರೋಗಿಗಳಲ್ಲಿ, ನಿರಾಕರಣೆ ಮತ್ತು ದೀರ್ಘಕಾಲದ ಮನೋವೈದ್ಯಕೀಯ ಖಿನ್ನತೆ ಹಾಗೂ ತೀವ್ರ ಭ್ರಮೆಗಳು ಕಂಡುಬರುತ್ತವೆ. ನಿರಾಕರಣೆಯ ಭ್ರಮೆಗಳು ಕೋಟಾರ್ಡ್ ಸಿಂಡ್ರೋಮ್‌ನಲ್ಲಿ ಮುಖ್ಯ ಲಕ್ಷಣವಾಗಿದೆ. ರೋಗಿಯು ಸಾಮಾನ್ಯವಾಗಿ ತಮ್ಮ ಅಸ್ತಿತ್ವವನ್ನೇ ನಿರಾಕರಿಸುತ್ತಾರೆ, ದೇಹದ ಒಂದು ನಿರ್ದಿಷ್ಟ ಭಾಗದ ಅಸ್ತಿತ್ವವನ್ನು ಅಥವಾ ಅವರ ದೇಹದ ಒಂದು ಭಾಗದ ಅಸ್ತಿತ್ವವನ್ನು ನಿರಾಕರಿಸುತ್ತಾರೆ.

ಕೋಟಾರ್ಡ್ ಸಿಂಡ್ರೋಮ್ ನಲ್ಲಿ ಮೂರು ಹಂತಗಳಿವೆ:
ಪ್ರಾರಂಭಿಕ ಹಂತ, ಮನೋವಿಕೃತ ಖಿನ್ನತೆ ಮತ್ತು ಹೈಪೋಕಾಂಡ್ರಿಯಾದ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. 2ನೇ ಹಂತ, ಸಿಂಡ್ರೋಮ್ನ ಸಂಪೂರ್ಣ ಬೆಳವಣಿಗೆಯಾಗಿರುತ್ತದೆ ಮತ್ತು ನಿರಾಕರಣೆಯ ಭ್ರಮೆ ಹೆಚ್ಚಿರುತ್ತದೆ. ದೀರ್ಘಕಾಲದ ಹಂತ, ದೀರ್ಘಕಾಲದ ಮನೋವೈದ್ಯಕೀಯ ಖಿನ್ನತೆಯ ಜೊತೆಗೆ ತೀವ್ರವಾದ ಭ್ರಮೆಗಳು ಮುಂದುವರೆಯುತ್ತವೆ.

ಕೊಟಾರ್ಡ್ ಸಿಂಡ್ರೋಮ್ ರೋಗಿಗಳು, ವೈಯಕ್ತಿಕ ನೈರ್ಮಲ್ಯ ಮತ್ತು ದೈಹಿಕ ಆರೋಗ್ಯದ ನಿರ್ಲಕ್ಷ್ಯದ ಕಾರಣದಿಂದ ಪೀಡಿತ ವ್ಯಕ್ತಿಯನ್ನು ಸಮಾಜ ದೂರವಿಡುತ್ತದೆ. ಸ್ವಯಂ ನಿರಾಕರಣೆಯ ಭ್ರಮೆಗಳು ರೋಗಿಯನ್ನು ಬಾಹ್ಯ ವಾಸ್ತವವನ್ನು ಅರ್ಥ ಮಾಡಿಕೊಳ್ಳುವುದನ್ನು ತಡೆಯುತ್ತದೆ. ನಂತರ ಬಾಹ್ಯ ಪ್ರಪಂಚದ ಬಗ್ಗೆ ವಿಕೃತ ನೋಟವನ್ನು ಉಂಟುಮಾಡುತ್ತದೆ. ನಿರಾಕರಣೆಯ ಇಂತಹ ಭ್ರಮೆಗಳು ಸಾಮಾನ್ಯವಾಗಿ ಸ್ಕಿಜೋಫ್ರೇನಿಯಾದಲ್ಲಿ ಕಂಡುಬರುತ್ತವೆ. ಕೆಲವೊಮ್ಮೆ ಕೊಟಾರ್ಡ್ಸ್ ಸಿಂಡ್ರೋಮ್‌ನ ರೋಗಿಯಲ್ಲಿ ಭ್ರಮೆ ಇಲ್ಲದಿದ್ದರೂ, ಕೇವಲ ನಿರಾಕರಣೆಯ ಬಲವಾದ ಭ್ರಮೆಗಳು ಸ್ಕಿಜೋಫ್ರೇನಿಕ್ ರೋಗಿಗಳಲ್ಲಿ ಕಂಡುಬರುವಂತೆ ಇರುತ್ತವೆ.

ಇದಕ್ಕೆ ಚಿಕಿತ್ಸೆಯು ಇದೆ. ಖಿನ್ನತೆ- ಶಮನಕಾರಿಗಳು , ಆಂಟಿ ಸೈಕೋಟಿಕ್ಸ್ ಮತ್ತು ಮೂಡ್ ಸ್ಟೆಬಿಲೈಸರ್‌ಗಳನ್ನು ಬಳಸಿಕೊಂಡು ಏಕ ಚಿಕಿತ್ಸಕ ಮತ್ತು ಬಹು ಚಿಕಿತ್ಸಕ ಎರಡೂ ಔಷಧೀಯ ಚಿಕಿತ್ಸೆಗಳು ಯಶಸ್ವಿಯಾಗಿದೆ. ಅಂತೆಯೇ, ಖಿನ್ನತೆಗೆ ಒಳಗಾದ ರೋಗಿಯೊಂದಿಗೆ, ಎಲೆಕ್ಟ್ರೋಕನ್ವಲ್ಸಿವ್ ಥೆರಪಿ (ECT) ಫಾರ್ಮಾಕೊಥೆರಪಿಗಿಂತ ಹೆಚ್ಚು ಪರಿಣಾಮಕಾರಿಯಾಗಿದೆ. ಜೊತೆಗೆ ಮಾನಸಿಕ ತೊಂದರೆಯಿಂದ ಬಳಲುತ್ತಿರುವ ರೋಗಿಗಳಿಗೆ ಕಾಳಜಿ ಪ್ರೀತಿ ಸಾಂತ್ವನ ಇವುಗಳೂ ಕೂಡ ಪರಿಣಾಮಕಾರಿಯಾದಂತಹ ಔಷದಿಯಂತೆ ಕೆಲಸ ಮಾಡುತ್ತವೆ.

• ಪವಿತ್ರ ಸಚಿನ್