ಉದ್ಯೋಗವನ್ನರಸಿ ಅಮೇರಿಕಾಕ್ಕೆ ಬರುವ ವಲಸೆಗಾರರಿಗೆ ಗುಡ್‌ ನ್ಯೂಸ್

ನವದೆಹಲಿ, ಡಿ. 04: ಅಮೇರಿಕಾಕ್ಕೆ ಉದ್ಯೋಗವನ್ನರಿಸಿ ಬರುವ ವಲಸೆಗಾರರಿಗೆ ಸಂಖ್ಯಾತ್ಮಕ ಮಿತಿಯನ್ನು ತೆಗೆದುಹಾಕುವ ಮಸೂದೆಯನ್ನು ಅಮೆರಿಕ ಸಂಸತ್ತು ಸರ್ವಾನುಮತದಿಂದ ಅಂಗೀಕರಿಸಿದೆ. ಈ ಮೂಲಕ ಗ್ರೀನ್​ ಕಾರ್ಡ್​ಗಾಗಿ ಕಾಯುತ್ತಿದ್ದ ಅಮೆರಿಕದಲ್ಲಿರುವ ಸಾವಿರಾರು ಮಂದಿ ಭಾರತೀಯ ವೃತ್ತಿಗಾರರಿಗೆ ಸಿಹಿಸುದ್ದಿ ಲಭಿಸಿದಂತಾಗಿದೆ.

ಹೆಚ್​ 1 ಬಿ ವೀಸಾದ ಅಡಿಯಲ್ಲಿ ಅಮೆರಿಕಕ್ಕೆ ಬರುವ ಭಾರತೀಯ ಐಟಿ ವೃತ್ತಿಪರರು ಗ್ರೀನ್​ ಕಾರ್ಡ್​ ಅಥವಾ ಶಾಶ್ವತ ರೆಸಿಡೆನ್ಸಿಗಾಗಿ ದಶಕಗಳಿಂದ ಕಾಯುತ್ತಿದ್ದರು. ಟ್ರಂಪ್​ ಆಡಳಿತಾವಧಿಯಲ್ಲಿ ಹೆಚ್​​ 1 ಬಿ ವೀಸಾಗಳ ಮೇಲೆ ಹೇರಲಾಗಿದ್ದ ನಿರ್ಬಂಧಗಳನ್ನು ಸಡಿಲಗೊಳಿಸಿ ಹಸಿರು ಕಾರ್ಡ್​ ನಿಯಮ ಜಾರಿಗೆ ತರಲಾಗಿದೆ.

ಪ್ರಸ್ತುತ ಸುಮಾರು 1 ಮಿಲಿಯನ್​ ವಿದೇಶಿ ಪ್ರಜೆಗಳು ಅಮೆರಿಕದಲ್ಲಿ ಕುಟುಂಬ ಸಮೇತರಾಗಿ ಕಾನೂನುಬದ್ಧವಾಗಿಯೇ ವಾಸಿಸುತ್ತಿದ್ದಾರೆ. ಇದರಲ್ಲಿ ಭಾರತೀಯರ ಸಂಖ್ಯೆಯೇ ಜಾಸ್ತಿಯಾಗಿದ್ದು, ಅಮೆರಿಕದಿಂದ ಗ್ರೀನ್​ ಕಾರ್ಡ್​ ಪಡೆಯಬೇಕೆಂದು ಸುಮಾರು 8 ಲಕ್ಷಕ್ಕೂ ಅಧಿಕ ಮಂದಿ ಭಾರತೀಯರು ಅರ್ಜಿ ಸಲ್ಲಿಸಿದ್ದರು. ಆದರೆ ದಶಕಗಳಿಂದ ಈ ಅರ್ಜಿ ವಿಚಾರಣೆಗೆ ಒಳಪಡದೇ ಹಾಗೆ ಉಳಿದುಕೊಂಡಿತ್ತು.

ವಿದೇಶದಿಂದ ಅಮೆರಿಕಕ್ಕೆ ತೆರಳಿದವರು ಅಲ್ಲಿನ ನಿವಾಸಿ ಎಂದು ಗುರುತಿಸಿಕೊಳ್ಳಬೇಕು ಅಂದರೆ ತಮ್ಮ ಉದ್ಯೋಗದಲ್ಲಿ ಪ್ರಾವೀಣ್ಯತೆಯನ್ನ ಪಡೆದಿರಬೇಕು. ಆಗ ಮಾತ್ರ ಅಮೆರಿಕ ಅಂತಹ ವಿದೇಶಿ ಪ್ರಜೆಗೆ ಔದ್ಯೋಗಿಕ ಗ್ರೀನ್​ ಕಾರ್ಡ್​ ನೀಡಿ ತನ್ನ ದೇಶದ ಶಾಶ್ವತ ಪ್ರಜೆಯ ಸ್ಥಾನ ನೀಡುತ್ತೆ.